Liivuru Oopacerya a Matharihelo 11:1-47
11 Moovira wa elukuluku, Aisarayeli oothene yaathukumana wa Tavite, o Heporoni, eloca eriki: “Onani! Hiyaano na nikhami nimohamoha.*
2 Khalai, vaavaa Sawuli aareiye mwene, nyuwaano mwaamuhoolela Isarayeli mmikwaha soothene sa owana ekhoco.* Nave Yehova Muluku anyu, aaloca ariki: ‘Weyaano toni ohooleleke nloko naka Isarayeli nave onarwa okhala muhooleli a nloko naka Isarayeli.’”
3 Mwawiihiiha, asitokweene oothene a Isarayeli yaaya wa mwene Tavite o Heporoni, nave Tavite aapaka nlakano ni yaawo o Heporoni, vamiithoni va Yehova. Voocharela, awo yaamuthanla Tavite ntoko mwene a Isarayeli, mwawiiwanana ni masu a Yehova aalonceiye moorweela wa Samuwele.
4 Ohoolo waya, Tavite ni Isarayeli oothene yaaya o Yerusalemu, ela tiwi, Yepusi, elapo yeeyo Ayepusi yaakhalaayawo.
5 Achu o Yepusi yaanamunyemula Tavite eriki: “Weyaano horwa ovolowa muumu!” Mwawiihiiha, Tavite aahiphela epooma yoolipihiwa yo Siyoni, yeeyo olelo eniichaniwa epooma ya Tavite.
6 Mwa yeeyo Tavite aaloca ariki: “Yoole oni akhale oopacerya waatoloxa Ayepusi onahaala okhala muhooleli ni mutokweene.” Yowapi, mwaana a Seruya taari oopacerya owela nave aakhala muhooleli.*
7 Voocharela, Tavite aaya anakhala mu epooma yoolipihiwa. Ti nthowa nene yiichannaaya nipuro nenle, epooma ya Tavite.
8 Owo aapaka marehereryo a oteka vapooma voothevene, ovinyerya va Nipuro Noocukhuwa* ophiyerya moorukurerya, nave Yowapi aarehererya makupa oohalela a epooma.
9 Mwawiihiiha, Tavite aamvira akhalaka oowerya, nave Yehova a anakhoco aari ni yoowo.
10 Ala yaari ahooleli a anakhoco oowerya a Tavite yaawo vamoha ni Isarayeli oothene yaakhavihenrye olipiha olamulelo awe ni yaamukhavihenrye okhala mwene, mwawiiwanana ni masu a Yehova vooloca sa Isarayeli.
11 Ela elista ya anakhoco oowerya a Tavite: Yasopiyamu, mwaana a Hakimoniti, muhooleli a nikhuuru na anakhoco araru. Mu ekwaha emoha, owo aawiipha alopwana masana mararu nnivaka nawe.
12 Oocharela, aari Eliyasare, mwaana a Toto, Muhohiti. Owo aari mmoha a anakhoco araru oowerya.
13 Owo aari ni Tavite o Pas-tamimi, weiwo Afilisti yaathukumannaayawo ntakhara ekhoco. Weiwo yaakhalawo emaca ya sevata, nave achu yaahichawa wa nthowa na Afilisti.
14 Nyenya, owo aakhala variyari va emaca nave aakiha, awiiphaka Afilisti. Mwawiihiiha, Yehova aahaavuluxa achu awe ni ovootha* otokweene.
15 Araru a ahooleli makhumi mararu yaaya o nluku na mwaako wi yamphwanye Tavite o nikhuku na Atulami, eniiha anakhoco a Afilisti ethukukumanne ompopa wo Refaimi.
16 Tavite aari mu epooma awe yoolipihiwa, nave o Petelehemu yaakhalawo anakhoco a Afilisti.
17 Tavite aakhala ni munkhela, aloca ariki: “Kaari hiiha kiwunrye maahi a ehime eri waacamela va mulako wo Petelehemu!”
18 Mwawiihiiha, anakhoco araru yaahiphela nipuro na Afilisti, erika maahi a ehime yaakhala waacamela vamulako wo Petelehemu nave emukerihela Tavite. Nto, Tavite aakhooca owurya nave aayeeherya vamiithoni va Yehova.
19 Owo aaloca ariki: “Nkirwa kiwurya maahi yaala wa nthowa na omoova Muluku aka! Onaweryeya hai wi kiwurye nikhami na alopwana yaala yaakunhe ikumi saya va yawoopiha? Awo yaakunhe va yawoopiha ikumi saya wi eruuhe.” Mwawiihiiha, owo aakhooca owurya. Ela yaari yeeyo anakhoco araru oowerya a Tavite yeenraaya.
20 Apisai, munnawe Yowapi, aakhala muhooleli a nikhuuru na anakhoco araru. Owo aawiipha alopwana makhumi mararu nnivaka nawe nave aari oovuwa ntoko ale araru oopacerya.
21 Wa yaala akina araru, owo taari oovuwa waapwaha asinthamwene awe apiili nave aari muhooleli aya, nyenya ovuwa wawe hiwaapwanhe wa ale araru oopacerya.
22 Penaiya mwaana a Yehoyata, aari oolipa murima yoowo eenre ichu itokotoko o Kasepeli. Owo aawiipha anamwane apiili a Ariyeli o Mowape; aakhuruwela o ehime mu nihiku na mucarapo nave amwiipha mwaco.
23 Owo tho aamwiipha Muyikuputu a mannuwelo awe ootikhiniha, aari oorekama ikoovatu thanu.* Naamwi Muyikuputu aarino nivaka mvico aya waalikana* ni poco, Penaiya aamuthikirerya arino ekumputu nave amwaakha nivaka Muyikuputu, amwiiphano nivaka nenle.
24 Iha ichu seiho itokotoko Penaiya mwaana a Yehoyata eenreiye. Owo aari oovuwa ntoko anakhoco yaale araru oowerya.
25 Naamwi aavunwesa waapwaha ale makhumi mararu, ovuwa wawe hiwaapwanhe wa ale araru. Nyenya Tavite aamuthanla okhala muhooleli a nikhuuru na alipeleli awe.
26 Anakhoco oowerya a nikhuuru na anakhoco yaari Asayeli, munnawe Yowapi; Elihanani mwaana a Toto o Petelehemu;
27 Samuti Muhorita; Helesi Mupelonita;
28 Ira mwaana a Ikesi o Tekowa; Apiyeseri o Anatoti;
29 Sipekai o Husati; Ilai o Hohite;
30 Marai o Netofa, Heleti mwaana a Pana, o Netofa;
31 Itai mwaana a Ripai o Xipiya a Apenxami; Penaiya o Peratoni;
32 Hurai o mipopa so Kaxi; Apiyeli o Arpati;
33 Asimaveti o Parumita; Eliyapa o Saliponita;
34 anamwane a Hasemi o Kisonita; Yonata mwaana a Saki o Harari;
35 Ahiyami mwaana a Sakari o Harari; Elifali mwaana a Uri;
36 Heferi o Mekerati, Aiya o Peloni;
37 Heseri o Karmelo; Narai mwaana Esipai;
38 Yoweli munnawe Natani, Mipari mwaana Hikiri;
39 Seleki o Amoni; Narai o Peroti, mulipa ooteexa eyaakiho ya Yowapi mwaana a Seruya;
40 Ira o Itirita; Karepe o Itirita;
41 Uriya o Hitita; Sapati mwaana a Alai;
42 Atina mwaana a Sisa a nihimo na Rupeni, muhooleli a nihimo na Rupeni, nave ni yoowo yaakhalavo anakhoco makhumi mararu;
43 Hanani mwaana a Maka, Yosafati o Mitini;
44 Usiya o Astaroti; Sama ni Xeyeli anamwane a Hutami o Aroweti;
45 Yetiyeli mwaana a Sinri ni Yowa munnawe o Tisiti;
46 Eliyeli o Mavita; Xeripai ni Yosaviya anamwane a Elinami; Itima o Mowape;
47 Eliyeli, Opeti ni Yasiyeli o Mesopa.
Inoota
^ Mu Ehepiri, “makhuva ni mwiili aa.”
^ Mu Ehepiri, “ti yoole aamweeriha Isarayeli okhuma ni ovolowa.”
^ Mu Ehepiri, “muru.”
^ Naari: “na Milo.” Mu nsu na Eheperi nnataphulela “osareiha.”
^ Naari: “ovuluxa.”
^ Orekama wawe waari wa ameeturu 2.23. Mmoone Apentise 2.14.
^ Naari: “eluca aya yaalikana.”
