1 Yohani 5:1-21
5 Oothene yoole oneemererya wi Yesu ti Kristu oyariwe wa Muluku, nave oothene yoole onamusivela mulipa ooyara onnamusivela tho yoole oyariwe ni yoowo.
2 Mwa ela ninnasuwela wi ninnaasivela anamwane a Muluku, vaavaa nnamusivelaahu Muluku ni ochariha malamulo awe.
3 Tiwi, osivela wa* Muluku onataphulela ela: Wiiwelela malamulo awe, nave malamulo awe hanalimela,
4 woona wi oothene yoole oyariwe* wa Muluku onnavootha elapo, ovootha yoowo onavootha elapo tuula: Nroromelo nahu.
5 Taani onawerya ovootha elapo? Apwanne hii yoole onaroromela wi Yesu ti Mwaana a Muluku?
6 Yesu Kristu ti yoola orwiile mwa maahi nnikhami, ohiya pahiru ni maahi, nyenya ni maahi vamoha nnikhami. Nave munepa onneerela onamoona, ntakhara munepa ti eparipari.
7 Tiwi, sookhalavo ichu raru ineerela onamoona:
8 Munepa, maahi, nnikhami; nave ichu seiha raru sinneemereryana.
9 Waakhanle wi ninneemererya onamoona wa achu, onamoona wa Muluku ti otokweene. Ntakhara onamoona Muluku ovanheiye tuula: Onamoona owo ovanheiye vooloca sa Mwanawe.
10 Muchu onatikitherya nroromelo mwa Mwaana a Muluku ookhalano onamoona mwa yoowo mwaneene. Muchu yoowo ohirino nroromelo wa Muluku onamweera owo mulipa a wootha, vawi owo hanatikitherya nroromelo nawe mu onamoona Muluku onavaheiye vooloca sa Mwanawe.
11 Nave onamoona ene tuula: Muluku oonivaha okumi woohimala, nave okumi ene yoola ori mwa Mwanawe.
12 Yoowo orino Mwaana, ookhalano okumi yoola; yoowo ohikhanleno Mwaana a Muluku haanono okumi yoola.
13 Kinnoorepelaani ichu seiha wi musuwele wi mookhalano okumi woohimala. Yeenyu mutikithenrye nroromelo nanyu mu nsina na Mwaana a Muluku.
14 Nave ororomela yoowo* nryaahuno mwa yoowo tuula: Moohipwacha yeeyo nnavekaahu mwawiiwanana ni yookhwela awe, owo onnaniiwa.
15 Nave waakhanle wi noosuwela wi owo onnaniiwa moohipwacha yeeyo nnavekaahu, noosuwela wi nnamukhalano ichu seiho nivenkaahu, woona wi nimveke yoowo.
16 Wakhala wi muchu oomoona munnawe apakaka yoocheka ehinakeriha wookhwani, owo onarwa amveka Muluku nave Muluku onammuvaha okumi muchu yoowo, aa, wa yaawo ahipanke yoocheka enakeriha wookhwani. Yookhala yoocheka enakeriha wookhwani. Tahi yoocheka yeela kinalocaaka wi owo onaphwanela ovekela.
17 Ohookololowa woothene ti yoocheka, nyenya yookhala yoocheka ehinakeriha wookhwani.
18 Noosuwela wi oothene yoole oyariwe wa Muluku hanapaka yoocheka, nyenya yoole oyariwe wa Muluku* onnamulipelela yoowo, nave mwiicani hanawerya omphara.*
19 Noosuwela wi nrwenle wa Muluku, nyenya elapo yoothene enavareryeliwa* ni mulipa oonanara owo.
20 Nyenya noosuwela wi Mwaana a Muluku oorwa, nave oonivaha wiiwexexa wi nikhaleno masuwelelo a yoole ori eeparipari. Nave hiyaano nri mwawiiwanana ni yoole ori eeparipari, moorweela wa Mwanawe, Yesu Kristu. Yoowo tori Muluku eeparipari ni okumi woohimala.
21 Anamwane oosiveliwa, musepe soophwaniherya.
Inoota
^ Naari: “omusivela.”
^ Mu Ekriki, “soothene seiyo iyariwe.”
^ Naari: “oloca moohoovelela.”
^ Ela tiwi, Yesu Kristu, Mwaana a Muluku.
^ Naari: “hanamutannyaru.”
^ Naari: “enahooleliwa.”
