Liivuru Anaawiili a Matharihelo 2:1-18
-
Marehereryo a otekiwa wa empa ya Muluku (1-18)
2 Vano, Solomoni aalamulela wi etekiwe empa ntakhara nsina na Yehova ni empa* ntakhara omwene awe.
2 Solomoni aahaarepela alopwana macikhwi makhumi mathanu nameeli* ntoko anamuteko* vyakala, alopwana macikhwi makhumi mathanu namararu* ntoko alipa ookwasa maluku o mwaako, ni ahooleli macikhwi mararu ni masana mathanu nammoha* wi yaavareryeleke.
3 Mwawiihiiha, Solomoni aarumiha michaka wa Iramu mwene o Tiru, ariki: “Ntoko mwaaweerenlaanyu apapa aka Tavite vaavaa mwaarumihenlaanyu miri sa seetru wi eteke empa* wi enakhalamo, mweereno tho emohamoha wa miyo.”
4 Vano, kinateka empa ntakhara nsina na Yehova Muluku aka, wi keelihe wa yoowo, opahamo sawunkhela vamiithoni vawe, nave tho oveleelaka ipaau sootheteiwa moohihiyererya ni mikucho soopahiwa, woosiiselo ni osekuwa, mmahiku a Sapata, mu miyeeri mivyaani ni mu ilukuluku sa ifesta sa Yehova Muluku ahu. Ela ti yeeyo Isarayeli olamuleliweiye okhala wookhala.
5 Empa kinayaaka oteka enaya okhala etokweene, woona wi Muluku ahu ti mutokweene waapwaha amiluku oothene akina.
6 Nave taani onahaala owerya omutekela empa? Woona wi irimu, erimu ya irimu hanaakhwanawo, vano miyaano kaani wi kimutekele empa, voohikhala nipuro na opahavo mikucho vamiithoni vawe?
7 Vano mukirumihele mulopwana oohana yoowo orino mavyakelo mmuteko wa ooru, eparata, muchove, muthipo, oxalo wa rooxa, oxalo woophilivila, ni oxalo waasuuli, nave yoowo onasuwelano opaka iruku. Owo onahaala olapaka o Yuta ni o Yerusalemu ni alipa oohana aka, yaawo apapa aka Tavite aathanlilaaya.
8 Nave tho, mukirumihele miri sa seetru, sa xuniperu, sa santalu so Lipanu, woona wi miyaano koosuwela wi anamuteko anyu aakhalano mavyakelo a wuuha miri sa Lipanu. Anamuteko aka anahaala olapaka ni anamuteko anyu,
9 wi erehererye miri mincipale, woona wi empa kinayaaka oteka eni ekhale etokweene ni yootikhiniha.
10 Kinahaala waavahereryaka anamuteko anyu yoolya, alipa ookwasa miri yaawo eni enuuha miri: Ikooru* macikhwi makhumi meeli* sa tiriku, ikooru macikhwi makhumi meeli* sa sevata, ipaatu* macikhwi makhumi meeli* sa eviinyu, ni ipaatu macikhwi makhumi meeli* sa makhurwa.”
11 Mwa yeeyo, Iramu mwene o Tiru aarumiha muchaka ola wa Solomoni: “Woona wi Yehova onnaasivela achu awe, owo oheeriha wi mukhale mwene aya.”
12 Voocharela Iramu aaloca ariki: “Acicimihiwe Yehova Muluku a Isarayeli, yoowo opanke erimu ni elapo ya vathi, woona wi omvaha mwene Tavite mwaana a mwaamulopwana, yoowo orino masuwelelo ni miruku, onahaala oteka empa ntakhara Yehova ni empa ntakhara omwene awe.
13 Vano, kinnamurumiha Iramu-api mulipa oohana a mavyakelo ni awiiwexexa,
14 mwaana a muthiyana awiichaniwa Tanita, nto apapaawe to Tiru; owo ookhalano mavyakelo mmuteko wa ooru, eparata, muchove, muthipo, maluku, miri, oxalo wa rooxa, oxalo waasuuli, ekuwo yoovyavyaala, ni oxalo woophilivila. Owo onanweryaka olapa muteko wa opaka iruku ni muteko ori woothene oneereiye avahiwe. Owo onahaala olapaka ni alipa oohana anyu a mavyakelo ni alipa oohana a mavyakelo a apwiya aka Tavite apapa anyu.
15 Vano pwiya aka, mmurumihe tiriku, sevata, makhurwa, ni eviinyu wa anamuteko aka seiho muroromelinhaanyu.
16 Hiyaano nnahaala wuuha miri so Lipanu sawaaca ntoko munachunaanyu, nave nnahaala oruuha nivirihaka mphareya ophiyerya o Xopa; nave nyuwaano munahaala okuxa mukerihaka o Yerusalemu.”
17 Solomoni aahaakontaara alopwana oothene yaari anamarwa mu elapo ya Isarayeli, hiihaa ntoko Tavite, apapa awe yenraaya, nave waaca waya yaari ncikhwi nimoha makhumi mathanu ni macikhwi mararu ni masana mathanu nammoha.*
18 Mwawiihiiha, mwa yaawo aahaathanla anamuteko* vyakala macikhwi makhumi mathanu nameeli,* ntoko alipa ookwasa maluku o mwaako macikhwi makhumi mathanu namararu,* nave ntoko ahooleli macikhwi mararu ni masana makhumi mathanu nammoha* wi yaarumeke achu olapa muteko.
Inoota
^ Naari: “yoomwene.”
^ 70.000.
^ Naari: “alipa ooteexa.”
^ 80.000.
^ 3.600.
^ Naari: “yoomwene.”
^ 20.000.
^ 20.000.
^ 20.000.
^ Epaatu emoha enaakhwana iliituru 22. Mmoone apentise 2.14.
^ 20.000.
^ Ekooru emoha enaakhwana iliituru 220. Mmoone apentise 2.14.
^ 153.600.
^ Naari: “alipa ooteexa.”
^ 70.000.
^ 80.000.
^ 3.600.
