Liivuru Oopacerya a Matharihelo 28:1-21
28 Tavite aahaathukumanya asitokweene oothene o Isarayeli o Yerusalemu: Asitokweene a mahimo, ahooleli a makhuuru yaamulapela mwene, ahooleli a makhuuru macikhwi ni ahooleli a makhuuru masana, ahooleli oothene yaavareryela sookhalano ni muhuwo wa mwene vamoha ni anamwane awe, vamoha ni asitokweene a mwene ni alopwana oothene oowerya ni akuru.
2 Voocharela, Tavite aaheemela nave aloca ariki:
“Yaari yookhwela ya murima aka oteka empa wi akhalekemo arka awaataana a Yehova nave ntoko nipuro na onyikalavo inaani sa Muluku ahu, miyaano kaapaka marehereryo wi kiteke.
3 Nyenya, Muluku eeparipari aakileela ariki: ‘Tahi weyaano oni oteke empa ntakhara nsina naka, woona wi wootepa owana ikhoco nave wootepa oyeeha nikhami.’
4 Mwawiihiiha, Yehova Muluku a Isarayeli aakithanla variyari va emusi yoothene ya atiithi aka wi miyaano kikhale mwene a Isarayeli okhala wookhala. Woona wi owo aamuthanla Yuta ntoko muhooleli, ni echoko ya Yuta aathanla echoko ya apapa aka, nave wa anamwane a apapa aka, kaari miyaano owo aakeemerenryeiye wi kikhale mwene a Isarayeli oothene.
5 Nave wa anamwane aka oothene, Yehova ookivaha anamwane ancipale, nave owo oomuthanla mwanaka Solomoni wi akiraathi va munyukhu wa olamulelo wa Yehova ntakhara Isarayeli.
6 “Owo aakileela ariki: ‘Mwanaa Solomoni ti yoowo oni ateke empa aka ni mayate aka, woona wi koomuthanla ntoko mwanaka nave miyo kinahaala okhala tiithi awe.
7 Kinahaala otikitherya olamulelo awe okhala wookhala wakhala wi onniiwelela malamulo aka ni mathoriheryo aka, hiiha ntoko oneereiyeno olelo.’
8 Mwawiihiiha, miyaano kinnooleela vamiithoni va Isarayeli oothene, muloko woothene wa Yehova ni vamiithoni va Muluku ahu: Waavyeke osuwela ni wiiwelela moopwacha malamulo oothene a Yehova Muluku aa, wi otitelele okhala mu elapo yeela yaphaama nave ekhale yoohiyeryiwa yawiikhalelaru wa anamwane aa.
9 “Nave weyo mwanaka Solomoni, omusuwele Muluku a apapaa nave omurumeele yoowo ni murima woothene ni okumi aa mwawaakhwanela, woona wi Yehova onnaalikhela mirima soothene nave onnavarerya soolakelela soothene sa muupuwelo. Wakhala wi woomwaavya, owo onahaala wiisooneiha wa weyo, nyenya wakhala wi woomuhiya, owo onahaala wookhooca okhala wookhala.
10 Vano, osuwele wi Yehova ohoothanla wi oteke empa ntoko nipuro naweela. Olipe murima nave opacerye muteko.”
11 Voocharela, Tavite aamunnya mwanawe yoochariha ya oteka empa ya apoco, mapuro ookawanyiwa oohiyanahiyana, ophitaanyerya mapuro a okhapelelamo, mapuro ookawanyiwa oosulu, isaala sa mpuwa, nnipuro nookawanyiwa weiwo yaakhalawo etampha ya oleveleliwa* soocheka.
12 Owo aamunnyererya yoochariha ya ichu soothene owo aakhenleiye moorweela wa oveereliwa,* vooloca sa mayate a empa ya Yehova, mapuro oothene a olyamo, mapuro a muhakhu a empa ya Muluku eeparipari ni mapuro a muhakhu a ichu seiho seelihiwa.*
13 Nave tho, aamunnyererya sooleeliherya vooloca sa makhuuru a alipa a mukucho ni Alevi, vooloca sa miteko soothene siiwanana ni muteko wa empa ya Yehova ni vooloca sa ikaruma soothene saaphariheliwa mmuteko wa empa ya Yehova.
14 Owo, aaloca sa ohokola wa ooru, ooru ntakhara ikaruma soothene saaphariheliwa mmiteko soohiyanahiyana, ohokola wa ikaruma soothene sa eparata, ni ikaruma soothene saaphariheliwa mmiteko soohiyanahiyana.
15 Nave tho, ohokola wa ipanthi sa ooru ni onyaari aya, epanthi ti epanthi ni onyaari aya; ohokola wa ipanthi sa ooru, epanthi ti epanthi ni onyaari aya mwawiiwanana ni ophariheliwa waya.
16 Ohokola wa ooru ntakhara meesa a ipaau sootheteiwa,* ntakhara meesa ti meesa; ohokola wa eparata ntakhara meesa a eparata;
17 ohokola wa ikaarfu, wa itixela ni wa a xaaru a ooru aphaama; ohokola wa itixela ikhaani sa ooru, etixela ti etixela ekhaani; ni ohokola wa etixela ti etixela ya eparata, ni etixela ti etixela ekhaani.
18 Owo tho, aamunnyererya ooru oorehereryiwa ntakhara altare a sawunkhela ni mooneiho wa ekaaro, ela tiwi akerupi a ooru ehunle makuphelo aya nave emukhuneenle aarka awaataana a Yehova.
19 Tavite aaloca ariki: “Ntata na Yehova naari ni miyo, nave owo ookivaha wiiwexexa wi kirepe yoochariha yoothene ntakhara muteko wa oteka.”
20 Voocharela, Tavite aaloca wa mwanawe Solomoni ariki: “Okhale oolipa murima ni akuru nave opacerye muteko. Ohikhale awoova naari oothanana, woona wi Yehova Muluku, Muluku aka ori ni weyo. Owo harwa oohiya naari woonyanyala nto onahaala okhala ni weyo ophiyerya muteko woothene wa oteka empa ya Yehova okwaaxen’ye.
21 Nave ala makhuuru a alipa a mukucho ni Alevi ntakhara muteko woothene wa empa ya Muluku eeparipari. Weyaano wookhalano anamuteko a mavyakelo wi epakeke muteko ori woothene, vamoha ni asitokweene ni achu oothene yaawo anahaala ocharihaka ohoolela waa.”
Inoota
^ Naari: “empa ya osipihano soocheka.”
^ Mu Ehepiri, “mwa munepa.”
^ Naari: “ichu sooveleeliwa.”
^ Naari: “ipaau sa omvaha Muluku.”
