Luka 15:1-32
15 Alipa a muxokho ni alipa oocheka oothene yaamwaacamela Yesu wi enwiriyane.
2 Afarisi ni alipa oorepa yaanamwaapa eriki: “Mulopwana ola onnawaakhela alipa oocheka, analyano vamoha.”
3 Mwawiihiiha aaloca wa yaawo niphwanaphwaniho nla:
4 “Taani mwa nyuwo, arinono ipucepuche nsana, yarimeela emoha, ahihiya otakhwani weiwe ihe makhumi mathanu naxexe ni thanu naxexe,* wi aavye ele erimenle ophiyerya aphwannye?
5 Aphwanya, owo onnateexa mmakhatani* ahakalanle.
6 Aphiya owaani, onnawiichana asinthamwene awe ni amwaacamani awe, alocano ariki: ‘Hakalalani ni miyo ntakhara koophwanya epucepuche aka yaarimenle.’
7 Kinnooleelaani wi, onamukhalawo tho ohakalala otokweene wirimu nthowa na mulipa oocheka ocharunwe waapwaha achu awookololowa makhumi mathanu namaxexe ni thanu naxexe,* yaawo ohiri woochuneya orukunuxa murima.
8 “Naari, muthiyana taani arinono itrakima* khumi, nave yarimeela emoha, ahinapariha epanthi ni ovela mpa, anathola ophiyerya ophwanya?
9 Nave aphwanya onnawiichana akhweiye* ni amwaacamani awe alocano ariki: ‘Hakalalani ni miyo ntakhara koophwanya etrakima* yaakirimeenle.’
10 Emohamoha tho, kinnooleelaani wi, onamukhalawo ohakalala variyari va ankeelo a Muluku, nthowa na mulipa oocheka mmoha ocharunwe.”
11 Voocharela aahi: “Mulopwana mmoha aakhalano anamwane eeli aasilopwana.
12 Mukhaani aaloca ni apapa awe ariki: ‘Papa, mukikawele makupa a muhakhu anyu kineeraaka kaakhele.’ Mwawiihiiha, tiithi aahaakawela oopiili muhakhu awe.
13 Evinre mahiku vakhaani, mwaana mukhaani aathukumanya ichu sawe soothene, apaka mukwaha ayaaka elapo yoorakamela, nave weiwe aayeeha muhakhu awe moorweela wa okhalano meecelo oonanara.*
14 Aayeenheiye soothene, yaakhalawo etala mu elapo yeele, nave owo aapacerya othoiwa.
15 Mwa yeeyo, owo aavinya anamulapa muchu a elapo yeele, nave yoowo aamuruma omaca wawe wi alyiheke ikupa.
16 Nave aanachuna wiipha etala ni sawiima siichaniwa alfaropa seiyo ikupa sakhuuraaya, nyenya haarivo muchu aamvaha echu.
17 “Iisuupuwelenleiye, owo aahi: ‘Apapa aakhalano anamalapa ancipale yaawo analya ni ovona, eniiha miyaano kikhwaaka etala wenno!
18 Kinamvinya kaaphwanye apapa nave kiloceno kiriki: “Papa, koochekela wirimu ni vamiithoni vanyu.
19 Nkiri oophwanelela weeriwa mwaninyu. Mukeere ntoko mmoha a anamalapa anyu.”’
20 Mwawiihiiha, owo aakookela wa apapa awe. Arwaaka hiihale ociiwene, apapa awe yaamoona emoriwano ikharari, emuchimakela, emukhupaarela,* nave emvaha epeexu.
21 Voocharela, mwaana aaloca wa apapa awe: ‘Papa, koochekela wirimu ni vamiithoni vanyu. Nkinaphwanela weeriwa mwaninyu.’
22 Nyenya apapa awe yaahi wa akapuro awe: ‘Mwaakuve! Muruuhe yoowara yoorekama yaphaamaxa nave munwarihe, munwarihe tho muneela ni asantaalya.
23 Nave tho mmuruuhe mwaasaana a emope ooneneva, mmwiiphe wi nimukhuure nave nihakalale,
24 woona wi mwanaka ola aakhwa vano oovinya; aarimeela vano ohooneya.’ Vaavaa, yaapacerya opuha ehakalalaka.
25 “Nto mwaana mutokweene aari omaca, arwaaka, aacamelaka vaate, aaniiwa wiipa ni wiina.
26 Mwawiihiiha, aamwiichana namalapa mmoha amukoha echu yeereya.
27 Owo aamuleela: ‘Munnaa toruule, nave apapaa aamwiipha mwaasaana a emope ooneneva, ntakhara ookooka ari mukumi.’*
28 Nto owo aatepa onyeenyeya anakhooca ovolowa. Voocharela, apapa awe yaarwa epacerya omulapelela.
29 Owo aawaakhula apapa awe ariki: ‘Papa, koolapa ni nyuwo iyaakha sincipale ntoko kapuro, nave nkintonko ohiwiiwelelaani. Naamwi hiihaa, hamutonko okivaha epuri mano wi kipuhe ni asinthamwene aka.
30 Vano oruuleiye mwaninyu ola, yoowo oyeenhe* muhakhu anyu ni acapaheya, nyuwaano moomwiiphela mwaasaana a emope ooneneva.’
31 Apapa awe yaamwaakhula eriki: ‘Mwanaka, weyo mahiku oothene ori ni miyo, nave ichu saka soothene ti sawaa.
32 Chiri ti waphaama opuha ni ohakalala vamoha, ntakhara munnaa aakhwa vano oovinya, aarimeela vano ohooneya.’”
Inoota
^ 99.
^ Naari: “mmachurini.”
^ 99.
^ Etrakima yaari ekhorowa ya eparata yeeyo yaaphariheliwa ni Akriki.
^ Naari: “athiyana akhweiye.”
^ Etrakima yaari ekhorowa ya eparata yeeyo yaaphariheliwa ni Akriki.
^ Naari: “meecelo oololo; ohuwa.”
^ Mu Ekriki, “yiivonyerya muxikoni mwawe.”
^ Naari: “phaama.”
^ Mu Ekriki, “olyile.”
