1 Akorintu 3:1-23
3 Mwawiihiiha, anna, nkiwenrye oloca ni nyuwo ntoko achu oomunepani, nyenya ntoko achu oomwiilini, ntoko anamwane mwa Kristu.
2 Koocelekhenleeni ni eleiti,* ohiya ni yoolya yoolipa, woona wi nyuwo himwaalipalimpe mwawaakhwanela. Mweeparipari naari hiihaano nyuwo hamulipalimpe mwawaakhwanela,
3 ntakhara nlelo muri a mwiili. Woona wi wa nyuwo wookhalavo ehace ni owanawana, apwanne tahi eparipari wi muri a mwiili nave wi muneeca ntoko achu pure?
4 Tiwi, vaavaa mmoha onaloceiye: “Miyaano ka awawe Paulo,” nto mukina oni: “Miyaano ka awawe Apolu,” apwanne hamuneera ichu ntoko achu pahi?
5 Vano Apolu taani? Aa, Paulo taani? Anamichaka moorweela mwa yaawo nyuwo mukhanlaanyu oororomela, hiiha ntoko Apwiya amvanhaaya mmoha ti mmoha.
6 Miyaano kaahaala, Apolu ahela maahi, nto Muluku tannuwihale,
7 vawi naari yoole onaala naari yoole onahela maahi, tahi echweenevo, nto Muluku yoowo onannuwiha.
8 Mwawiihiiha, yoole onaala ni yoole onahela maahi ari mmohamoha,* nyenya muchu ti muchu onahaala waakhela nchuwelo nawaweene mwawiiwanana ni muteko awe.
9 Vawi hiyo na anamuteko akhwaawe a Muluku. Nyuwo muri emaca yoolimmwa ya Muluku, empa etekiwe ni Muluku.
10 Mwawiiwanana ni mahala matokweene a Muluku yaawo kaavahiwaaka, koopaka mathipelo ntoko mulipa ooteka a mavyakelo,* nyenya muchu mukina onateka vasulu vaya. Nto mmoha ni mmoha atitelele ovarerya mmukhalelo owo onatekeiye vasulu va mathipelo yaawo.
11 Tiwi haavo onawerya opaka mathipelo makina opwaha yaawo apakiwe, yoowo ori Yesu Kristu.
12 Vano akhalavo mukina onateka va mathipelo yaawo ni ooru, eparata, maluku asisapo, ithaapwa, mithala naari manasi,
13 muteko wa mmoha ti mmoha onarwa okhala wawooneya,* vawi nihiku nenlo onamooniheryeya phaameene, ntakhara owo onarwa wooneya moorweela wa mooro, nave mooro ene yoowo onarwa wooniherya muteko wa mukhalelo taani mmoha ti mmoha otenkeiye.
14 Wakhala wi muteko wa muchu otenkeiye vasulu vaya onniikhalelaru, yoowo onarwa aakhela yoochuwela awe;
15 wakhala wi muteko wa mukina woovya, owo onamuyeleela, nyenya yoowo mwaneene onarwa avuluxiwa nto eni ekhale ntoko wi ooponwe vamooroni.
16 Apwanne nyuwo hamunasuwela wi mwa empa ya Muluku nave wi munepa wa Muluku onakhala mwa nyuwo?
17 Wakhala wi mukina oomwarya empa ya Muluku, Muluku onarwa ammwarya yoowo; tiwi empa ya Muluku ti yaweeliheya, nave nyuwo mwa empa yeeyo.
18 Ahikhale oni iiwoke mwaneene: Wakhala wi mmoha a nyuwo onuupuwela wi ta miruku mmukhalelo yoola wa ichu* akhale mulolo, wi owo akhale a miruku.
19 Ntakhara miruku sa elapo yeela ti soololo wa Muluku, vawi yoorempwa: “Owo onnaaheya a miruku mu ovyaka waya.”
20 Nave tho: “Yehova oosuwela wi sawuupuwela sa achu a miruku ti satheru.”
21 Mwawiihiiha, ahikhale oni iirumiheke mwa achu; ntakhara ichu soothene ti sawinyu.
22 Moohipwacha aari Paulo naari Apolu naari Kefa* naari elapo naari okumi naari okhwa naari ichu sa mutano naari ichu sinoorwa, ichu soothene ti sawinyu;
23 nyenya nyuwo mwa a Kristu nto Kristu ta Muluku.
Inoota
^ Naari: “mukaka.”
^ Naari: “arino yoolakelela emohamoha.”
^ Naari: “ntoko muhooleli a miruku a sooteka.”
^ Mu Ekriki, “onarwa woonihiwa.”
^ Naari: “elukuluku yeela.” Moone Masu Atharihiwe.
^ Awiichaniwa tho Petru.
