Luka 22:1-71
-
hooleli aalipa a mukucho annavaanela meerelo a omwiipha Yesu (1-6)
-
Marehereryo ntakhara Paska ookuchula (7-13)
-
Opaceryihiwa wa Mukonelo wa Apwiya (14-20)
-
‘Yoole onakiveleela ori ni miyo vameesa’ (21-23)
-
Ovaanyihana otokotoko vooloca sa taani ori mutokweenexa (24-27)
-
Nlakano na Yesu ntakhara omwene (28-30)
-
Okhooca wa Petru onnalociwa mwa miririmu (31-34)
-
Ti woochuneya wiirehererya; malema meeli (35-38)
-
Nivekelo na Yesu o Mwaako wa Asitona (39-46)
-
Yesu onnaphariwa (47-53)
-
Petru onnamukhooca Yesu (54-62)
-
Yesu onnanyemuliwa (63-65)
-
Othorihiwa vamiithoni va Sineetriyu (66-71)
22 Vano yaanaacamela Efesta ya Ipaau Soohiheliwa Yooruruvaliha, yiichaniwa Paska.
2 Nave ahooleli a alipa a mukucho ni alipa oorepa yaanaavya meerelo oophwanelela a omwiipha, woona wi yaanawoova achu.
3 Voocharela, Satana aavolowa mwa Yutasi, iichaniwa Iskariyoti, yoowo aari mmoha a oohuserya Khumi Napiili,
4 nave ola aaya oloca ni ahooleli a alipa a mukucho ni ahooleli aalipa ooweherya a empa ya Muluku meerelo ene a omveleela Yesu wa yaawo.
5 Awo yaatepa ohakalala ni yeeyo nave emuroromeliha omvaha ikhorowa sa eparata.
6 Mwawiihiiha, Yutasi aheemererya nave aapacerya waavyaavya ekari wi amveleele wa yaawo ohirivo muloko wa achu.
7 Nihiku na Efesta ya Ipaau Soohiheliwa Yooruruvaliha, nihiku nenlo waaphwanelaaya ovahiwa mukucho wa Paska;
8 mwawiihiiha, Yesu aamuruma Petru ni Yohani ariki: “Haweni mwanreherele Paska wi nimulye.”
9 Awo yaamukoha: “Munachuna wi namurehererye woowi?”
10 Owo aawaakhula: “Mukiwiriyane, mwavolowa mpooma, onamukumana ni nyuwo mulopwana ateenxe muno wa maahi. Mmuchare yoowo empa oneereiye avolowe.
11 Nave muloce ni mwaneene a vaate muriki: ‘Muhusiha onirumme wookohaani: “Nri woowi nipuro na aleco, wi kimulyewo Paska ni oohuserya aka?”’
12 Nave mulopwana owo onanwoonihaani nipuro ntokweene noosulu nooreheryiwa phaama ni ichu saya. Mmurehererye weiwo.”
13 Mwawiihiiha, awo yaacimula ephwanya hiihaa ntoko Yesu aaleenleiye nave yaamurehererya Paska.
14 Yaaphiyenryaaya elukuluku, owo aahaamela meesa vamoha ni arummwa.
15 Nave owo aaloca ni yaawo ariki: “Kaanakhwelaxa omulya Paska yoola vamoha ni nyuwo kihaakumve ohooxeya;
16 vawi kinnooleelaani, nkirwa kimulya wanaawiili ophiyerya aakhwanenle mu Omwene wa Muluku.”
17 Aamwaakhela koopho, avekela nave aloca ariki: “Mmukuxe koopho ola nave munnyereryane mukina ni mukhwaawe,
18 ntakhara kinnooleelaani: Ovinyerya hiihaano oya muhoolo, nkirwa kiwurya wanaawiili eviinyu yeela ophiyerya Omwene wa Muluku orwiile.”
19 Nave tho, aakuxa epaau, avekelela, akawanya, nave aavaha yaawo ariki: “Ela eneemelela mwiili aka, oni ovahiwe wa nthowa nanyu. Titelelani weerano yeela mukuupuwelaka miyo.”
20 Emohamoha tho yaaheerano ni koopho, emanle olya, yaamukuxa eloca eriki: “Koopho ola oneemelela waataana wahiihaano moorweela wa nikhami naka, nenlo nni n’yeehiwe wa nthowa nanyu.
21 “Nyenya ntata na yoole onakiveleela, nri ni miyo vameesa.
22 Chiryene, Mwaana a muchu onampwahavo ntoko elakeleliwaaya, nto ootakhaliwa ti yoowo oni amveleele!”
23 Mwawiihiiha, awo yaapacerya okohana vooloca sa taani aahaala weerano yeeyo.
24 Ohiya yeeyoru tho, awo yaapacerya ovaanyihana vatokotoko vooloca sa taani mwa yaawo ori mutokweenexa.
25 Nyenya owo aaloca wa yaawo: “Mamwene a maloko annaalamulela achu aya, nave yaale arino otokweene wa yaawo, aneeriwa Aweera Saphaama.
26 Nto nyuwo muhikhale hiihaa. Nyenya yoole ori mutokweenexa veeri vanyu akhale mukhaanixa, nave onahoolela, akhale ntoko yoole onarumeela.
27 Vano taani ori mutokweene: Ti yoole ori vameesa* naari onarumeela?* Tahi yoole ori vameesa?* Nto miyo kiri veeri vanyu ntoko yoole onarumeela.*
28 Nyenya ti nyuwo mwaari ni miyo mu ohooxiwa waka;
29 nave kinnapaka waataana ni nyuwo ntakhara omwene, hiihaa ntoko Atiithi aka apankaaya waataana ni miyo,
30 wi mwalye ni owurya vameesa vaka mu Omwene aka, nave mukiraathi mminyukhuni wi muthorihe mahimo khumi napiili a Aisarayeli.
31 Simoni, Simoni, owiriyane: Satana aaveka wi oothene nyuwo mveeriwe ntoko tiriku.
32 Nyenya kinnoovekelela ni murima woothene wi nroromelo naa nihiceecheye;* nave weyo wakooka, waalipihe asinnaa.”
33 Voocharela Petru aahi: “Pwiya kiri oorehereya woocharaani okariposo naari wookhwani.”
34 Yesu aahi: “Petru, miyo kinnooleela wi olelo, muthupi ohiipale, onamukhooca ikwaha raru wi wookisuwela.”
35 Owo aahaakoha yaawo ariki: “Vaavale koorummaakaani ohikuxa murupa wa ikhorowa, murupa wa yoolya naari asantaalya, apwanne yaahoothowaani echu?” Awo yaahaakhula: “Hooye!”
36 Voocharela owo aahaaleela ariki: “Nto vano, yoowo orino murupa wa ikhorowa akuxe, orino tho murupa wa yoolya akuxe; nave ohirino nlema, atumihe yoowara awe wi athume nimoha.
37 Kinnooleelaani wi, ennaphwanela waakhwanela wa miyo yeele yaarempwe: ‘Owo aahaalakhanyeriwa ntoko mmoha aalipa oocheka.’ Aa, ela ennaakhwanela wa miyo.”
38 Voocharela awo yaahi: “Pwiya, nookhalano malema meeli.” Yesu aaloca: “Waaca yaawo.”
39 Apwahaka, owo aaya o Mwaako wa Asitona ntoko aakhovelenleiye, nave oohuserya awe yaamuchara.
40 Vaavaa yaaphin’yaaya weiwo, owo aalocano: “Mutitelele ovekela wi muhuuwele muweehiwani.”
41 Nave aaheeca vakhaani, echu ya ovonya wa nluku, akokhora, anavekela
42 ariki: “Tiithi, mwaakhwelaka, mumviihevo koopho ola wa miyo. Nto oheereye okhwela waka, nyenya okhwela wanyu.”
43 Voocharela, aahooneya munkeelo orweela wirimu nave amulipiha yoowo.
44 Nyenya owo aatepa wuukhuwa ophiyerya wi avekelaxa vancipale; nave otothowa wawe waahithatuwa ntoko macoicoi a nikhami yaamorela vacheyani.
45 Aakwaanxeiye ovekela, aavinya aya wa oohuserya awe, nave aahaaphwanya erupaka ekhulumunwe nthowa na othanana.
46 Owo aahi wa yaawo: “Munarupelani? Vinyani nave mutitelele ovekela, wi muhuuwele muweehiwani.”
47 Arikimuloca hiihale, waaphiya muloko wa achu, ohooleliwaka ni mulopwana mmoha awiichaniwa Yutasi mmoha a oohuserya Khumi Napiili; nave aamwaacamela Yesu wi amvahe epeexu.*
48 Nyenya Yesu aamukoha: “Yutasi, weyaano onamveleela Mwaana a muchu ni epeexu?”
49 Yaawo yaari ni Yesu yoonnaaya yeeyo yaahaala weereya, yaamukoha: “Pwiya, naakakache ni nlema?”
50 Ophiyerya tho wi mmoha a yaawo, aavonya nlema nawe, akwasa naaru na moono woolopwana na kapuro a mulipa a mukucho mutokweene.
51 Nto Yesu aahi: “Mmaale, mwaahiye.” Voocharela Yesu aatannya naaru, ampenuxa.
52 Mwawiihiiha, Yesu aahi wa ahooleli a alipa a mukucho, ahooleli aalipa ooweherya a empa ya Muluku, ni asitokweene yaawo yaarwenle omphara, ariki: “Nyuwaano munarweela okiphara, murino malema ni ikopo ntoko wi ka mpava?
53 Vaavaa kaakhalaaka ni nyuwo mu empa ya Muluku nihiku nnihiku, nyuwaano himwaakiphanre. Nyenya ela elukuluku anyu nave tho elukuluku wi epiiphi elamulele.”
54 Voocharela yaamphara Yesu, emukeriha vaate va mulipa a mukucho mutokweene; nto Petru aanamuchara ari ocaiwene.
55 Wiiseeliwaaya mooro vaate vaavale, nave achu ekiraathi enoora, Petru tho aakiraathi ni yaawo.
56 Nto namuteko mmoha amwaamuthiyana aamoona Petru, woona wi aanamwaleeliwa ni makalume a mooro, nave aloca ariki: “Mulopwana ola tho, aari ni yoowo.”
57 Nto owo aakhooca, ariki: “Muthiyana, miyaano nkimusuwenle mulopwana yoowo.”
58 Evinre elukuluku tonto, muchu mukina aamoona yoowo, alocano ariki: “Weyaano tho wa mmoha a yaale.” Nyenya Petru aahi: “Mulopwana, tahi yoomi.”
59 Nave, evinre echu ya ewora emoha, mulopwana mukina aanyesererya oloca, ariki: “Chiryene, mulopwana ola aari ni yoole, woona wi Mukalileya!”
60 Nto Petru aahi: “Mulopwana, nkinasuwela yeeyo onalocaawe.” Nave arikimuloca hiihale, muthupi waahiipa.
61 Hiihaa, Apwiya yaarukunuwa enweha Petru, nave Petru aahuupuwela masu Apwiya yaaloncaaya wa yoowo eriki: “Olelo, muthupi ohaakumve wiipa, weyaano onamukikhooca ikwaha raru.”
62 Owo aakhumela vaate nave aahinla vancipale ni osooseya murima.
63 Alopwana yaale yaamphanre Yesu, yaapacerya omunyemula emmanaka;
64 nave emanle omukhuneela owanoni,* yaanamukoha eriki: “Anyiherya! Taani oomanne?”
65 Yaanamulocela tho ichu sincipale sa omunyemulano.*
66 Waaxilaayavo, yaathukumana vamoha asitokweene aachu, ahooleli a alipa a mukucho vamoha ni alipa oorepa; nave yaamukuxa emukeriha o Sineetriyu,* elocano eriki:
67 “Weyaano waari Kristu, onleele.” Nto Yesu aawaakhula ariki: “Naamwi koolenleeni, hamuni mweemererye.
68 Ohiya yeeyo, wakhala wi kihookohaani echu, nyuwaano himukaakhula.
69 Nto, ovinyerya hiihaano oya muhoolo, Mwaana a muchu onarwa akiraathi ontatani noolopwana noowerya na Muluku.”
70 Mwawiihiiha, oothene yaaloca eriki: “Seechu weyaano wa Mwaana a Muluku?” Owo aawaakhula: “Nyuwaano munalocaa wi ka yoowo.”
71 Awo yaaloca: “Ntakhara heeni nnaavyaahu onamoona okina? Woona wi noomwiiwa alocaka ni eyano awe.”
Inoota
^ Naari: “ohaamenle meesa.”
^ Naari: “onakhaviherya.”
^ Naari: “ohaamenle meesa.”
^ Naari: “onakhaviherya.”
^ Naari: “nihithove.”
^ Naari: “wi amunuule.”
^ Naari: “wiithoni.”
^ Naari: omphuca
^ Moone Masu Atharihiwe.
