Liivuru Anaawiili a Matharihelo 12:1-16
12 Vaavaa olamulelo wa Rehopowamu waatikitheren’yaaya nave owo akhala oolipa, aanyanyala Nlamulo na Yehova, nave Isarayeli oothene aaheerano emohamoha.
2 Woona wi yaakhala oohiroromeleya wa Yehova, Sisaki mwene o Yikuputu, aarwa wi awane ni Yerusalemu mu eyaakha yaneethanu ya mwene Rehopowamu.
3 Owo aakhalano ikaaro sakhoco ncikhwi nimoha ni masana meeli,* alipa ooweeciha akavalo macikhwi makhumi mathanu nammoha* ni anakhoco oohaalakhanyeya yaarwiile o Yikuputu, Aliipiya, Asikita, ni Aetiyopi.
4 Owo aakusa ipooma soolipihiwa so Yuta nave vookuchula vaya aaphiya o Yerusalemu.
5 Mulipa a miririmu Semaiya aaya wa Rehopowamu ni wa asitokweene o Yuta yaawo yaathukumanne o Yerusalemu wa nthowa na Sisaki, nave aloca ni yaawo ariki: “Yehova ooloca ariki: ‘Nyuwaano mookinyanyala, wa nthowa na yeeyo miyaano tho kinamoonyanyalaani mmatani mwa Sisaki.’”
6 Mwa yeeyo, asitokweene a Isarayeli ni mwene yaahiiyeviha nave eloca: “Yehova tawookololowa.”
7 Vaavaa Yehova oonneiye wi awo yaahiiyeviha, Yehova aarumiha masu ala wa Semaiya: “Awo ahiiyeviha. Nkaatoloxa, nto kinahaala owoopola moohilekela. Nkiyeeherya esara aka o Yerusalemu moorweela wa Sisaki.
8 Nto awo anahaala okhala anamuteko awe, wi esuwele ohiyana orivovo variyari va okilapela miyo ni waalapela mamwene a ilapo ikina.”
9 Mwawiihiiha, Sisaki mwene o Yikuputu aahirwa owana ni Yerusalemu. Owo aahikusa muhakhu wa empa ya Yehova ni muhakhu wa empa ya mwene.* Aahikusa soothene, ophitaanyerya iyaakiho sa ooru seiho Solomoni aapankeiye.
10 Mwa yeeyo, mwene Rehopowamu aapaka iyaakiho sa muchove wi araceeliheno nave aahaannya ahooleli a alipeleli,* yaawo yaalipelela vamulako wa empa ya mwene.
11 Ikwaha soothene mwene aayeiye o empa ya Yehova, alipeleli yaanavolowa eteenxe iyaakiho nave voocharela yaanakookiherya va esaala ya alipeleli.
12 Woona wi mwene aahiiyeviha, esara ya Yehova yaakupha, nave owo haatolonxe moomalela. Ohiya yeeyoru, nlelo saakhalawo ichu ikina saphaama o Yuta.
13 Mwene Rehopowamu aalipiha olamulelo awe o Yerusalemu nave aatitelela olamulela. Rehopowamu aarino iyaakha makhumi maxexe namoha vaavaa aakhanleiye mwene. Nave aalamulela mu iyaakha khumi nathanu napiili* o Yerusalemu epooma yeeyo Yehova aathanlileiye variyari va mahimo oothene a Isarayeli ntoko nipuro wi akuhewo nsina nawe. Nsina na amama awe mwene, neeriwa Naama, o Amoni.
14 Nto owo aaheera yeeyo yaari yoonanara, woona wi haalakelenle mmurimani mwawe omwaavya Yehova.
15 Vooloca sa yaweereya ya Rehopowamu, ovinyerya woopaceryani ophiyerya wookuchulani, apwanne herempwale mu soorepela sa Semaiya mulipa a miririmu, ni Itu mulipa awoona, mmukhalelo wa orepeliwa makholo? Nave ilukuluku soothene saakhalavo ikhoco variyari va Rehopowamu ni Yeropowamu.
16 Voocharela, Rehopowamu aahiichuuwa ni makholo awe ni avithiwa mu epooma ya Tavite; nave mwanawe Apiya, aakhala mwene mu nipuro nawe.
