Liivuru Anaawiili a Matharihelo 23:1-21
23 Mu eyaakha yaneethanu napiili, Yehoyata aaheeravo echu moolipa murima nave aapaka waataana* ni ahooleli a nikhuuru nsana, awiichaniwa Asariya mwaana a Yehoramu, Isimayeli mwaana a Yehowana, Asariya mwaana a Opeti, Maseiya mwaana a Ataiya ni Elisafati mwaana a Sikiri.
2 Voocharela, awo yaaheeceeca o Yuta nave yaathukumanya Alevi a ipooma soothene so Yuta, vamoha ni ahooleli a ichoko sa Isarayeli. Vaavaa yaaphin’yaaya o Yerusalemu,
3 muloko woothene waapaka nlakano ni mwene o empa ya Muluku eeparipari, nave voocharela Yehoyata aaloca ariki:
“Onani! Mwaana a mwene onahaala olamulelaka, hiiha ntoko Yehova aaroromelinheiye vooloca sa anamwane a Tavite.
4 Ela ti yeeyo munaphwanelaanyu weera: nikhuuru nimoha wa makhuuru mararu a alipa a mukucho ni Alevi yaawo enahaala orumeelaka mu nihiku na Sapata, enahaala olapaka ntoko alipeleli a milako;
5 nikhuuru nikina wa makhuuru mararu nnahaala okhalaka mu empa ya mwene,* nave nikhuuru nikina wa makhuuru mararu nnahaala okhalaka vamulako wa mathipelo; nave achu oothene enahaala okhala mmayateni a empa ya Yehova.
6 Muhimweemererye muchu ovolowa mu empa ya Yehova, voohikhala alipa a mukucho ni Alevi yaawo analapa. Awo enanwerya ovolowa woona wi nikhuuru naweela, nave achu oothene enahaala waakhwaniherya murici aya ntakhara Yehova.
7 Alevi anaphwanela omuricaka mwene, mmoha ti mmoha apharenle mavaka awe mmatani. Yoowo oni avolowe mpa onahaala wiiphiwa. Mukhaleke ni mwene ori woothewene oneereiye ayeekewo.”*
8 Alevi ni Ayuta oothene yaaheera yeeyo Yehoyata, mulipa a mukucho, aalamulenleiye. Mwawiihiiha, mmoha ti mmoha aahaathukumanya alopwana awe yaawo yaalapa mu nihiku na Sapata, vamoha ni yaawo yiichuuwa nihiku na Sapata, ntakhara Yehoyata, mulipa a mukucho, eera ahaalenle wi epwaheke.
9 Voocharela, Yehoyata, mulipa a mukucho, aahiwinnya mavaka ahooleli a nikhuuru nsana, iyaakiho ikhaani* ni iyaakiho soovilikana seiho saari sa mwene Tavite nave saari mu empa ya Muluku eeparipari.
10 Nave aahaakuha alopwana oothene mmapuro aya, mmoha ti mmoha apharenle nivaka nawe* mmatani, ovinyerya omoono woolopwana wa empa ophiyerya omoono woothiyana wa empa, ohoolo wa altare ni wa empa, emurukurenrye mwene.
11 Voocharela awo yaamukumiherya vaate mwaana a mwene, enwariha korowa ni Onamoona,* nave emweera mwene; nave Yehoyata ni anamwane awe yaammiinela makhurwa vamuru. Voocharela yaaloca eriki: “Ekumi ya amwene elekele!”
12 Vaavaa Ataliya iiwaleiye onyakula wa achu echimakaka nave emucicimihaka mwene, mwawaakuveya owo aaya waariwo achu mu empa ya Yehova.
13 Voocharela, owo aamoona mwene eemenle ohoolo wa poco awe, vamulako. Asitokweene ni alipa awoopa mapeca yaari ni mwene; achu oothene a ilapo yaanahakalala nave yaanoopa mapeca, alipa awiipa ni ikaruma saya sawiipano yaanahoolela* macipo omvuwihano. Mwa yeeyo, Ataliya aahaahula yoowara awe nave akhuwela: “Koovaaneleliwa! Koovaaneleliwa!”
14 Nto Yehoyata, mulipa amukucho aahaarumiha ahooleli a nikhuuru nsana, asitokweene a anakhoco, ariki: “Mumviihevo veeri va anakhoco, nave yoowo oni akhale mmakupa awe mmwiiphe ni nlema!” Woona wi mulipa a mukucho aaloca ariki: “Muhimwiiphele mpuwa mwa empa ya Yehova.”
15 Mwawiihiiha, awo yaahimphara yoowo, nave vaavaa yaaphin’yaayano vamukhora wa Mulako wa Akavalo mu empa ya mwene,* mwawaakuveya awo yaahimwiiphela vaavale.
16 Voocharela, Yehoyata aahipaka nlakano variyari va yene ni achu oothene vamoha ni mwene, wi awo yaahaala otitelela okhala achu a Yehova.
17 Emanle weereya yeela achu oothene yaaya o empa ya* Pala nave ekumula; emmwarya altare aya ni iruku saya nave emwiipha Mathani, mulipa a mukucho a Pala, ohoolo wa a altare.
18 Voocharela, Yehoyata aahaavahererya murici wa ovareryela empa ya Yehova alipa a mukucho ni Alevi, yaawo Tavite aareherenryeiye mmakhuuru wi erumeeleke mu empa ya Yehova, evahaka mikucho soopahiwa ntakhara Yehova, ntoko erempwaaya mu Nlamulo na Mose ni ohakalala vamoha ni macipo, mwawiiwanana ni ohoolela wa* Tavite.
19 Owo tho, aahaakuhamo alipeleli a mikhora mmilakoni sa empa ya Yehova, wi ahivolowe moohisuwela muchu ooripiheya.
20 Vano owo aahaathukumanya ahooleli a nikhuuru nsana, achu oocicimiheya, alamuleli a nloko ni achu oothene a elapo nave awo yaamuhoola mwene ekhuruwaka o empa ya Yehova. Voocharela awo yaavira o mulako mutokweene eyaaka o empa ya mwene* nave emukiraatiha mwene vamunyukhuni woomwene.
21 Mwawiihiiha, achu oothene a elapo yaahakalala nave epooma yaakhala mmureceleni, woona wi Ataliya ahiiphiwa ni nlema.
Inoota
^ Naari: “nlakano.”
^ Naari: “empa yoomwene.”
^ Mu Ehepiri, “vaavaa owo onakhumeiye ni vaavaa owo onavoloweiye.”
^ Naari: “iproke,” iyaakiho ikhaani seiho wiiliwiili saaphariheliwa ni alipa oovonya munra.
^ Naari: “munra awe.”
^ Woonaru eroolu waaphwanyeyamo nlamulo na Muluku.
^ Naari: “yaanavaha eneneeryo ya.”
^ Naari: “empa yoomwene.”
^ Naari: “empa ya muluku.”
^ Mu Ehepiri, “moorweela wa mata a.”
^ Naari: “empa yoomwene.”
