Liivuru Anaawiili a Matharihelo 20:1-37
20 Ohoolo waya, Amowape, Amoni, vamoha ni akina a Amonimi,* yaarwa wi ewane ni Yehosafati.
2 Mwawiihiiha, Yehosafati aaleeliwa wi: “Muloko muncipale woorwa wi owane ni nyuwo makupa a ephareya,* o Etomi nave awo ari o Hasasoni-tamari, ela tiwi, Enketi.”
3 Mwa yeeyo, Yehosafati aahoova nave aalakelela omwaavya* Yehova. Hiihaa, aalokoha wiinanela olya o Yuta woothewene.
4 Nave achu o Yuta yaathukumana wi emukohe Yehova; yaarwiile mu ipooma soothene so Yuta wi emukohe Yehova.
5 Voocharela Yehosafati aaheemela variyari va muloko wo Yuta ni Yerusalemu, mu empa ya Yehova va n’yate nivyaani,
6 nave aloca ariki:
“Khwoo Yehova Muluku a makholo ahu, apwanne hamuri Muluku a wirimu, nave hamuri oowerya opwaha olamulelo woothene wa maloko? Mu ntata nanyu wookhalamo ikuru ni owerya, nave haavo onawerya weemela wi awane ni nyuwo.
7 Khwoo Muluku ahu, tahi nyuwo nwiikanremo achu mu elapo yeela vamiithoni va nloko nanyu Isarayeli, nave himwaavanhe eyo wi ekhale elapo ya muyareriwo* wa nthamwene anyu Aparahamu okhala wookhala?
8 Awo ahiitikitherya mwemmo nave etekamo nipuro naweela ntakhara nsina nanyu, elocaka:
9 ‘Wakhala wi sooniphacuwela ipahu, nsipaaca, othoriha woohiphwanelela, epahu naari etala, neemele variyari va empa yeela ni vamiithoni vanyu (vawi nsina nanyu nri mu empa yeela) nave nikhuwele wa nyuwo nivekaka nikhaviheryo mu wuukhuwa wahu, nyuwaano nwiriyane nave munivuluse.’
10 Ala ari va alopwana o Amoni, o Mowape ni a makupa o mwaako wo Seiri, yaawo mwahaaweemerenryaanyu wi Isarayeli aatoloxe vaavaa aakhumeiye elapo yo Yikuputu. Isarayeli aavira makupa makina nave haatolonxe.
11 Vano awo ananchuwela moorweela wa oniikara mu elapo anyu, yeeyo munivanhaanyu ntoko yoohiyeryiwa.
12 Khwoo Muluku ahu, apwanne himwaathoriha yaawo? Vawi hinnawerya weera echu variyari va muloko yoola mutokweene onanrweela. Noohaleela yaweera, nto miitho ahu anaweha wa nyuwo.”
13 Mu elukuluku ene yeeyo, alopwana oothene o Yuta yaarimweemela vamiithoni va Yehova, vamoha ni asaaraya ni anaaya* ophitaanyerya makwiya.
14 Voocharela, veeri va muloko, munepa wa Yehova waamurweela Yahasiyeli, mwaana a Sakariya, mwaana Penaiya, mwaana a Xeyeli, mwaana a Mataniya, Mulevi a anamwane a Asafe.
15 Owo aaloca ariki: “Nwiriyane Ayuta oothene ni nyuwo mmanke o Yerusalemu vamoha ni mwene Yehosafati! Yehova ooloca ariki: ‘Muhikhale awoova naari okhala oohaleeliheya wa nthowa na muloko ola muncipale, woona wi ekhoco tahi yawinyu, nto ti ya Muluku.
16 Omeelo mukhuruwe wi mwawaneno. Awo anahaala owela moorweela wa ovira o Sisi, nave nyuwaano munahaala waaphwanya omakuchuwelo wa mpopa ohoolo wa ntakhwa no Xeruweli.
17 Nyuwaano himunaphwanela owana mu ekhoco yeela. Mukhale mmakupa anyu, mweemele nave moone ovuluxa wa Yehova ntakhara nyuwo.* Weyo Yuta ni Yerusalemu, muhikhale awoova naari okhala oohaleeliheya. Omeelo mukhume wi mwakumane ni yaawo, nave Yehova onahaala okhala ni nyuwo.’”
18 Mwawaakuveya, Yehosafati aakokhora athipenle eyuuci vathi, nave Ayuta oothene ni achu oothene o Yerusalemu yaakokhora vamiithoni va Yehova wi emulapele Yehova.
19 Voocharela, Alevi yaawo yaari a muyareriwo wa Akowatita ni wa Akoraita yaavinya wi emucicimihe Yehova, Muluku a Isarayeli, ni masu oovuwaxa.
20 Mmeeloni mwaya, yaavinya wooxiixelo nave ecimula eyaaka ntakhwa no Tekowa. Vaavaa yaacimulaaya, Yehosafati aaheemela nave aloca: “Nwiriyane nyuwo Yuta ni achu mmanke o Yerusalemu! Mukhaleno nroromelo mwa Yehova Muluku anyu, wi nwerye okhala awiithipela.* Mukhaleno nroromelo wa alipa a miririmu awe nave nyuwo munarwa mukhumelela phaama.”
21 Amanle waakoha achu, owo aahaathanla alopwana wi emwiipeleke Yehova ni omvaha ncicimiho erino soowara saweela, eyaaka ohoolo wa alopwana yaarino ikaruma sakhoco, eriki: “Mmuthamalele Yehova, woona wi osivela wawe woororomeleya onniikhalelaru okhala wookhala.”
22 Vaavaa yaapacenryaaya wiipa macipo oocicimiha moohakalala, Yehova aahiwiipithela alopwana o Amoni, o Mowape ni a makupa a mwaako wo Seiri yaawo yaamuchoowela Yuta, nave awo yaahiiphana mukina ni mukhwaawe.
23 Amoni ni Amowape yaaya owana ni achu a makupa o mwaako wo Seiri wi yaatoloxe ni waamaliha; vaavaa yaamalinhaaya waatoloxa achu o Seiri, yaapacerya wiiphana yaawo-yaawo.
24 Vaavaa Ayuta yaaphin’yaaya o muconco wa alipeleli wootakhwani, yaawoona anakhoco oothene ekhwile nave haavo aakophonle.
25 Mwawiihiiha, Yehosafati ni achu awe yaaya okuxa ichu. Yaaphwanyawo ichu saphaama, soowara, ikaruma sasisapo seiho yaakunxaaya wa achu yaakhwile ophiyerya ehinawerya tho oteexa. Yaamaliha mahiku mararu wi ekuxe ichu seihe woona wi saatepa okhalawo ichu sincipale.
26 Mu nihiku naneexexe yaathukumana o mpopa* wo Peraka, nave weiwo yaamucicimiha* Yehova. Ti nthowa nene yaachunwaaya nipuro nenle mpopa wo Peraka,* ntoko nsuweliwaaya ophiyerya olelo.
27 Mwawiihiiha, alopwana oothene o Yuta ni o Yerusalemu, vamoha ni Yehosafati ari ohoolo, yaakookela o Yerusalemu ehakalanle woona wi Yehova aaweeriha okhala oohakalala wa nthowa na ovoothiwa amwiicani aya.
28 Hiihaa, awo yaaphiya o Yerusalemu erinono ikaruma sa mikoyi, achakare ni mapeca nave yaaya o empa ya Yehova.
29 Omwene woothene wa ilapo waanamoova Muluku vaavaa waasuwenlaaya wi Yehova aawana ni amwiicani a Isarayeli.
30 Mwa yeeyo, omwene wa Yehosafati waakhala mmureceleni, nave Muluku awe aatitelela omvaha wiichuuwa wa amwiicani oothene oorukurerya.
31 Yehosafati aatitelela olamulela o Yuta. Owo aarino iyaakha makhumi mararu nathanu vaava aakhanleiye mwene nave aalamulela iyaakha makhumi meeli nathanu o Yerusalemu. Amama awe yiichaniwa Asupa, mwaana amwaamuthiyana a Sili.
32 Owo aaneeca mu ephiro ya Asa apapa awe. Owo haahin’yeru, nave aaneera yeeyo yaari yaphaama vamiithoni va Yehova.
33 Nto mapuro oocukhuwa hiyaamwaryiwe, nave achu nlelo hiyaareherenrye murima aya wi emwaavye Muluku a makholo aya.
34 Saweereya sikina sa Yehosafati, ovinyerya woopaceryani ophiyerya wookuchulani, irempwe mu soorepela sa Xewu, mwaana a Hanani, seiho iphitaanyeryiwe mu liivuru a mamwene o Isarayeli.
35 Vahoolo vaya, Yehosafati mwene o Yuta, aapaka onthamwene ni Akasiya mwene o Isarayeli yoowo aapaka ichu soonanara.
36 Mwawiihiiha, awo yaapaka onthamwene mmuteko wa waapaka apophoro yaaya o Tarsi, nave yaahaapaka apophoro o Esiyomi-keperi.
37 Mwa yeeyo, Eliyeseri mwaana a Totavawu, o Maresa, aaloca mwa miririmu wa Yehosafati ariki: “Woona wi nyuwaano moopaka onthamwene ni Akasiya, Yehova onahaala omwarya miteko sanyu.” Mwa yeeyo, apophoro yaaphweeya nave hiyaawenrye ophiya o Tarsi.
Inoota
^ Naari akhweya: “Ameonimi.”
^ Woonaru enaahiwa ephareya yookhwa.
^ Mu Ehepiri, “aakuha ethoi awe wa.”
^ Mu Ehepiri, “mmiso.”
^ Mu Ehepiri, “anaaya aasilopwana.”
^ Naari: “moone mukhalelo Yehova oneereiye oovuluxeeni.”
^ Naari: “oovilela.”
^ Naari: “va mureyareya.”
^ Mu Ehepiri, “yaamvuwiha.”
^ Nnataphulela “mareeliho.”
