Liivuru Anaawiili a Matharihelo 3:1-17
3 Voocharela Solomoni aahipacerya oteka empa ya Yehova o Yerusalemu o mwaako Moriya, weiwo Yehova oonen’yeiyewo wa apapa awe, Tavite, mu nipuro nenlo Tavite aareherenryeiye mu nipuro nawiipichavo na Ornani, Muyepusi.
2 Owo aahipacerya oteka mu nihiku nanawiili na mweeri wanaawiili, mu eyaakha ya neesese ya olamulelo awe.
3 Nave mathipelo yaawo Solomoni aapankeiye wi ateke empa ya Muluku eeparipari yaarino ikoovatu makhumi mathanu a orekama waya ni ikoovatu makhumi meeli oruku aya, mwawiiwanana ni miphimo sakhalai.*
4 Nipithela na ohoolo wa empa naarino mannuwelo mamohamoha a empa:* Ikoovatu makhumi meeli nave orakama waya waari wa nsana nimoha ni makhumi meeli;* nave owo aahuruwela ni ooru aphaama.
5 Owo aaxirya ni mapawa a xuniperu esaala etokweene, ahuruwela ni ooru aphaama nave voocharela areeriha ni mayale vamoha ni ikurenti.
6 Ohiya yeeyoru, owo aahela empa maluku ooreera asisapo; nave ooru owo aampharihenleiye aari o Parvayimi.
7 Owo aahuruwela empa ni ooru: Ipatho, isoleira, ixiri, ni masele; nave mu ixiri owo aarepamo iruku sa akerupi.
8 Nave owo aapaka nipuro nikina Naweelaxa;* orekama waya waalikana ni oruku wa empa, ikoovatu makhumi meeli, ni oruku aya tho waari ikoovatu makhumi meeli. Owo aahuruwela ni italentu* masana mathanu nammoha sa ooru oorehereryiwa
9 Ohokola wa ooru a ipereko saari isiikulu* makhumi mathanu; nave tho owo aahuruwela ni ooru mapuro makina oosulu.
10 Voocharela, mu nipuro nikina Naweelaxa* owo aahipaka iruku piili sa akerupi, nave aahaahuruwela ni ooru.
11 Orekama wa makuphelo a akerupi yaari ikoovatu makhumi meeli; nikuphelo nimoha na kerupi oopacerya naarino ikoovatu thanu nave naanakhumula* exiri ya empa, nave nikuphelo nikina naarino ikoovatu thanu nave naanakhumula makuphelo a kerupi mukina.
12 Nikuphelo nimoha na kerupi mukina naarino ikoovatu thanu nave naanakhumula exiri ekina ya empa; nave nikuphelo nikina naarino ikoovatu thanu nave naanakhumula makuphelo a kerupi oopacerya.
13 Makuphelo a akerupi yaala yaahookowa ophiyerya ikoovatu makhumi meeli; nave awo yaaheemela ithoi saya iwehaka mpuwa.*
14 Owo tho aapaka ekurtina ya oxalo waasuuli, oxalo wa rooxa, oxalo woophilivila ni ekuwo yoovyavyaala, nave arepavo iruku sa akerupi.
15 Voocharela owo aahaapaka apoco eeli ohoolo wa empa, a ikoovatu makhumi mathanu orekama waya, nave osulu waya wa poco ti poco aarino ikoovatu thanu.
16 Owo aahipaka ikurenti mmukhalelo wa ekolaare nave aahela osulu wa apoco, nave aahipaka sawiima sa romaa ahela mu ikurenti.
17 Owo aaweemesa apoco ohoolo wa empa ya Muluku, mmoha omoono woolopwana* mukina omoono woothiyana*; a moono woolopwana aamuchuwa ni nsina Xakimi* ni a moono woothiyana aamuchuwa ni nsina Powasi.*
Inoota
^ Ekoovatu emoha yaanaakhwana asentimeetru 44.6, nyenya akina anoona wi “miphimo sakhalai,” inaahiwa ikoovatu soorekama seiho saakhwana asentimeeturu 51.8. Mmoone apentise 2.14.
^ Naari: “naarino ikoovatu makhumi meeli sa orekama nenlo naalikana ni mannuwelo a empa.”
^ 120. Mphimo ene hosuweliwe phaama.
^ Mu Ehepiri, “empa.”
^ Etalentu emoha enaakhwana ikiilu 34.2. Mmoone apentise 2.14.
^ Esiikulu emoha enaakhwana ikrama 11.4. Mmoone apentise 2.14.
^ Mu Ehepiri, “empa.”
^ Naari: “naanakhoma.”
^ Ela tiwi, enwehaka Aweela.
^ Naari: “ohico.”
^ Naari: “omoko.”
^ Enataphulela “Owo [ela tiwi, Yehova] atikitherye.”
^ Naari akhweya: “nnataphulela moolipa.”
