Aroma 12:1-21
12 Anna, woona wi Muluku oowooniheryaani niphwanya nawe, kinnoovekaani wi mveleele mwiili anyu ntoko mukucho mukumi, muteko waweela ni waweemereryeya wa Muluku, mmulapaka yoowo ni mavyakelo anyu awuupuwela.
2 Mmaale wuupiwa ni elapo yeela.* Moohiyana, mweerihe wi Muluku atoroke* mukhalelo anyu wa wuupuwela, wi mweererye meekhiinyu yaphaama, yaweemereryeya ni okhwela wawaakhwanela wa Muluku.
3 Wanthowa na mahala matokweene kivahiwaaka kinnaloca wa mmoha ti mmoha a nyuwo wi ahikhale ani iisuupuweleleke mukhateiye opwaha mummo ori woochuneya wuupuwelela. Nto mmoha ti mmoha a nyuwo uupuweleleke mukhalelo yoowo onooniherya okhala a miruku, mwawiiwanana ni waaca wa nroromelo Muluku omvanheiye.*
4 Tiwi, hiihaa ntoko nryaahuno makupa oohiyanahiyana mmwiili mmoha, tahi wi makupa oothene analapa mmukhalelo mmohamoha;
5 hiihaa tho hiyo, naamwi nri ancipale, nri mwiili mmoha mwawiiwanana ni Kristu, nto mwa meekhiihu nri makupa nnacopaanyeryana mukina ni mukhwaawe.
6 Oothene ahu nookhalano samahala soohiyanahiyana mwawiiwanana ni mahala matokweene nivahiwaahu; mwawiihiiha, wakhala wi nrino yamahala ya olaleerya mwa miririmu, hankooni nlaleerye mwa miririmu mwawiiwanana ni nroromelo nryaahuno;
7 yaari ya orumeela, nirumeeleke;* yoole orino yamahala ya ohusiha, ahusiheke;
8 yoole orino yamahala ya olipiha,* alipiheke;* yoole onavaha,* avaheke ni murima woothene; yoole onahoolela, eerekeno mwa mvai;* yoole onooniherya ikharari, eerekeno moohakalala.
9 Osivela wanyu ohikhale wa wiisootherya. Mwiicanekeno yoonanara; mwaakeeleleke yeeyo eri yaphaama.
10 Ni osivela wa onna, mukhaleno niphwanya mukina ni mukhwaawe. Mukhaleke oopacerya ocicimihana mukina ni mukhwaawe.
11 Mukhaleke oowetha,* ohiya ooporora.* Mukhaleke oolucuwa mwa munepa.* Mulapeke ntoko akapuro a Yehova.
12 Muhakalaleke mu ewehereryo. Mvileleke mu soohooxa. Mutitelele ovekela.
13 Mukawaneke ni aweela murima yeeyo muryaanyuno, mwawiiwanana ni soothowa saya. Mukhaleke oowaakhela aleco.
14 Mwaareeliheke yaale anawiikaraani; mwaareeliheke, ohiya owuulumela.
15 Muhakalaleke ni yaale anahakalala; mwinleke ni yaale aninla.
16 Nwooneke akhwiinyu mmukhalelo mmohamoha ntoko muniisoonaanyu; muhitikitherye muupuwelo anyu mu ichu itokotoko, nto muhooleliweke ni ichu sawiiyeviha. Muhiisooneke okhala amiruku.
17 Muhimukookiheryeke muchu yoonanara ni yoonanara. Muukhuweke weera saphaama vamiithoni* va achu oothene.
18 Wakhala wooweryeya, wa nyuwo aneene, mukhaleke a murecele ni achu oothene.
19 Oosiveliwa, muhinleke ikuhu, nto mmuhiyerye Muluku esara; woona wi yoorempwa: “Yehova onnaloca: ‘Winla ikuhu ti waaka; kinarwa kaakookiherya.’”
20 Nto “mwiicani aa avoliwa, omvahe echu ya olya; akhala ni nthanana, omvahe echu ya owurya; va weerano yeela, onamuukelela makhala a mooro va muru vawe.”*
21 Muheemererye ovoothiwa ni yoonanara, nto mutitelele ovootha yoonanara ni yaphaama.
Inoota
^ Naari: “mukhalelo yoola wa ichu; wamutano.” Moone Masu Atharihiwe.
^ Naari: “atatuxe.”
^ Naari: “omukawenleiye.”
^ Naari: “yaari ya okhaviherya, nikhaviheryeke.”
^ Naari: “olopola.”
^ Naari: “alopoleke.”
^ Naari: “onaveleela.”
^ Naari: “moolipixerya.”
^ Naari: “oolapaxa; a mvai.”
^ Naari: “Muhikhale ooporora mmitekoni mwanyu.”
^ Mwawooneya onaahiwa munepa wa Muluku.
^ Naari: “variyari.”
^ Ela tiwi, ommaaliha ni otothowiha oturuwa wawe.
