Eklesiyasti 3:1-22
3 Ichu soothene sookhalano elukuluku aya yoolakeleliwa;Miteko soothene sookhalano elukuluku aya vathi va erimu:
2 Elukuluku ya oyara ni elukuluku ya okhwa;Elukuluku ya waala ni elukuluku ya ophola yeeyo yaaliwe;
3 Elukuluku ya wiipha ni elukuluku ya openuxa;Elukuluku ya okumula ni elukuluku ya oteka;
4 Elukuluku ya winla ni elukuluku ya otheya;Elukuluku ya othanana ni elukuluku ya wiina;*
5 Elukuluku ya ovonya maluku ni elukuluku ya othukumanya maluku;Elukuluku ya okhupaarela ni elukuluku ya osepa okhupaarela;
6 Elukuluku ya waavya ni elukuluku ya oyeleela;*Elukuluku ya okhapelela ni elukuluku ya oriha;
7 Elukuluku ya waahula ni elukuluku ya osona;Elukuluku ya omaala ni elukuluku ya oloca;
8 Elukuluku ya osivela ni elukuluku ya wiica;Elukuluku ya ekhoco ni elukuluku ya murecele;
9 Tiheeni namuteko onaphureiye ni wiilipixerya wawe woothene?
10 Kihoona muteko Muluku aavanheiye anamwane a achu wi ekhaleke ooweiwa.
11 Owo oopaka ichu soothene sooreera* mu elukuluku aya. Ophiyerya wi Owo oohela mmurimani mwaya nchuno na okhala, okhala wookhala;* nto achu herwa yiiwexexa mwawaakhwanela muteko yoowo Muluku eeparipari ophanreiye ovinyerya woopaceryani ophiyerya wookuchulani.
12 Koophiyerya makuchuwelo wi wa yaawo, hiyaavo eri yaphaama opwaha ohakalala ni opaka yeeyo eri yaphaama variyari va okumi aya,
13 nave tho wi oothene enalya ni owurya, ni opuha miteko saya soothene sakuru. Ela yamahala ya Muluku.
14 Kohiiwexexa wi soothene Muluku eeparipari onapakeiye inamwiikhalelaru okhala wookhala. Hiyaavo enawerya waaceereryiwa naari ovukuliwa. Muluku eeparipari oopaka ichu mmukhalelo yoola, wi achu emooveke.
15 Yeeyo eneereya yoheereya khalai; nave yeeyo erivovo yaakhalavo khalai. Nto Muluku eeparipari onaavya yeele enaavyiwa.*
16 Kohoona tho ela vathi va nsuwa: Mu nipuro na ekhaikhai, waakhalavo onanara nave mu nipuro na wookololowa waakhalavo onanara.
17 Mwawiihiiha, kaahi mmurimani mwaka: “Muluku eeparipari onamwaathoriha awookololowa ni oonanara murima, tiwi yookhalavo elukuluku ntakhara miteko soothene ni saweera soothene.”
18 Miyaano tho kaaloca mmurimani mwaka wi Muluku eeparipari onanweeha anamwane a achu ni owooniherya wi awo ari ntoko axinama.
19 Tiwi yeeyo eneereya ni achu enneereya tho ni axinama: Oothene arino makuchuwelo mamohamoha. Hiihaa ntoko mwaaxinama onakhweiye, muchu tho onakhwa hiihaa; nave oothene awo arino munepa mmohamoha. Mwawiihiiha, achu hanaapwaha axinama; ichu soothene ti satheru.
20 Oothene anaya nipuro nimohamoha. Oothene arweenle onchupini nave oothene anakookela onchupini.
21 Taani onasuwela chiryeene waakhanle wi munepa wa achu onawela osulu naari waakhanle wi munepa wa axinama onakhuruwela vathi?
22 Nave kohoona wi hiyaavo yaphaama wa muchu opwaha opuha muteko awe, woona wi nla nchuwelo* nawe; tiwi taani onawerya omooniha yeeyo enahaala weereya amanle orimeela?
Inoota
^ Mu Ehepiri, “ocupha.”
^ Naari: “oleva yeeyo erimeenle.”
^ Naari: “mwaphaama; mwawaakhwanela.”
^ Mu Ehepiri, “Ophiyerya wi Owo oohela ilukuluku soohimala mmurimani mwaya.”
^ Naari akhweya: “yeele erimeenle.”
^ Naari: “nikupa.”
