Liivuru Anaawiili a Matharihelo 31:1-21
31 Yaamalinhaaya soothene seiha, Aisarayeli oothene yaari vaavale yaahiya mu ipooma so Yuta yaanyaanya apoco aweeliheya,* ekwasanya miri saweeliheya nave emwarya mapuro oocukhuwa aweeliheya ni a altare o Yuta woothewene ni o Penxami, nave tho o Efraimu ni o Manase, ophiyerya enyaannye soothene. Ohoolo waya Aisarayeli oothene yaakookela mu ipooma saya, mmoha ti mmoha mu emaca awe.
2 Voocharela, Esekiya aahaathanla alipa amukucho mmakhuuru aya ni Alevi mmakhuuru aya, mmoha ti mmoha a alipa a mukucho ni Alevi mmitekoni mwaya, wi yapake soovaha soopahiwa ni mikucho sawaataana. Nave yarumeele ni ovaha mathamalelo ni ncicimiho mmilako sa mayate* a Yehova.
3 Makupa a muhakhu wa mwene waanavahiwa ntakhara sooveleela soopahiwa, ophitaanyerya soovaha sa woosiiselo ni sa osekuwa, nave soovaha soopahiwa sa nihiku na Sapata, na miyeeri mivyaani, ni sa efesta, mwawiiwanana ni yeeyo yaarempwe mu Nlamulo na Yehova.
4 Ohiya yeeyo, owo aahaalamulela achu yaakhala o Yerusalemu wi evaheke makupa yaaphwanela alipa a mukucho ni Alevi wi awo eweryeke omaliha elukuluku ni Nlamulo na Yehova.
5 Vaavaa nlamulo nla naatikitheryiwaaya, Aisarayeli yaahiruuha soolya soopacerya sawaacaxa, viinyu muvyaani, makhurwa, enuwi ni sawiima soothene sa mmacani; yaahiruuha mwawaaca makupa aneekhumi a ichu soothene.
6 Nave nloko na Isarayeli ni na Yuta nenlo naakhala mu ipooma so Yuta naaruuha tho makupa aneekhumi a imope ni sa ipucepuche, nave makupa aneekhumi a ichu saweelihiwa, seiho seelihiwe ntakhara Yehova, Muluku aya. Awo yaahiruuha nave yuukela mmapuro mancipale.
7 Mu mweeri waneeraru awo yaapacerya wuukela sooveleela nave ekwaaxa mu mweeri waneethanu napiili.
8 Vaavaa Esekiya ni asitokweene yaaphin’yaaya, yoona ichu seiha suukeliwe, yaamucicimiha Yehova nave ereeliha nloko nawe Isarayeli.
9 Esekiya aahaakoha alipa a mukucho ni Alevi vooloca sa ichu seiha suukeliwe,
10 nave Asariya, muhooleli a alipa mukucho, a empa ya Satoki, aahaakhula: “Ovinyerya elukuluku yaapacenryaaya oruuha sooveleela mu empa ya Yehova, achu annalya ophiyerya ovona nave nlelo sinahala sincipale, woona wi Yehova onnaareeliha achu awe. Nave sinnahala iha sincipale.”
11 Mwawiihiiha, Esekiya aahaalamulela wi erehererye mapuro ookhapelelamo* mu empa ya Yehova, nave awo yaarehererya.
12 Sooveleela, makupa aneekhumi* ni ichu saweelihiwa saanaruuhiwa moororomeleya; Konaniya, Mulevi, aahithanliwa ntoko muhooleli a ichu soothene seiha nave Simei, munnawe, aari muhooleli aamucharela.
13 Xeiyeli, Asasiya, Nati, Asayeli, Yeremoti, Yosapati, Eliyeli, Isimakiya, Mati ni Penaiya yaari akhaviheryi a Konaniya ni Simei, munnawe, moorweela wa nlamulo na mwene Esekiya; nave Asariya aari muhooleli a empa ya Muluku eeparipari.
14 Nave Kore, mwaana a Imina Mulevi, aakhala vamulako makupa onakhumawo nsuwa, aahinnyereryiwa murici wa sooveleela soolakelela ntakhara Muluku eeparipari; owo aanakawa sooveleela saapakiwa wa Yehova ni ichu saweelaxa.
15 Moorweela wa ohoolela wawe, mu ipooma sa alipa a mukucho, aakhalavo Eteni, Miniyamini, Yesuwa, Semaiya, Amariya ni Sekaniya awo yaahinnyereriwa murici wa okawiha ichu seiho ehihiyaninhe wa asinnaya mmakhuuru, wa atokweene ni wa akhaani.
16 Ohiya yeeyo, yaanaakawela tho alopwana yaawo yaarwa nihiku ti nihiku orumeela mu empa ya Yehova ni ophara miteko mmakhuuru aya. Orepeliwa wa makholo aya, yaaphitaanyerya anamwane aasilopwana ovinyerya a iyaakha raru oya ohoolo.
17 Orepeliwa wa makholo a alipa a mukucho weeriwano mwawiiwanana ni imusi sa makholo aya, hiiha ntoko wa Alevi ovinyerya a iyaakha makhumi meeli oya osulu, mwawiiwanana ni miteko sa makhuuru aya.
18 Orepeliwa wa makholo a Alevi yaaphitaanyerya asaaraya oothene, anaaya aasilopwana ni aasithiyana ophiyerya tho anamwane, muloko aya woothene, woona wi awo yaanatitelela wiiseeliha wa yeeyo yaari yaweela wa nthowa na murici yinnyereryiwaaya.
19 Waakhalavo tho muyareriwo wa Aroni, alipa a mukucho yaawo yaakhala mmapuro oolyihamo muhuwo orukurerya ipooma saya. Mu ipooma soothene. Alopwana yaanathanliwa moorweela wa masina wi yaavaheke mapuro alopwana oothene a emusi ya alipa mukucho ni oothene yaaphitaanyeryiwe mu orepeliwa wa makholo a Alevi.
20 Esekiya aaheerano yeeyo o Yuteya woothewene, nave aatitelela weera yeeyo yaari yaphaama ni yawookololowa ni okhala oororomeleya vamiithoni va Yehova, Muluku awe.
21 Nave muteko woothene owo eenreiye wi amurumeele* Muluku awe, muteko wa empa ya Muluku eeparipari, naari vooloca sa nlamulo ni ekano, owo aaheerano ni murima woothene, nave aakhumelela phaama.
Inoota
^ Moone Masu Atharihiwe.
^ Mu Ehepiri, “mapuro awiichuuwamo.”
^ Naari: “mapuro oolyamo.”
^ Naari: “yaneekhumi.”
^ Naari: “amwaavye.”
