Aroma 1:1-32
1 Miyo Paulo, kapuro a Kristu Yesu nave awiichaniwa wi kikhale murummwa, oothanliwa wi kilaleerye michaka saphaama sa Muluku,
2 seiho owo aaroromelinheiye khalai moorweela wa alipa a miririmu awe mu Soorempwa saweela.
3 Michaka vooloca sa Mwanawe, yoowo orwiile mwa muyareriwo* wa Tavite mwa mwiili,
4 nto ni owerya, oheeriwa Mwaana a Muluku mwa munepa waweela, moorweela wa oviihiwa mwa alipa ookhwa (aa, Yesu Kristu Apwiya ahu.
5 Mwa yoowo naakhenlaahu mahala matokweene ni orummwa, wi achu a maloko oothene ekhale awiiwelela moorweela wa nroromelo vooloca sa nsina nawe.
6 Variyari va maloko yaawo nyuwaano tho mwiichaniwaanyumo wi mukhale a Yesu Kristu)
7 wa oothene yaawo anakhala o Roma oosiveliwa a Muluku, awiichaniwa wi ekhale aweela:
Mahala matokweene ni murecele wa Muluku, Atiithi ahu vamoha ni a Apwiya Yesu Kristu ekhale ni nyuwaano.
8 Woopaceryani, kinnamuthamala Muluku aka moorweela wa Yesu Kristu vooloca sa nyuwo oothene, woona wi nroromelo nanyu ninnalociwa elapo yoothene yavathi.
9 Tiwi Muluku, yoowo kinamulapaaka ni murima aka woothene, kilaleeryaka michaka saphaama vooloca sa Mwanawe, tori namoona aka wi ilukuluku soothene kinnooromolaani mmavekeloni mwaka.
10 Kinnavekela wi wakhala wooweryeya nave wakhala wi ela yookhwela ya Muluku, kirwe kooxekuryeeni.
11 Tiwi kinnakhwelaxa owoonaani, wi kookaweleeni yamahala yoomunepani, wi mukhale ootikitheryeya;
12 naari wi, nlipihane mukina ni mukhwaawe moorweela wa nroromelo nahu, nawinyu ni nawaka.
13 Nto nkinachuna wi muhisuwele, anna, wi ikwaha sincipale kaanachuna wooxekuryaani wi kiphwanye tho sawiima mwa nyuwo, hiihaa ntoko mwa maloko makina; nto kaahiiheriwa ophiyerya hiihaano.
14 Kookhalano mankaawu wa Akriki ni wa anamarwa,* wa amiruku ni oohisuwela;
15 mwawiihiiha, kinnachunaxa olaleerya michaka saphaama wa nyuwo tho munakhala o Roma.
16 Tiwi nkinuuliwa muru ni michaka saphaama. Iha chiryene owerya wa Muluku, wi evuluxiwe oothene yaale arino nroromelo, voopacerya wa Ayuta, nave tho wa Akriki.
17 Woona wi mwa seiho wookololowa wa Muluku tonuupululiwaaya moorweela wa nroromelo ekhwaaniheryaka nroromelo; hiihaa ntoko erempwaaya: “Nto awookololowa murima onarwa akhala moorweela wa nroromelo.”
18 Esara ya Muluku ennuupululeya orweela wirimu wa nthowa na onanara woothene ni ohookololowa wa achu yaawo anakhuneela eparipari moohookololowa,
19 ntakhara wi yeeyo enawerya osuweliwa vooloca sa Muluku, ti yawooneya wa yaawo, woona wi Muluku oowooniherya yaawo.
20 Woona wi mikhalelo sawe soohooneya, ela tiwi owerya wawe woohimala ni Omuluku awe, sinnooneya mookwakwaleya ovinyerya opatuxiwa wa elapo, ntakhara sinnasuweliwa moorweela wa ichu sipatuxiwe, mwawiihiiha awo hanawerya ovaanya.
21 Tiwi naamwi emusuwenle Muluku, hanamucicimiha ntoko Muluku, naari omuthamala, nyenya yaari atheru mu sawuupuwelela saya, nave murima aya woohisuwela waariipa.
22 Naamwi yiiseeraka okhala amiruku, awo yaari alolo
23 nave ohiya omucicimiha Muluku yoowo ohinakhwa, awo anacicimiha iruku sa achu yaawo anakhwa, hiihaa ntoko iruku sa ipalame, sa axinama a meco mixexe ni sawaapasa.*
24 Mwawiihiiha, Muluku, mwawiiwanana ni soochuna sa murima aya, ohaaveleelela wa ichu soothanyeya, wi enyemule mwiili aya.
25 Awo aatoroka eparipari ya Muluku ni wootha, nave analapela* soopatuxiwa omuhiya Mpatuxa, yoowo onacicimihiwa okhala wookhala. Aamen.
26 Ti nthowa nene Muluku aavelenleiye wa soochunachuna sa wuuliha muru, athiyana aya aahiya okona ni alopwana enakonihana yaaworu, ekhoocaka makhalelo aya oomuchu.
27 Moolikana tho, alopwana aahiya mapakeliwo aya a okona ni athiyana, nave enaalulana murima mukina ni mukhwaawe, mulopwana ni mulopwana, yeerakano yeeyo eri yawuuliha muru nave yaakhelaka yaawo aneene olaka wawaakhwanela nthowa na soonanara saya.
28 Woona wi awo hiyaachunne omweemererya Muluku,* Muluku aahaaveleelela mmuupuwelo woonanara, wi yeerekeno ichu yahaaphwanelaaya weerano.
29 Nave awo yaari oosareya ni ohookololowa wa mukhalelo woothene, otakhala, ochunaxa okhalano ni onanara murima, oosareya nrima, wiipha, owana, owoka ni oochuna waahooxa akhwaaya, yaari awaapa,
30 awootha, oomwiica Muluku, oophuca, awiikhoma, awiirumiha, awuupuwelela weera ichu soonanara,* oohiwiiwelela yaawo yaayanre,
31 oohiiwexexa, oohiroromeleya mmalakano, oohikhalano osivela wooyariwano, ni ohikhalano ikharari.
32 Naamwi esuwenle phaama ene othoriha wawookololowa wa Muluku, wi yaawo aneerano ichu seiha annaphwanela okhwa, tahi wi pahiru anamutitelela weerano, nyenya tho annaweemererya yaawo aneerano.
Inoota
^ Mu Ekriki, “mmiso.”
^ Naari: “oohikhala Akriki.” Mu Ekriki, “Aparparo.”
^ Naari: “axinama awiipurula.”
^ Naari: “aneepesa.”
^ Naari: “woona wi yaakhooca masuwelelo awaakhwanela a Muluku.”
^ Naari: “oompaka palanu a ichu soonanara.”
