Liivuru Anaawiili a Matharihelo 5:1-14
5 Mwawiihiiha, Solomoni aamaliha muteko woothene aapakeiye ntakhara empa ya Yehova. Voocharela, Solomoni aaruuha ichu seiho Tavite, apapa awe yeelinhaaya, nave aakuha eparata, ooru, ni ikaruma soothene mmuhakhu wa empa ya Muluku eeparipari.
2 Mu elukuluku yeele, Solomoni aahaathukumanya asitokweene oothene o Isarayeli, ahooleli oothene a mahimo ni ahooleli a imusi sa makholo so Isarayeli. Awo yaarwa wi emukuxe arka awaataana a Yehova mu Epooma ya Tavite, ela tiwi, o Siyoni.
3 Alopwana oothene a Isarayeli yaathukumana vamiithoni va mwene mu efesta* yeeyo yaapakiwe mu mweeri waneethanu napiili.
4 Mwawiihiiha, asitokweene oothene a Isarayeli yaarwa, nave Alevi yaamviiha Arka.
5 Awo yaamuteexa Arka, muxakala wa muthukumano, ni ikaruma soothene saweela saari mmuxakalani. Alipa a mukucho ni Alevi* yaateesa seiho.
6 Mwene Solomoni ni muloko woothene wa Isarayeli yoowo waathukumanne ni yoowo waari vakhiviru va Arka. Mwawiihiiha, ipucepuche ni imope sawaaca saahipakiwa mikucho seiho sahaawenrye okontaariwa.
7 Voocharela, alipa amukucho yaamukuxa arka awaataana a Yehova emukuha mu nipuro nawe, mpuwa mwa nipuro nikina na mpuwa na empa, Nipuro Naweelaxa, emukuha vathi va makuphelo a akerupi.
8 Mwawiihiiha, makuphelo a akerupi yaahookowa ophiyerya mu nipuro aareiyevo Arka; mwa yeeyo, akerupi yaanamukhuneela Arka ni ikopo sawe.
9 Ikopo saari soorekama ophiyerya wi inooneya wa Aweela, ohoolo wa nipuro nikina na mpuwa; nyenya hisaawerya wooneya mpuwa. Nave ikopo iho iri vaavaa ophiyerya olelo.
10 Mpuwa mwa Arka hiwaarimo echu nyenya ithaapwa piili seiho Mose aahenleiyemo o Horepi, vaavaa Yehova aapankeiye waataana ni nloko na Isarayeli ekhumaka o Yikuputu.
11 Vaavaa alipa amukucho yaakhummaaya mu nipuro naweela (alipa a mukucho oothene yaaphin’ye, yaahiiseeliha, moohipwacha nikhuuru naya),
12 Alevi oothene yaawo yaari alipa a wiipa, yaawo yaari a Asafi, a Hemani, a Yetutumi, anaaya ni asinnaya yaawanre ikuwo soovyavyaala, yaapharenle apankwe, ikaruma sa mikoyi, ni achakare; awo yaari makupa onakhumawo nsuwa a altare; vamoha ni yaawo yaakhalavo alipa a mukucho nsana nimoha ni makhumi meeli* yiipa mapeca.
13 Mu elukuluku yeeyo, alipa a wiipa mapeca ni alipa awiipa yaanamucicimiha ni omuthamalela Yehova vamoha. Nave oruma wa mapeca, apankwe, ni ikaruma sa macipo, waaniiweya vaavaa awo yaamucicimihaaya Yehova, “woona wi owo taphaama; osivela wawe woororomeleya onniikhalelaru okhala wookhala.” Nave voocharela neeku naasareya mu empa, mu empa ya Yehova.
14 Alipa amukucho hiyaawenrye okhala mummo elapaka muteko aya nthowa na neeku, woona wi ncicimiho na Yehova naasareya mu empa ya Muluku eeparipari.
