2 Akorintu 4:1-18
4 Mwawiihiiha, woona wi nookhalano muteko ola moorweela wa ikharari nimoreliwaahu, hinnavelavela.*
2 Nyenya hiyaano nookhooca ichu sawuuliha muru, seiho ineeriwa wiiphiini, nave hiinneeca moowoka naari waakanyerya masu a Muluku; nto nsuwelihaka eparipari, ninniiseemererya wa yawuupuxerya-ya-murima yoothene ya achu vamiithoni va Muluku.
3 Chiryene, waakhanle wi michaka saphaama nnalaleeryaahu sookhuneeliwa ni ekuwo, iho inakhuneeliwa wa yaale anarimeela.
4 Wa yaala, muluku a mukhalelo yoola wa ichu* ooruuhela evaasi muupuwelo wa oohiroromela, wi ekamaama ya* michaka saphaama soocicimiheya vooloca sa Kristu, yoowo ori eruku ya Muluku, ehimwaleele wa yaawo.
5 Tiwi, hannalaleerya vooloca sa hiyo aneene, nyenya vooloca sa Yesu Kristu ntoko Apwiya, nave vooloca sa hiyo aneene ntoko akapuro anyu wa nthowa na Yesu.
6 Ntakhara ti Muluku yoowo aalonce ariki: “Omwaleela waaryeke weepiphini,” nave owo onnamwaleela mirima sahu, wi amwaleele iho ni masuwelelo oocicimiheya a Muluku moorweela wa ethoi ya Kristu.
7 Nto nookhalano muhakhu ola mu ipiya* sa oloko, wi owerya woopwahaxa okhale wa Muluku nave ohiya wawihu.
8 Ninnakacamiheya mmikhalelo soothene, nto ohiya awuumaanyeya ophiyerya nihinawerya wiitannya; ninnakhala oohaleeliheya, nto tahi wi hinnakhalano vachu voochawelavo;*
9 ninniikariwa, nto hinnanyanyaliwa; ninnuuwihiwa, nto hinnatoloxiwa.
10 Mahiku oothene ninnavilelano okhwa mmwiilini mwahu yoowo Yesu ohooxen’yeiyeno, wi okumi wa Yesu wooneye tho mmwiilini mwahu.
11 Vawi hiyo nri akumi, mahiku oothene ninnahoolela okhwa wa nthowa na Yesu, wi okumi wa Yesu wooneye tho mmwiili ahu onakhwa.
12 Mwawiihiiha, okhwa onalapa mwa hiyo, nto okumi mwa nyuwo.
13 Vano woona wi nookhalano munepa mmohamoha wa nroromelo vooloca sa yeeyo erempwe: “Miyaano kohooniherya nroromelo, mwa yeeyo kooloca”; hiyaano tho ninnooniherya nroromelo nave mwa yeeyo ninnaloca,
14 nsuwelaka wi yoole omviihale Yesu onahaala tho oniviiha vamoha ni Yesu, nave onahaala oniperekha vamoha ni nyuwo.
15 Tiwi, ichu soothene iha ineereya wa nthowa nanyu, wi mahala matokweene yaaceereryeyeke woona wi achu ancipale annavaha mathamalelo ntakhara ncicimiho na Muluku.
16 Mwawiihiiha, hinnavelavela;* nto naamwi nlelo omuchu ahu wa vaate wuuluvalaka ni oceecheya, omuchu ahu wa mpuwa onnarehereryiwa nihiku nnihiku.
17 Tiwi, naamwi ohooxeya ori wa elukuluku vakhaani* ni wooveya, onnakumiha wa hiyo ncicimiho nenlo nri ntokweene noopwahaxa* nave nri noohimala;
18 ntitelelaka otikitherya miitho ahu ohiya mu ichu sawooneya, nto mu ichu soohooneya. Ntakhara ichu sawooneya hisinalekela, nyenya ichu soohooneya ti soohimala.
Inoota
^ Naari: “hinnavolola; hinnakookela muculi.”
^ Naari: “elukuluku yeela.” Moone Masu Atharihiwe.
^ Naari: “omwaleela wa.”
^ Mu Ekriki, “ivaasu.”
^ Naari akhweya: “ohiya nihirino ewehereryo.”
^ Naari: “hinnavolola; hinnakookela muculi.”
^ Naari: “yaweeha eri ya elukuluku vakhaani.”
^ Naari: “nnalimela opwaha-opwaha”
