Akolose 1:1-29
1 Miyaano Paulo, murummwa a Kristu Yesu moorweela wa okhwela wa Muluku, vamoha ni Timotiyu, munnihu,
2 wa aweela murima ni anna oororomeleya ari mwawiiwanana ni Kristu ari o Kolose:
Mahala matokweene ni murecele wa Muluku, Atiithi ahu, ekhale ni nyuwo.
3 Mahiku oothene ninnamuthamalela Muluku, Atiithi a Apwiya ahu Yesu Kristu, vaavaa nnavekelaahu ntakhara nyuwo,
4 woona wi nohiiwa sa nroromelo nanyu mwa Kristu Yesu ni osivela yoowo nyuwo muryaanyuno wa aweela murima oothene,
5 wa nthowa na ewehereryo ekhapeleliwe ntakhara nyuwo wirimu. Nyuwo mohiiwa sa ewehereryo yeela moorweela wa muchaka wa eparipari, michaka saphaama
6 seiho iphin’ye wa nyuwo. Hiiha ntoko michaka saphaama inavahaaya sawiima ni waaceereryeya veelaponi yoothene, emohamoha tho enneereya ni nyuwo, ovinyerya nihiku mwiiwalaanyu ni osuwela mwawaakhwanela mahala matokweene eeparipari a Muluku.
7 Ti yeeyo mwaahusenryaanyu wa kapuro mukhwiihu oosiveliwa Epafra, yoowo ori namuteko oororomeleya a Kristu mu nipuro nahu.
8 Owo tho oonileela sa osivela wanyu mmukhalelo woomunepani.*
9 Wa nthowa na yeela tho, ovinyerya nihiku niiwalaahu yeela, hinimaanleru woovekelelaani ni oveka wi musareye masuwelelo awaakhwanela a yookhwela awe mmiruku soothene ni wiiwexexa woomunepani,
10 wi mweeceke mmukhalelo woophwanelela wa Yehova, ni yoolakelela ya omuhakalaliha yoowo, mutitelelaka ovaha sawiima mmiteko soothene saphaama ni waaceereryeya mu masuwelelo awaakhwanela a Muluku.
11 Ninnaveka tho wi nyuwo mukhale oolipihiwa ni owerya woothene, mwawiiwanana ni owerya wawe woocicimiheya, wi nwerye ovilela mwawaakhwanela, moopixa murima ni moohakalala,
12 mwaathamalelaka Atiithi, yaawo aweerinheeni okhala oophwanelela wi muuke mu yoohiyeryiwa ya aweela murima mu omwaleela.
13 Owo oonoopola wa otokweene wa epiiphi ni onthaamiherya mu omwene wa Mwanawe oosiveliwa,
14 mwa yoowo nryaahuno otaphuliwa moorweela wa yawoopola, oleveleliwa wa soocheka sahu.
15 Owo eruku ya Muluku oohooneya, oopacerya oyariwa wa soopatuxiwa soothene;
16 woona wi moorweela mwa yoowo soopatuxiwa ichu soothene ikina wirimu ni veelaponi yavathi, ichu sawooneya ni ichu soohooneya, naari minyukhu, naari olamulelo, naari mamwene, naari otokweene. Ichu soothene ikina ipatuxiwe moorweela mwa yoowo ni wa yoowo.
17 Nave tho, owo aakhala ihaakumve ichu soothene ikina, nave moorweela mwa yoowo ti ikhanlaaya ichu soothene ikina,
18 nave owo ori muru wa mwiili, yoowo ori muloko. Owo ori mapacereryo, oopacerya oyariwa mwa alipa ookhwa, wi akhale yoole ori oopacerya mu ichu soothene;
19 woona wi Muluku aahisiveliwa wi waakhwanela woothene okhaleke mwa mwanawe,
20 nave moorweela wa yoowo, aataanihe ichu soothene ikina wa yoowo mwaneene, ichu sa veelaponi yavathi vamoha ni ichu sa wirimu, atikitheryaka murecele moorweela wa nikhami owo oyenheiye va mwiri woohooxiwavo.*
21 Mweeparipari, nyuwo khalai mwaarakamelana ni Muluku nave mwaari amwiicani awe wa nthowa na otikitherya muupuwelo anyu mu miteko soonanara;
22 nto vano, Muluku ohiisaataaniha ni nyuwo moorweela wa okhwa wa mwiili woomuchu wa mwanawe. Aaheerano yeeyo wi ooperekheeni vamiithoni vawe muri aweela, muhikhanleno nthepa naari nthowa.
23 Mwawiihiiha, nyuwo munaphwanela otitelela mu nroromelo, ootikitheryeya mu mathipelo ni oothipeleya, muhisusihiwe wa ewehereryo ya michaka saphaama mwiiwalaanyu nave ilaleeryiwe wa soopatuxiwa soothene vathi va erimu. Wa michaka saphaama seiha, miyo Paulo, kikhanlaaka namuteko.
24 Vano miyo kinnahakalala wa ichu kinahooxeyaakano wa nthowa nanyu, nave miyo kinnavilela mmwiilini mwaka yeeyo enahalela wa soohooxa sa Kristu, mu nipuro na mwiili awe, ori muloko.
25 Miyo kiri namuteko a muloko yoola mwawiiwanana ni murici kivahiwaaka ni Muluku, ntakhara mphurelo anyu wi mulaleerye mwawaakhwanela masu a Muluku,
26 yoovitheya yaweela yeeyo yaavithiwe ovinyerya mukhalelo wa ichu wa khalai* ni wa makholo* akhalai. Nto vano ennuupululiwa wa aweela awe murima,
27 wa yaawo Muluku aahakalanleiye waasuweliha variyari va maloko muhakhu woocicimiheya wa yoovitheya yaweela. Yoovitheya yaweela ti Kristu ori mwawiiwanana ni nyuwo, ewehereryo ya opaka makupa mu ncicimiho nawe.
28 Ti yoowo nnamulaleyaahu, naalopolaka oothene ni waahusiha oothene mmiruku soothene, wi naaperekhe oothene ntoko achu awaakhwanela mwawiiwanana ni Kristu.
29 Mweeparipari ni yoolakelela yeela, kinnalapa moowetha, kiilipixeryaka ni ikuru sawe, seiho inaphara muteko mwakuruxa mwa miyo.
Inoota
^ Mu Ekriki, “mwa munepa.”
^ Moone Masu Atharihiwe.
^ Naari: “elukuluku yakhalai.” Moone Masu Atharihiwe.
^ Naari: “miyareriwo.”
