1 Timotiyu 4:1-16
4 Nyenya masu ooveereliwa* annaloca mookwakwaleya wi elukuluku ya muhoolo akina anamuhiya nroromelo, ethokororyaka masu ooveereliwa oowoka* ni mahusiheryo a masololo
2 moorweela wa wiisootherya wa achu yaawo analoca sawootha nave arino yawuupuxerya-ya-murima yoovya ntoko ni muthipo wooviha.
3 Awo annawatiiha othela nave annaalamulela achu ohilya soolya seiho Muluku opatunxeiye, wi yaale arino nroromelo nave anasuwela eparipari mwawaakhwanela elyeeke emuthamalaka Muluku.
4 Woona wi soothene Muluku opatunxeiye ti saphaama, nave hiyaavo enaphwanela okhoociwa wakhala wi yohaakheliwa ni mathamalelo,
5 ntakhara sinneelihiwa moorweela wa masu a Muluku ni mwa mavekelo.
6 Wakhala wi wohaavahererya anna ikano seiha, onamukhala namuteko aphaama a Kristu Yesu, oolyihiwa ni masu a nroromelo ni mahusiheryo aphaama yaawo onacharaawe moororomeleya.
7 Nyenya okhooce miyaha satheru seiho sihinamucicimiha Muluku, ntoko seiho inalociwa ni athiyana awuuluvala. Nto ekhale yoolakelelaa, wiikhoveleliha omulapa Muluku.
8 Tiwi wiikhoveleliha ovyakiha mwiili ti wamphurelo vakhaani, nto omulapa Muluku ti wamphurelo wa ichu soothene, woona wi yookhalano yoororomeliha ya ekumi yahiihaano ni ekumi enoorwa.
9 Masu ala ari ororomeleya nave annaphwanela weemereryiwa mwawaakhwanela.
10 Ti nthowa nene nnalapaahu mwakuru nave nniilipixeryaahu, ntakhara nnatikitherya ewehereryo ahu mwa Muluku mukumi, yoowo ori Mvuluxa a achu oothene, xaxaxa wa yaale ari ororomeleya.
11 Otitelele ovaha malamulo yaala ni ohusiha ichu seiha.
12 Ohirwe weemererye wi muchu oonyemule wanthowa na okhala mmiravo. Ohiya yeeyo, okhale yootakiherya wa yaale arino nroromelo, mmasu aa, mmeecelo, mu osivela, mu nroromelo, mu weela murima.
13 Ophiyerya kirwiile, otitelele wiikhoveleliha waalakhanya ohoolo wa achu, oceenyerya,* ni ohusiha.
14 Ohinyemule yamahala eri mwa weyo, yeeyo ovahiwaawe moorweela wa masu a miririmu vaavaa nikhuuru na atokweene yookuhenryaaya matata aya.
15 Wuupuweleleke* ichu seiha; wiiveleele ni murima woothene mwa seiha, wi oya waa vahoolo wooniwe mookwakwaleya ni achu oothene.
16 Ilukuluku soothene, wiivareryeleke mukhataa ni mahusiheryo aa. Otitelele mu ichu seiha, woona wi moorweela wa weerano yeela, onarwa wiivuluxa weyo mwaneene ni yaale anoowiriyana.
Inoota
^ Mu Ekriki, “munepa.”
^ Mu Ekriki, “minepa soowoka.”
^ Naari: “olipiha.”
^ Naari: “Othokororyeke.”
