Liivuru Oopacerya a Matharihelo 16:1-43
16 Mwawiihiiha, awo yaamuruuha Arka a Muluku eeparipari nave emukuha mpuwa mwa muxakala yoowo Tavite aareherenryeiye ntakhara yoowo; nave awo yaaveleela soovaha soopahiwa ni mikucho sawaataana vamiithoni va Muluku eeparipari.
2 Vaavaa Tavite aamalinheiye ovaha soovaha soopahiwa ni mikucho sawaataana, owo aahaareeliha achu mu nsina na Yehova.
3 Ohiya yeeyoru, owo aahaakawela Aisarayeli oothene, mulopwana ori oothene ni muthiyana ori oothene epaau yoovilikana, epoolu ya taamara, ni epoolu ya uuva awuuma.
4 Voocharela, owo aahaathanla Alevi akina wi erumeeleke variyari va Arka a Yehova, wi emvuwiheke,* omuthamalela, ni omucicimiha Yehova, Muluku a Isarayeli.
5 Asafi aari muhooleli, nave anaawiili aari Sakariya; Xeyeli, Semiremoti, Yehiyeli, Matitiya, Eliyapi, Penaiya, Opeti-etomi ni Xeyeli yiipa ikaruma sooruma ni achakare nave Asafi aawiipa apankwe;
6 alipa a mukucho Penaiya ni Yahasiyeli yaaniipa mapenka moohihiyererya variyari va Arka awaataana a Muluku eeparipari.
7 Naari nihiku nenle Tavite mu ekwaha yoopacerya aapankeiye ncipo na omuthamalela Yehova moorweela wa Asafi ni asinnawe:
8 “Mmuthamalele Yehova, mwiichane nsina nawe,
Mweerihe wi miteko sawe isuweliwe variyari va achu!
9 Mmwiipele yoowo, mmwiipele mmucicimihaka* yoowo,
Muupuwelele* miteko sawe soothene sootikhiniha.
10 Mwiirumihe ntakhara nsina nawe naweela.
Ihakalale mirima sa yaale enamwaavya Yehova.
11 Mmwaavye Yehova ni ikuru sawe.
Mwaavye ethoi awe moohihiyererya.
12 Muupuwele sootikhiniha eenreiye,Sootikhiniha sawe ni mathorihelo aalonceiye,
13 Nyuwo muyareriwo* wa Isarayeli mulapeli awe,Nyuwo anamwane a Yakopo, oothanliwa awe.
14 Owo ti Yehova, Muluku ahu.
Mathorihelo awe ari veelaponi yoothene.
15 Muupuwele waataana wawe okhala wookhala,Nlakano opankeiye* wa achu awe,
16 Waataana aapankeiye ni Aparahamu,Ni olipela aapankeiye ni Isaki.
17 Olipela weiwo aatikithenryeiye ntoko nlamulo wa YakopoNave ntoko waataana woohimala ntakhara Isarayeli,
18 Alocaka: ‘Kinamoovaha elapo yo Kanani,Ntoko yoohiyeryiwa okaweliwaawe.’
19 Ela yeeren’ye vaavaa nyuwaano mwaaryaanyu vakhaani,Aa, vakhaani, nave mwaari anamarwa mu elapo yeele.
20 Awo yaaheeca orweela mu nloko eyaaka mu nloko nikina,Orweela mu omwene eyaaka mu omwene okina.
21 Owo heemerenrye wi muchu vyakala aahooxe,Nyenya wa nthowa na yaawo aahaasamela mamwene,
22 Alocaka: ‘Muhaatannye oothanliwa aka,Muhiweerele echu yoonanara alipa a miririmu aka.’
23 Mmwiipele Yehova, elapo yoothene!
Mulokohe ovuluxa wawe nihiku ti nihiku!
24 Mulaleye ovuwa wawe variyari va maloko,Miteko sawe sootikhiniha variyari va achu oothene.
25 Ntakhara Yehova ti mutokweene ni oophwanela ocicimihiwa.
Owo tawoopihaxa waapwaha amiluku oothene akina.
26 Amiluku oothene a achu ari amiluku atheru,Nyenya Yehova ti yoowo opanke erimu.
27 Ncicimiho* ni ovuwa sohoorukureryaani,Va nipuro munakhalaanyuvo sookhalavo ikuru ni ohakalala.
28 Mumvahe Yehova yeeyo enamphwanela,Ntakhara ovuwa wawe ni ikuru.
29 Mumvahe Yehova ncicimiho ntakhara nsina nawe;
Muruuhe yoovaha nave murwe vamiithoni vawe.
Mmukokhorele* Yehova ni soowara saweela.*
30 Muthukumeleke vamiithoni vawe, achu oothene a veelaponi!
Elapo yootikitheryiwa moolipa; nave eyo henawerya ocikinyeya.
31 Irimu ihakalale, nave elapo ya vathi ehakalale;Mulokohe variyari va maloko: ‘Yehova ti Mwene!’
32 Ephareya erume ni soothene siri mwemmo;Imaca ihakalale ni soothene siri mwemmo.
33 Mu elukuluku emohamoha, miri sa mutakhwani ihakalale vamiithoni va Yehova,Woona wi owo onnarwa* wi athorihe elapo.
34 Mmuthamalele Yehova, woona wi owo taphaama;Osivela wawe woororomeleya onniikhalelaru okhala wookhala.
35 Nave muloce: ‘Munivuluxe, khwoo Muluku a nivuluxo nahu,Munithukumanye nave munoopole wa maloko,Wi niwerye othamalela nsina nanyu naweelaNi okhalano ohakalala otokweene mu woocicimihaani.*
36 Nave wi Yehova Muluku a Isarayeli, acicimihiweOkhala wookhala.’”
Achu oothene yaaloca eriki: “Aamen!”* nave awo yaamucicimiha Yehova.
37 Voocharela, Tavite aamuhiya Asafi vamoha ni asinnawe variyari va Arka awaataana a Yehova, wi erumeeleke moohihiyererya variyari va Arka mwawiiwanana ni malakano a nihiku ti nihiku.
38 Opeti-etomi ni asinnawe, oothene yaari makhumi mathanu nammoha ni athanu nararu,* nave Opeti-etomi mwaana a Yetutumi, ni Hosa, yaari alipeleli a milako;
39 Satoki, mulipa amukucho, ni asinthamwene awe a onamukucho yaari mmuxakalani mwa Yehova mu nipuro naweela naari o Kipiyoni,
40 wi evahe soovaha soopahiwa wa Yehova moohihiyererya va altare a soovaha soopahiwa, wooxiixelo ni oxekuwa, nave wi yeere soothene seiho saarempwe mu Nlamulo na Yehova nenlo aamulamulenleiye Isarayeli.
41 Vamoha ni yaawo aakhalavo Hemani, ni Yetutumi, ni alopwana akina oohalela yaawo yaathanliwe moorweela wa masina wi emuthamaleleke Yehova, woona wi “osivela wawe woororomeleya onniikhalelaru okhala wookhala”;
42 Hemani ni Yetutumi yaakhala ni yaawo wi yiipeke mapenka, apankwe ni ikaruma saaphariheliwa wi acicimihiwe* Muluku eeparipari; nave anamwane a Yetutumi yaakhala vamilako.
43 Voocharela, achu oothene yaakookela mmawannyaya, nave Tavite aaya waareeliha achu a vaate vawe.
Inoota
^ Mu Ehepiri: “emuupuweleke.”
^ Naari: “mpake ncipo ntakhara.”
^ Naari akhweya: “muloceke sa.”
^ Mu Ehepiri, “mmiso.”
^ Naari: “olamulenleiye.”
^ Naari: “otokweene.”
^ Naari: “mmulape.”
^ Naari akhweya: “wa nthowa na ovuwa wawe waweela.”
^ Naari: “oophiya.”
^ Naari: “ovuwiha ncicimiho nanyu.”
^ Naari: “ekhale hiihaa.”
^ 18.
^ Naari: “ikaruma sa macipo.”
