1 Akorintu 4:1-21
4 Achu anaphwanela onoonaka ntoko akhaviheryi* a Kristu ni anamuteko a soovitheya saweela sa Muluku.
2 Mwa yeeyo, echu enawehereya mwa anamuteko ori wi awo ekhale oororomeleya.
3 Wa miyo nkinapwachaxa othorihiwa ni nyuwo, naari ni etripunaale ya* achu. Mweeparipari, miyo nkiniithoriha meekhaaka.
4 Vawi miyo nkinasuwela echu vooloca sa miyo. Nyenya ela, henakeeriha wiiseera eekhaikhai; yoowo onakithoriha ti Yehova.
5 Mwawiihiiha, muhithoriheke echu ehaakumve ophiya elukuluku aya yoophwanelela, ophiyerya erwiile Apwiya. Awo anahaala oruuha ichu soovitheya sa weepiphini ekerihaka woomwaleelani, anamooneiha soochuna sa mirima nave mmoha ti mmoha onarwa aakhela ncicimiho noorweela wa Muluku.
6 Anna, koopharihela* ichu seiha wa miyo mukhataaka ni wa Apolu wi mukhaviheryeye, nave wi moorweela wa hiyo muhuseryevo nlamulo nla: “Muhipwahe ichu seiho irempwale,” wi muhisareye wiirumiha, mmucicimihaka mmoha nave mmunyemulaka mukina.
7 Taani onaweeriha okhala oohiyana ni akina? Chiryene tiheeni oryaaweno yeeyo ohaakhenlaawe? Vano waakhanle wi wohaakhela soothene oryaaweno, ntakhara heeni oniirumihaawe ntoko wi hiwaakhenle?
8 Apwanne mohaakhwaneliwa? Apwanne mooreela? Apwanne moopacerya olamulela ntoko mamwene hiyo nihirivo? Miyo chiryene kaanachuna wi mwaapacenrye olamulela ntoko mamwene wi hiyo tho nilamulele ni nyuwo ntoko mamwene.
9 Vawi wa miyo enakhala wi Muluku ooneera arummwa ookuchula athoriheliwe okhwa, ntakhara nneeriwa yootheteiwa ya eteyatru wa elapo, wa ankeelo ni wa achu.
10 Hiyo nri alolo wa nthowa na Kristu, nyenya nyuwo muri a miruku mwa Kristu; hiyo nri ooceecheya, nto nyuwo muri akuru; nyuwo munnacicimihiwa, nyenya hiyo ninnanyemuliwa.
11 Ophiyerya hiihaano, ninnavoliwa etala ni nthanana, hinaano soowara sawaakhwanela,* ninnamaniwa,* hinaano vachu vookhalavo.
12 Nave ninnalapa mwakuru ni matata ahu. Vaavaa nnaruwaniwaahu, ninnareeliha; vaavaa nniikariwaahu, ninnavilela moopixa murima;
13 vaavaa nnootheriwaahu, ninnaakhula mwawiichacala;* hiyo nikhanle ntoko ikokhola* sa veelaponi, nikhurumela na ichu soothene, ophiyerya hiihaano.
14 Kinnoorepelaani ichu seiha, ohiya wi kiwuuliheeni muru, nyenya wi koohusiheeni ntoko anamwane aka oosiveliwa.
15 Tiwi naamwi nyuwo murino alipa oohoolela macikhwi khumi* mwa Kristu, nyuwo chiryene himwaano asitiithi ancipale; mwa Kristu Yesu, miyo kookhala tiithi anyu moorweela wa michaka saphaama.
16 Mwawiihiiha, kinnooceenyeryaani: Mukitakiheryeke.
17 Ti nthowa nene kinoorumihelaakaani Timotiyu, ntakhara owo mwanaka oosiveliwa ni oororomeleya mwa Apwiya. Owo onahaala owuupuxeryaani meerelo aka mwawiiwanana ni Kristu Yesu, hiihaa ntoko kinahusihaaka mmapuro oothene mmiloko soothene.
18 Akina aasareya wiirumiha, ntoko wi nkini kirwe kooxekuryeeni.
19 Nyenya kinamurwa kooxekuryeeni moohilekela, wakhala wi Yehova oheemererya, nave kinarwa koosuwelihaani ohiya masu a yaale awiirumiha nto owerya waya.
20 Vawi Omwene wa Muluku hori mwaha wa masu nyenya owerya.
21 Mano, tiheeni munachunaanyu? Kirwe wooxekuryaani ni ekopo, naari ni osivela ni wiichacala wa mmunepani?
Inoota
^ Naari: “arummwa.”
^ Naari: “onipuro noothoriha na.”
^ Naari: “koothaamiherya.”
^ Mu Ekriki, “nri eepwitikiri ene.”
^ Naari: “ninnahoosiwa; ninnoonihiwa ekoi.”
^ Mu Ekriki, “ninnaveka mwa ncicimiho.”
^ Naari: “sootakhala; owowo.”
^ 10.000
