Ahepri 11:1-40
11 Nroromelo ti olekecheya weeparipari wa yeeyo enawehereryiwa, yawooniherya yeeparipari ya ichu seiho ihinooneya.
2 Moorweela wa nenlo, achu a ilukuluku sakhalai* yaaheereliwa onamoona.
3 Ni nroromelo, ninnasuwela wi mukhalelo wa ichu waarehereryiwa* moorweela wa masu a Muluku, wi yeeyo enooneya yaarwiile wa ichu seiho sihinooneya.
4 Ni nroromelo, Apele aaveleela wa Muluku mukucho wa esisapo etokweene opwaha wa Kayini. Moorweela wa nroromelo nenlo owo aahaakhela onamoona wi aari awookololowa, woona wi Muluku aaheemererya* soovaha sawe nave naamwi akhwile, owo nlelo onnaloca moorweela wa nroromelo nawe.
5 Ni nroromelo, Enoki aathaamihiwa wi ahoone okhwa, nave owo haaphwanyiwe ochu okina ntakhara Muluku aamuthaamiha; ahaakumve othaamihiwa aaheereliwa onamoona wi aahimuhakalaliha Muluku.
6 Ohiya yeeyo, voohikhalano nroromelo honaweryeya omuhakalaliha Muluku, tiwi yoole onamwaacamela Muluku onaphwanela weemererya wi owo ookhala nave wi onnaachuwela yaale anamwaavya mweeparipari.
7 Ni nroromelo, Nowa amanle waakhela olopola wa Muluku wa ichu seiho nlelo sahooniwe, aahooniherya omoova Muluku nave aamuteka mwaaceya wi avuluxe emusi awe; moorweela wa nroromelo nenla, owo aathoriha elapo nave owo aakhala mukelampa a ekhaikhai enarweela mwa nroromelo.
8 Ni nroromelo, Aparahamu vaavaa iichaniweiye, aahiiwelela moorweela wa ocimula ayaaka nipuro nenlo aayeiye waakhela ntoko yoohiyeryiwa; owo aacimula naamwi ahisuwelaka weiwo aayeiyewo.
9 Ni nroromelo, owo aahikhala ntoko namarwa mu elapo yeeyo aaroromelihiweiye, ntoko muleco akhalaka mmisakalani vamoha ni Isaki ni Yakopo; alopwana yaala vamoha ni yoowo yaahaakhela yoororomeliha emohamoha.
10 Woona wi owo aanawehererya epooma erino mathipelo eeparipari, yeeyo erempwe ni etekiwe ti Muluku.
11 Ni nroromelo tho, Sara aahaakhela ikuru wi amurupale mwaana,* naamwi saavinre iyaakha sawe sa oyara,* woona wi owo aanamweera oororomeleya yoowo aapanke yoororomeliha.
12 Wa nthowa na yeela, moorweela wa muchu mmoha yoowo aari ntoko ookhweene, yaayariwa anamwane, awaacaxa ntoko itheneeri sa wirimu nave oohaalakhanyeya ntoko ehaava ya ophareya.
13 Oothene yaala akhwile ni nroromelo, naamwi yahaakhenle ichu yaaroromelihiwaaya; nto awo yaahoona ocaicai nave yaahaakhela moohakalala ni elokoha vanlakani wi awo yaari anamarwa ni aleco mu elapo yeele.
14 Yaawo analoca hiiha annooniherya wi annaavya mweeparipari nipuro wa yaawo meekhaaya.
15 Nyenya, waakhanle wi aatitelela wuupuwela nipuro nenlo yaavinnyaayawo, yaanwerya okookelawo.
16 Nto eparipari ti yawi achu yaala anaavya ophwanya nipuro naphaamaxa, ela tiwi, nipuro noorweela wirimu. Mwawiihiiha, Muluku hanuuliwa muru ni yaawo, wiichaniwa Muluku aya, vawi oorehererya epooma wa yaawo.
17 Ni nroromelo, Aparahamu vaavaa eehiweiye, waari ntoko aamveleela Isaki ntoko mukucho; Aparahamu, yoowo aakhenle moohakalala soororomeliha aaheererya omvaha mwanawe mmoharu
18 naamwi aaleeliwe wi: “Yoowo oni iichaniwe muyareriwo* aa, oni arwe moorweela wa Isaki.”
19 Nyenya owo aaroromela wi Muluku aanwerya omviiha Isaki mwa alipa ookhwa nave owo aamwaakhela Isaki mookhwani mmukhalelo woosiphela.
20 Ni nroromelo tho, Isaki aamureeliha Yakopo ni Esawu vooloca sa ichu sa muhoolo.
21 Ni nroromelo, Yakopo ahalaka vakhaani okhwa, owo aahimureeliha mmoha ti mmoha a anamwane a Yosefe nave owo aamulapela Muluku vaavaa iixeenryeiye ni ekopo awe.
22 Ni nroromelo, Yosefe ahalaka okhwa, aaloca sa mukwaha wa anamwane a Isarayeli nave owo aavaha malakiheryo* vooloca sa makhuva awe.*
23 Ni nroromelo, Mose ayariwe, aacukucheriwa ti alipa oomuyara ophiyerya miyeeri miraru ntakhara yaahoona wi mwaana aari ooreera nave hiyomve nlamulo na mwene.
24 Ni nroromelo, Mose innunweiye, aakhooca wiichaniwa mwaana a mwaana a mwaamuthiyana a Farawo,
25 athanlaka ohooxiwa vamoha ni achu a Muluku ohiya opuha wa elukuluku vakhaani wa yoocheka,
26 ntakhara aanoona onyemuliwa wa Kristu ntoko muhakhu mutokweene opwaha ole wo Yikuputu, vawi aanawehererya ni murima woothene waakhela mareeliho.*
27 Ni nroromelo, owo aakhuma o Yikuputu ahoomve esara ya mwene, aatitelela ovilela ntoko aamoona yoole ori oohooneya.
28 Ni nroromelo, owo aampaka Paska nave aacikichela nikhami, wi mulipa ootoloxa ahiwiiphe* anamwane aya oopacerya oyariwa.
29 Ni nroromelo, achu yaalapuwa Eniya Yooxeerya ntoko va echaya yawuuma, nyenya, vaavaa Ayikuputu yeerenryaaya weerano emohamoha awo yaamiryiwa ni eniya.
30 Ni nroromelo, ixiri so Yeriko saakurumuwa achu emanle weeca moorukurerya mahiku mathanu nameeli.
31 Ni nroromelo, Rahapi, yoowo aari capaheya, haakhwile vamoha ni yaale yaari oohiiwelela, ntakhara aawaakhela alipa oohocela mwa murecele.
32 Nave echu taani ekina kinahaalaaka oloca? Tiwi hiyaahaala okihalela elukuluku wi kiloce tho sa Kiteyoni, Paraki, Sansawu, Yefite, Tavite, hiiha ntoko Samuwele ni alipa a miririmu akina.
33 Ni nroromelo, awo yaahaavootha mamwene, yaatikitherya ekhaikhai, yaakhela soororomeliha, yaawala iyano sa amwaco,
34 yaaxipiha owerya wa mooro, yaachawa nlema naweetha, mu oceecheya yaaheeriwa akuru, yaari awuupa okhoconi, yaahaavootha amwiicani.
35 Athiyana yaawaakhela achu aya yaavinya wuukhwani, nto achu akina yaahooxiwa ntakhara hiyeemerenrye otaphuliwa moorweela wa woopoliwa okina, wi yaakhele oviihiwa mookhwani waphaamaxa.
36 Aa, akina yaahaakhela weehiwa waya moorweela wa onyemuliwa ni owaxuliwa; chiryene, opwaha yeeyo, moorweela wa omakiwa ni mithipo ni owaleliwa mukariposo.
37 Awo yaavonyiwa maluku, yaaheehiwa, ekwasanyiwa eriyari, yaahiiphiwa ni nlema, yaaneeca ewanre ixapala sa ipucepuche ni sa ipuri, yaanathoiwa, yaanahooxiwa, woonihiwa ekoi;
38 nave elapo hiyaari yoophwanelela wa yaawo. Awo yaanahuwahuwa* mutakhwani, mmiyaakoni, mmikotini ni mmakhukuni.
39 Nyenya oothene yaala, naamwi yeereliwe onamoona waphaama wa nthowa na nroromelo naya, hiyonne waakhwanela wa yoororomeliha,
40 ntakhara Muluku aahoona woosiilo ene echu yaphaama wa hiyo, wi awo eheeriwe oophaameya nihiri vamoha.
Inoota
^ Naari: “makholo ahu.”
^ Naari: “ilukuluku saarehereryiwa.” Moone Masu Atharihiwe.
^ Naari: “aaheerela onamoona.”
^ Naari: “muyareriwo.” Mu Ekriki, “mmiso.”
^ Naari: “naamwi uuluvanle.”
^ Mu Ekriki, “mmiso.”
^ Naari: “owo aalamulela.”
^ Naari: “ovithiwa wawe.”
^ Naari: “waakhela nchuwelo.”
^ Mu Ekriki, “ahaatannye.”
^ Naari: “yaaneeceeca.”
