1 Timotiyu 6:1-21
6 Yaale ari va nipisi na okapuro yaavaheke ncicimiho noothene asipwiya aya, wi nihirwe nlociwe moonanara nsina na Muluku ni mahusiheryo awe.
2 Ohiya yeeyoru, yaale arino asipwiya aya oororomela ehaanyemuleke wanthowa na okhala anna. Moohiyana, anaphwanela okhala ooreheryeya waalapa, woona wi yaale anaphura muteko aya waphaama ari oororomela ni oosiveliwa.
Otitelele ohusiha ichu seiha ni ovaha olopola yoola.
3 Wakhala wi muchu onahusiha mahusiheryo makina nave ahineemererya mahusiheryo aphaama* yaawo anarwa mwa Apwiya ahu Yesu Kristu, naari haneemererya ni mahusiheryo ari mwawiiwanana ni omulapa Muluku,
4 owo ori oosareya ni wiirumiha nave haniiwexexa echu. Owo oowaleya muru* nthowa na ovaanya ni waakhulana vooloca sa masu. Ichu seiha sinnakumiherya nrima, owanawana, wootha,* waanyiheryana moonanara,
5 ni onyakulihana ohinamala vooloca sa miyaha mikhaani. Achu annaakanyeryeya mmuruni mwaya yaakiha eparipari, yuupuwelaka wi omulapa Muluku maroca anaruuha mphurelo.
6 Mweeparipari, wookhalavo mphurelo mutokweene mu omulapa Muluku ni waakhwaneliwa.*
7 Tiwi nivolowaka mweelaponi hinruuhale echu, naari mano hinnakuxamo echu naakhumakamo.
8 Mwawiihiiha, nakhalano yoolya* ni soowara,* nnahaala ohakalala* ni ichu seiho.
9 Nyenya yaale ari oolakelela okhala a muhakhu annamorela mu saweeha, mmuraakhoni ni mu soochunachuna sincipale soololo ni sootakhala, seiho inaaneeliha achu wootoloxiwani ni woopahuwani.
10 Ntakhara osivela ikhorowa mutathaari wa ichu soothesene sootakhala, nave akina, mu wiilipixerya waavya osivela yoola, aahuwelihiwa mu nroromelo nave yiiruuhela aneene* soohooxa sincipale.
11 Nto weyo muchu a Muluku, ochawe ichu seiha. Nyenya wiilipixerye waavya wookololowa, omulapa Muluku, nroromelo, osivela, ovilela, ni wiichacala.
12 Owane ekhoco yaphaama ya nroromelo; opharexa ekumi yoohimala yeeyo wiichaneliwaawe ni olokonhaawe mwaphaama vanlakani vene variyari va anamoona ancipale.
13 Vamiithoni va Muluku, yoowo onakhapelela ikumi sa ichu soothene, ni wa Kristu Yesu, ntoko namoona, olokonhe mwaphaama vanlakani vene vamiithoni va Pontiyu Pilatu, miyo kinnoolamulela
14 wi wiiwelele nlamulo ni murima woohicheka ni oohikhalano nthowa ophiyerya wooneya wa Apwiya ahu Yesu Kristu.
15 Oohakalala ni Ooweryaxa mmoharu, onarwa ooniha ncicimiho nawe mu elukuluku yoophwanelela. Owo ti Mwene wa yaale analamulela ntoko mamwene ni Pwiya wa yaale analamulela ntoko asipwiya,
16 ti yooworu ohinakhwa, onakhala mu waarya wootutha ohinaacameleya; haavo muchu ontonko omoona naari onawerya omoona. Wa yoowo avahiwe ncicimiho ni ikuru soohimala. Aamen.
17 Waaleeliherye* yaawo ari a muhakhu mmukhalelo wa ichu wa mutano* wi ehikhale awiikusererya,* nave ehikuhe ewehereryo aya mmuhakhu woohiroromeleya, nto wa Muluku, yoowo onanivaha mwawaacaxa ichu soothene seiho inanihakalaliha.
18 Waaleele wi yeereke saphaama, ereele ni miteko sooreera, ekhale oovaha moohakalala, yaakaweleke akina yeeyo aryaayano,
19 yiithukumanyeryeke muhakhu woororomeleya ni waphaama wa waakhaviherya mmahiku anoorwa, yeerano hiiha, anahaala opharaxa ekumi yeeparipari.
20 Timotiyu, okhapelele yeeyo wunnyereriwaawe, orapele masu a siiyo ahiniiwanana ni yeeyo eri yaweela ni ovaanyihana watheru oniichaniwa “miruku.”
21 Moorweela wa wiicocopa ni miruku seiho, akina yaahuwela mu nroromelo.
Mahala matokweene ekhale ni weyo.
Inoota
^ Naari: “ookumi; amphurelo.”
^ Naari: “onniiceliwa mmuupuwelo.”
^ Naari: “masu oonyemula.”
^ Mu Ekriki, “waakhwaneliwa ni yeeyo nryaahuno.”
^ Naari: “yawiikhaviheryano.”
^ Naari: “nipuro na okhalavo.” Mu Ekriki, “empa.”
^ Naari: “waakhwaneliwa.”
^ Naari: “yiihoma aneene ni.”
^ Naari: “waalamulele.”
^ Naari: “elukuluku yeela.” Moone Masu Atharihiwe.
^ Naari: “awiirumiha.”
