Liivuru Anaawiili a Matharihelo 30:1-27
-
Esekiya onnampaka paska (1-27)
30 Esekiya aarumiha muchaka wa Isarayeli oothene ni Yuta, nave ophiyerya wi aahaarepela ekaarata achu a mahimo a Efraimu ni a Manase, wi erwe o empa ya Yehova o Yerusalemu wi emulye Paska ntakhara Yehova Muluku a Isarayeli.
2 Nyenya, mwene, asitokweene awe ni muloko woothene wo Yerusalemu waahilakelela omulya Paska mu mweeri wanaawiili,
3 ntakhara hiyaawenrye omulya Paska mu elukuluku yaakhovelenlaaya, woona wi hiyaarivo alipa a mukucho awaakhwanela yiiseelinhe naari mano muloko hiwaathukumanne o Yerusalemu.
4 Yoolakelela yeela yaahooneya okhala yoophwanelela vamiithoni va mwene ni va muloko woothene.
5 Mwawiihiiha, awo yaahilakelela opaka yoolokoha o Isarayeli woothewene, ovinyerya o Persepa ophiyerya o Tani, wi muloko waaphwanela orwa ni omulya Paska a Yehova, Muluku a Isarayeli, o Yerusalemu, vawi ntoko nikhuuru awo hiyaawenrye omulya mwawiiwanana ni yeeyo yaarempwe.
6 Voocharela, anamichaka* ekunse ikaarata sa mwene ni asitokweene awe yaaheeceeca o Isarayeli woothewene ni o Yuta, mwawiiwanana ni yeeyo mwene aalamulenleiye, ariki: “Achu nyu a Isarayeli, mukookele wa Yehova, Muluku a Aparahamu, a Isaki ni a Isarayeli, wi yene aakookele oohalela yaawo akophonle mmatani mwa mwene o Siriya.
7 Muhikhale ntoko makholo anyu ni asinninyu yaawo yaari oohiroromeleya wa Yehova, Muluku a makholo aya. Mwawiihiiha, owo aahaaruuhela epahu hiiha ntoko nyuwo munoonaanyu.
8 Muhikhale a ciyamaaru ntoko makholo anyu. Mmwiiweleleke Yehova nave murwe mu nipuro nawe naweela, nenlo eelinheiye okhala wookhala, nave mmurumeele Yehova, Muluku anyu, wi esara awe yoovarela evinyavo wa nyuwo.
9 Asinninyu ni anamwane anyu anamukhalihiwa mwa ikharari ni yaale yaaphanre nave munamweemereriwa okookela mu elapo yeela woona wi Yehova Muluku anyu, taniphwanya* ni aikharari nave hoohiyaani wakhala wi mookookela wa yoowo.”
10 Mwawiihiiha, anamichaka* yaahiya mu epooma ti epooma eviraka mu ilapo so Efraimu ni so Manase, nave yaahiphiya o Sepuloni, nto achu yaanaatheya ni waaroha yaawo.
11 Nyenya, achu akina a nihimo na Aseri, na Manase ni na Sepuloni yaahiiyeviha nave yaahirwa o Yerusalemu.
12 Ntata na Muluku eeparipari naari tho o Yuta wi naathukumanye,* wi yaakhwaniherye yeeyo mwene ni Asitokweene yaalamulenlaaya, mwawiiwanana ni masu a Yehova.
13 Mu mweeri wanaawiili, muloko waathukumana o Yerusalemu wi olye efesta ya ipaau soohiheliwa yooruruvaliha; waari muloko mutokweene.
14 Awo yaapacerya waamwarya a altare yaari o Yerusalemu, nave yaahaamwarya a altare oothene a sawunkhela yaavonyerya ompopa wo Kiteroni.
15 Voocharela, yaahiipha inama sa mukucho wa Paska mu nihiku naneekhumi naxexe na mweeri wanaawiili. Alipa a mukucho ni Alevi yaahuuliheya muru, ophiyerya yiiseeliha nave eruuha soovaha soopahiwa o empa ya Yehova.
16 Yaapacerya olapa muteko mmapuro aya, mwawiiwanana ni Nlamulo na Mose, muchu a Muluku eeparipari. Voocharela, alipa a mukucho yaamiserya nikhami yaakhenlaaya ni Alevi.
17 Yaakhalamo achu ancipale mmulokoni yaawo yahiiseelinhe, nave Alevi yaahinnyereriwa muteko wawiipha inama sa mukucho sa Paska ntakhara oothene yaale yaari ooriipiheya, wi yeelihiwe ntakhara Yehova.
18 Tiwi, achu ancipale xaxaxa a nihimo na Efraimu, na Manase, na Isakari ni na Sepuloni, hiyaawiiseelinhe, nto naamwi hiiha yaamulya Paska, evirikanyaka yeeyo yaarempwe. Nyenya, Esekiya aahaavekelela yaawo, ariki: “Yehova yoowo ari aphaama aalevelele
19 oothene yaawo areherenrye murima aya wi emwaavye Muluku eeparipari, Yehova, Muluku a makholo aya, naamwi yahiiseelinhe mwawiiwanana ni meerelo a wiiseeliha.”
20 Nave Yehova aahinwiriyana Esekiya, aalevelela* achu.
21 Mwawiihiiha, Aisarayeli yaawo yaari o Yerusalemu yaahilya efesta ya ipaau soohiheliwa yooruruvaliha mmahiku mathanu nameeli ni ohakalala otokweene. Nave Alevi ni alipa a mukucho yaanamucicimiha Yehova mahiku oothene, yoopaka moovuwa ikaruma saya soovuwa ntakhara Yehova.
22 Ohiya yeeyoru, Esekiya aahaalipiha Alevi oothene yaawo yaamurumeela Yehova mwa miruku. Nave yaalya efesta variyari va mahiku mathanu nameeli, evaha mikucho sa waataana nave yaamuthamalela Yehova, Muluku a makholo aya.
23 Voocharela, muloko woothene waalakelela olya efesta mmahiku makina mathanu nameeli; hiiha, yaalya efesta mmahiku makina mathanu nameeli moohakalala.
24 Esekiya, mwene o Yuta aavahererya imope ncikhwi nimoha* ni ipucepuche macikhwi mathanu nameeli* ntakhara muloko, nave asitokweene yaavahererya imope ncikhwi* nimoha ni ipucepuche macikhwi khumi* ntakhara muloko; anamukucho ancipale yaamwiiseeliha.
25 Nave muloko woothene wo Yuta, alipa a mukucho, Alevi, muloko woothene waarwiile o Isarayeli ni anamarwa yaawo yaarwiile elapo yo Isarayeli ni yaale yaakhala o Yuta, yaanatitelela ohakalala.
26 Nave waakhalawo ohakalala otokweene o Yerusalemu, woona wi ovinyerya mmahiku a Solomoni mwaana a Tavite, mwene o Isarayeli, hiyantonko weereya echu si yeela o Yerusalemu.
27 Vookuchula, anamukucho yaari Alevi yaahivinya yaareeliha achu; Muluku aahiiwa nsu naya nave mavekelo aya yaaphiya va nipuro nawe naweela, wirimu.
Inoota
^ Mu Ehepiri, “alipa oochimaka.”
^ Naari: “tamahala.”
^ Mu Ehepiri, “alipa oochimaka.”
^ Mu Ehepiri, “ni yoolakelela ya waavaha murima mmoha.”
^ Mu Ehepiri, “aapenuxa.”
^ 1.000.
^ 7.000.
^ 1.000.
^ 10.000.
