1 Akorintu 13:1-13
-
Osivela: Mphiro woopwaha (1-13)
13 Wakhala wi kinaloca mu ilocelo sa achu ni sa ankeelo, nyenya kihikhalano osivela kiri ntoko enyacu enanyakula naari muthipo onaruma.
2 Nave wakhala wi kookhalano yamahala ya oloca mwa miririmu ni wiiwexexa soovitheya saweela soothene ni osuwela woothene, nave wakhala wi kookhalano nroromelo noothene na othaamiha* miyaako, nto kaahikhalano osivela nkiri echweenevo.*
3 Wakhala wi koovaha sookhalano saka soothene wi kaavakulele akina, nave wakhala wi kooveleela mwiili aka wi kiirumihe, nto kaahikhalano osivela, nkinaphura echu.
4 Osivela ti woopisa murima* ni wooreera murima. Osivela hiwaano ehace.* Owo honiikusererya, honiirumiha,
5 honeerano soohiphwanelela,* hoonaavya soochuna sa yoowo mwaneene, honaakuvela onyeenyeya. Honakuha mathowa.*
6 Honahakalala ni soohookololowa, nyenya onahakalala ni eparipari.
7 Onnawethano ichu soothene, onneemererya ichu soothene, onnawehererya ichu soothene, onnavilela ichu soothene.
8 Osivela honamalaru. Nto saarivo samahala sa oloca mwa miririmu, inarwa imalihiwa; saarivo samahala sa oloca ilocelo,* inarwa imala; saarivo samahala sa osuwela, inarwa imalihiwa.
9 Tiwi nrino masuwelelo oohaakhwanela nave ninnaloca mwa miririmu moohaakhwanela,
10 nto yarwa yeeyo eri yawaakhwanela, yeeyo eri yoohaakhwanela enarwa emalihiwa.
11 Vaavaa kaaryaaka mwaana, kaaloca ntoko mwaana, kuupuwela ntoko mwaana, kaanaalikhela ichu ntoko mwaana; nto vano kinnunwaaka, koomaliha mikhalelo sa onamwane.
12 Vano nnoona ni makacamiho moorweela wa espeelyu* ya emetaale, nto voocharela nnarwa noona ethoi ni ethoi. Hiihaano kinasuwela moohaakhwanela nto voocharela kinarwa kisuwela mwawaakhwanela,* hiiha ntoko kisuweliwaaka mwawaakhwanela.
13 Nto vano, sinniikhalelaru ichu iha raru: nroromelo, ewehereryo, osivela; nyenya etokweenexa wa seiha ti osivela.
Inoota
^ Naari: “oteexa.”
^ Naari: “nkinaphara muteko.”
^ Naari: “ti wa nthiti.”
^ aari: “nrima.”
^ Naari: “tahi woowali.”
^ Naari: “honaalakhanyerya soohesa.”
^ Ela tiwi, oloca mootikhiniha mu ilocelo ikina.
^ Naari: “eweheryo.”
^ Naari: “phaama.”
