1 Akorintu 10:1-33
10 Anna, kinachuna wi musuwele wi makholo ahu oothene yaari vathi va neeku* nave oothene yaalapuwa eniya.
2 Oothene yaapatisiwa mwa Mose, moorweela wa neeku ni eniya;
3 oothene yaalya yoolya emohamoha Muluku aavanheiye
4 nave oothene yaawurya maahi Muluku aavanheiye. Ilukuluku sincipale awo yaanawurya maahi oorweela va nluku ntokweene nenlo naachara, nave nluku nlo nnamweemelela* Kristu.
5 Nto Muluku haahakalanle ni ancipale a yaawo, hiihaa yaahiiphiwa mutakhwani.
6 Ichu seiha sootakiherya wa hiyaano, wi nihichuneke ichu soopahula, ntoko yaawo yaachunnaaya.
7 Muhilapeke soophwaniherya, ntoko akina a yaawo yeenraaya; hiiha ntoko erempwaaya: “Achu yaakiraathi wi elye ni owurya. Voocharela yaavinya wi echekuleke.”
8 Nave nihipakeke ocapaheya,* ntoko akina a yaawo yaacapahen’yaaya,* wi ekhwe achu macikhwi makhumi meeli ni macikhwi mararu* mu nihiku nimoha pahi.
9 Nihimweehe Yehova ntoko akina a yaawo yaamweenhaaya, elummwa inowa nave etholowa.
10 Muhikhale awaapa, ntoko akina a yaawo yaaryaaya awaapa, nave yiiphiwa ni mulipa ootoloxa.
11 Ichu seiha saaweerenle wi ikhale sootakiherya, nave saarempwa ntoko yoolopola wa hiyo nnakhala omakuchuwelo wa mukhalelo wa ichu.
12 Mwawiihiiha, yoole onuupuwela wi oheemela, iivareryeleke wi ahuuwe.
13 Hiyoophwannyeeni yaweeha emoharu mano, yoohikhala yeeyo eri yawunlaana wa achu. Nto Muluku toororomeleya, owo hoohiyaani wi mweehiwe opwaha munaweryelaanyuvo; nyenya mwakumanano yaweeha, owo onamookhaviheryaani wi nwerye ovilela.
14 Mwawiihiiha anna oosiveliwa, chawani olapa soophwaniherya.
15 Kinaloca ntoko ni achu a miruku; muthorihe mukhatiinyu yeeyo kinalocaaka.
16 Apwanne koopho yoowo a nreeliho nnamureelihaahu, hanapaka makupa mu nikhami na Kristu? Apwanne epaau yeeyo nnakawanyaahu, henapaka makupa mmwiili wa Kristu?
17 Woona wi erivo epaau emoha, hiyo, naamwi nri ancipale, nri mwiili mmoha, vawi oothene ninnapaka makupa a epaau yeele emoha.
18 Mwaavarerye Aisarayeli ntoko mwa mwiili: Apwanne yaale analya mikucho hanapaka makupa a altare?
19 Vano, tiheeni kinachunaaka oloca? Wi yeele enaveleeliwa mukucho wa yoophwaniherya teri echweenevo, naari wi yoophwaniherya teri echweenevo?
20 Hooye; nto kinaloca wi yeeyo maloko anaveleelelaaya mikucho; awo anaveleelela mikucho wa masololo, ohiya wa Muluku. Nave miyo nkinachuna wi mpake makupa ni masololo.
21 Nyuwo hamunawerya onwurerya koopho a Yehova ni koopho a masololo; nyuwo hamunawerya olya “va meesa a Yehova” ni va meesa a masololo.
22 Naari ‘apwanne nnamutannyerya ehace Yehova’? Apwanne nri akuru ompwaha owo?
23 Ichu soothene iri saweemereryiwa, nyenya tahi wi ichu soothene ti samphurelo. Ichu soothene ti saweemereryiwa, nyenya tahi wi ichu soothene sinnateka.
24 Vano muchu ti muchu atitelele waavya ohiya mphurelo awe, nyenya wa mukina.
25 Mukhuureke emece yoothene enakulihiwa o nipuro onakulihiwawo imece muhipanke makoho wa nthowa na yawuupuxerya-ya-murima anyu,
26 woona wi “elapo ni ichu soothene iri mummo ti sa Yehova.”
27 Wakhala wi muchu oohiroromela ohoowopelaani yoolya, nave nyuwo mweemererya oyawo, mulyeeke ichu soothene muneeraanyu mvahiweke, muhipanke makoho wa nthowa na yawuupuxerya-ya-murima anyu.
28 Nyenya wakhala wi muchu ohooleelaani ariki: “Ela yooveleeliwa mukucho,” muhilye wa nthowa na yoowo oolenleeni ni wa nthowa na yawuupuxerya-ya-murima.
29 Nkinaloca sa yawuupuxerya-ya-murima anyu, nto ya muchu mukina. Tiwi, ntakhara heeni otaphuwa waka waahaalaaya othorihiwa ni yawuupuxerya-ya-murima ya muchu mukina?
30 Wakhala wi kinnamuthamala Muluku wa nthowa na yoolya, ntakhara heeni kaahaalaaka waakaahiwa wa yeeyo kivanhaaka mathamalelo?
31 Mwawiihiiha, naari mulyaaka naari muwuryaka naari mweeraka echu ekina eri yoothene, mweerekeno soothene wi mmucicimihe Muluku.
32 Muhikhale nthowa nookwaculiha wa Ayuta, wa Akriki, naari wa muloko wa Muluku,
33 hiiha ntoko miyo kineereryaaka waahakalaliha achu oothene mu ichu soothene, kihaavyaka mphurelo aka, nto wa achu ancipale, wi evuluxiwe.
Inoota
^ Naari: “oothene yaahooleliwa nneeku.”
^ Naari: “naari.”
^ Moone Masu Atharihiwe.
^ Moone Masu Atharihiwe.
^ 23.000.
