Luka 17:1-37
17 Voocharela, Yesu aaloca wa oohuserya awe ariki: “Tahi wooweryeya osepa wi ehikhumelele mathowa a sookwaculiha. Nto ootakhaliwa ti yoowo onaruuha sookwaculiha iho!
2 Yaamukhala yaphaama wa yoowo omakeleliwa muxikoni namahaani, nave ariheliwe mphareya, ohiya omukwaculiha mmoha a asikhaani yaala.
3 Phoole, mwiivareryeleke. Wakhala wi munnaa oopaka yoocheka, omusamela, nave acharuwa, omulevelele.
4 Naamwi oochekenle ikwaha thanu napiili vanihikuni, nave arwa wa weyo ikwaha thanu napiili, alocaka ariki: ‘Koocharuwa,’ onaphwanela omulevelela.”
5 Arummwa yaahi wa Apwiya: “Munaaceererye hiyo nroromelo.”
6 Voocharela Apwiya yaaloca: “Wakhala wi mookhalano nroromelo ntoko mwaammiso wa mustarta, munaamulocela mwiri ola wa amoore muriki: ‘Opholeyevo, wiisaalele mphareya!’ nave owo onanwiiwelelaani.
7 “Taani mwa nyuwo, arino kapuro awe onaamulima naari onakukhula muhuwo, oni arikimphiyaru arwaaka omaca, alocano ariki: ‘Waakuve, okiraathi vameesa va wi olye’?
8 Ohiya yeeyo, hanalocano ariki: ‘Orehererye yoolya, oware yoowaraa, nave okirumeele ophiyerya kimalinhe olya ni owurya; nave voocharela, onanwerya olya ni owurya’?
9 Apwanne onahaala omuthamalela kapuro nthowa na waakhwaniha yeeyo aarummwaleiye?
10 Moolikana tho, mweerano ichu soothene murummwalaanyu, muloce muriki: ‘Hiyo na akapuro a siiyo. Yeeyo nenraahu, ti yeeyo naaphwanelaahu weera.’”
11 Ayaaka o Yerusalemu, Yesu aavira o munlaano wo Samariya ni Kalileya.
12 Avolowaka mmuceche mmoha, alopwana khumi yaarino mareca yaamuthikirerya yoowo, yeemela ocai.
13 Nave awo yaakhuwela eriki: “Yesu, Muhusiha, onimorele ikharari!”
14 Vaavaa aawoonneiye aahi wa yaawo: “Haweni mwiisooneihe wa alipa a mukucho.” Eyaaka mphironi, mareca yaahaamalela.
15 Mmoha a yaawo, oonneiye wi aapenuwa, aakookela oculi, amucicimihaka Muluku ni masu oovuwa.
16 Nave aakokhora va manaani a Yesu uuramela vathi, amuthamalela yoowo. Owo aari Musamariya.
17 Yesu aakoha ii: “Hiyaari khumi yaawo apenuxiwe? Vano ari woowi ale athanu naxexe?
18 Mano, haavo mmoha a yaawo okoonke wi amucicimihe Muluku, omuhiya mulopwana ola a nloko nikina?”
19 Voocharela, Yesu aahi wa yoowo: “Vinya oroweke; nroromelo naa nohoopenuxa.”
20 Afarisi yaamukoha ti liini Omwene wa Muluku oneeraaya orwe. Owo aawaakhula ariki: “Omwene wa Muluku honi orwe mmukhalelo wawooneya;
21 naari achu heloca eriki: ‘Onani, ola ori va!’ naari: ‘Ole ori vale!’ Vawi Omwene wa Muluku ori veeri vanyu.”*
22 Voocharela, owo aaloca wa oohuserya awe ariki: “Enamphiya elukuluku muneeraanyu mukhweleke woona nihiku nimoha mano na Mwaana a muchu, nto hamurwa moona.
23 Nave achu enarwa eloca wa nyuwo eriki: ‘Mmoone, ole ori vale!’ naari: ‘Mmoone, ola ori va!’ Muhiyewo naari muhaachimakele.
24 Hiihaa ntoko overunya onaaryaaya ovinyerya makupa mamoha a erimu ophiyerya makupa makina, orwa wa Mwaana a muchu oni weereye hiihaa mu nihiku nawe.
25 Nto woopaceryani, owo onaphwanela ohooxiwa ichu sincipale, ni okhoociwa ni muyareriwo yoola.
26 Opwaha yeeyo, ntoko yeeren’yaaya mmahiku a Nowa, hiihaa tho, inamweereya mmahiku a orwa wa Mwaana a muchu:
27 Achu yaanalya, yaanawurya, alopwana yaanathela, athiyana yaanatheliwa, ophiyerya nihiku nenlo Nowa aavolonweiye mmwaaceyani, nave Maahi Mancipale yaarwa, yaatoloxa achu oothene.
28 Vamohamoha tho, ntoko yeeren’yaaya mmahiku a Loti: Achu yaanalya, yaanawurya, yaanathuma, yaanatumiha, yaanaala, ni yaanateka.
29 Nto, nihiku Loti aakhummeiye o Sotoma, waarupa mooro ni enxofre* orweela wirimu, waatoloxa achu oothene.
30 Enamweereya emohamoha mu nihiku nenlo Mwaana a muchu oneereiye uupululiwe.
31 “Nihiku nenlo, muchu yoowo oni akhale vasulu va empa awe, nto ichu sawe iri mpa, akhuruwa, ahivolowemo wi akuxe ichu sawe, nave, moolikana tho, yoole oni akhale omaca, hanaphwanela okookela ichu ohin’yeiye muculi.
32 Mmuupuwele mwaara a Loti.
33 Yoole onaavya ovuluxa okumi awe, onamuyeleela, nto yoole onayeleela okumi awe, onamukhapelela.
34 Kinnooleelaani wi, mu ohiyu yoole, achu eeli anamukhala va ekaama emoha; onamukuxiwa mmoha, nto mukina onamuhiiwa.
35 Athiyana apiili enarwa enaxila vanxiloni nimohamoha; nto onamukuxiwa mmoha, nyenya mukina onamuhiiwa.”
36 *——
37 Oohuserya yaamukoha eriki: “Pwiya, eni yeereye woowi?” Yesu aawaakhula: “Weiwo oni okhalewo muruchu, inaka tho inamuthukumana weiwo.”
Inoota
^ Naari: “variyari vanyu.”
^ Masu awi enxofre anaahiwa maluku awunkha.
^ Eversikulu ela henaphwanyeya mu soorepa sakhalai, nave woonaru henapaka makupa a Soorempwa sooveereliwa.
