Luka 23:1-56
23 Hiihaa, muloko woothene waavinya, omukuxa Yesu omukeriha wa Pilatu.
2 Mwawiihiiha, yaapacerya omootherya, eriki: “Nomphwanya mulopwana ola ahuwelihaka nloko nahu, aawatiheryaka oliva mixokho wa Kaisara nave alocaka wi ti Kristu, mwene.”
3 Pilatu aamukoha ariki: “Eparipari wi weyaano wa Mwene a Ayuta?” Yesu aahaakhula: “Ti yeeyo mmanlaanyu oloca.”
4 Voocharela, Pilatu aahiloca wa ahooleli a alipa a mukucho ni muloko* wa achu: “Nkinoona nthowa na omuthoriha mulopwana ola.”
5 Nto awo yaatitelela oloca eriki: “Ola onnawaakanyerya achu, ahusihaka o Yuteya woothewene, opacerya o Kalileya ophiyerya wenno.”
6 Pilatu iiwaleiye yeela, aakoha waakhanle wi mulopwana ole aari Mukalileya.
7 Aasuwenleiye wi aari a elapo yaalamuleliwa ni Heroti, owo aamurumihela Heroti, yoowo tho aari o Yerusalemu mmahiku yaale.
8 Vaavaa Heroti aamoonneiye Yesu, aatepa ohakalala. Vawi ovinyerya khalai, aanahaawela omoona vanthowa na ichu sincipale iiwaleiye vooloca sa yoowo, nave aanawehererya tho omoona apakaka sootikhiniha.
9 Mwawiihiiha, owo aapacerya omukoha ichu sincipale, nyenya Yesu haamwaakhunleru.
10 Nto ahooleli a alipa a mukucho ni alipa oorepa yaaneemela emusomelaka vatokotoko.
11 Voocharela, Heroti vamoha ni anakhoco awe, yaanamunyemula ni omuroha moorweela wa onwariha yoowara yooreera, nave yaamukookiherya wa Pilatu.
12 Nihiku nene nenle, Heroti ni Pilatu yaawo khalai yiicanne, yaakhala asinthamwene.
13 Hiihaa, Pilatu aahaathukumanya ahooleli a alipa a mukucho, alamuleli, vamoha ni achu
14 nave aalocano: “Mookiruuhela mulopwana ola mulocaka wi onnaahuweliha achu. Nto koomukoha vamiithoni vanyu, nave nkimphwanyenre mathowa munamusomelaanyuno.
15 Naari tho Heroti hamphwanyenre mathowa, ti vaavaanto onikookihenreiye. Moone, ola haanono nthowa noophwanela wiiphiwa.
16 Vano kinammooniha ekoi nave kimutaphule.”
17 *——
18 Nto muloko woothene wa achu waanakhuwela oriki: “Mmwiiphe mulopwana ola,* nave mmutaphule Parapa!”
19 (Parapa ola, aawaleliwe mukariposo nthowa na waarukunuwela alamuleli ni omwiipha muchu vamukhiconi weeren’ye vapooma.)
20 Pilatu aaloca wanaawiili ni yaawo, nthowa nawi aanachuna omutaphula Yesu.
21 Voocharela, awo yaapacerya okhuwela eriki: “Athomeiwe va mwiri! Athomeiwe va mwiri!”*
22 Nto owo aahaakoha ekwaha yaneeraru ariki: “Ntakhara heeni? Yoonanara taani mulopwana ola opankeiye? Nkimphwanyenre nthowa noophwanela wiiphiwa; mwawiihiiha, kinammooniha ekoi nave kimutaphule.”
23 Nto yaawo yaatitelela okhuwela vatokotoko, evekaka wi iiphiwe,* nave okhuwela waya waavootha.
24 Mwawiihiiha, Pilatu aalakelela weemererya yooveka aya.
25 Owo aamutaphula mulopwana yaamvenkaaya, yoowo aawaleliwe mukariposo nthowa na waarukunuwela alamuleli ni omwiipha muchu; nto amveleela Yesu ntoko okhwela waya.
26 Vaavaa yaamukunxaaya epwahakano, yaamweemexa Simoni o Sirene oorowaka omaca, empharela oteexa mwiri* wi amucharekeno Yesu mmaculi.
27 Achu ancipale yaanamuchara yoowo, ophitaanyerya athiyana yaawo yaamana vachirima yinlaka ni emukhupanyeryaka.
28 Yesu aarukunuwa aloca wa athiyana ariki: “Anamwane aasithiyana o Yerusalemu, muhikinlele miyo. Mwiisinlele nyuwo aneene ni anamwane anyu;
29 vawi anamphiya mahiku yaawo achu eneeraaya eloce eriki: ‘Oohakalala athiyana oohiyara, yaawo ahintonko orupala naari mapele ahintonko waamwiha!’
30 Vawi achu enarwa epacerya oloca wa miyaako, eriki: ‘Munuuwele!’ nave wa miyaako mikhaani: ‘Munihuruwele!’
31 Waakhanle wi awo anneerano ichu seiha oniiha mwiri ori mukithi, tiheeni enahaala weereya wakhala wi wohuuma?”
32 Yaakuxiwa tho alopwana akina apiili aweera soonanara wi yiiphiwe vamoha ni yoowo.
33 Nave yaaphiyalaaya nipuro nawiichaniwa Ekarakasa, yaamukhomela Yesu va mwiri vamoha ni ale aweera soonanara, mmoha omoono awe woolopwana ni mukina omoono awe woothiyana.
34 Nto Yesu aanaloca ariki: “Tiithi, mwaalevelele yaawo, woona wi hanasuwela yeeyo aneeraaya.” Voocharela, awo yaaheeherya ehako wi ekawane soowara sawe.
35 Nave achu yaaheemela enavarerya. Nto alamuleli yaanamuroha yoowo eriki: “Owo aavuluxa akina; vano iivuluxe mwaneene, aarimwi ari Kristu a Muluku, Oothanliwa.”
36 Ophiyerya tho anakhoco yaanamunyemula, emwaacamela nave emvaha eviinyu yoosukumana
37 eriki: “Waari Mwene a Ayuta, wiivuluxe meekhaa.”
38 Yaakhalawo masu yaarempwe osulu wawe: “Ola Mwene a Ayuta.”
39 Voocharela, mmoha a yaale aweera soonanara yoowo aathomeiwe, aapacerya omuruwana ariki: “Weyaano tahi wa Kristu? Wiivuluxe meekhaa vamoha tho ni hiyaano!”
40 Nto mukhweiye ole mukina aamusamela ariki: “Weyaano honamoovaru Muluku, vano waakhenlaawe olaka omohamoha?
41 Nave wa hiyo ti yoophwanelela, woona wi nnaakhela yoolivela ya ichu seiho neenraahu, nto mulopwana ola hiyaavo eenreiye eri yoonanara.”
42 Voocharela aahi: “Yesu, mukuupuwele vaavaa muneeraanyu mvolowe mu Omwene anyu.”
43 Yesu aahi wa yoowo: “Mweeparipari kinnooleela olelo: Onarwa okhala ni miyo Mparataiso.”
44 Elukuluku yeeyo, yaari echu ya ewora yaneethanu nammoha;* nyenya yaarwa epiiphi ehuruwela elapo yoothene yeele, ophiyerya ewora yaneethanu naxexe,*
45 vawi nsuwa naaripa; voocharela, ekurtina ya mu empa ya Muluku yaahaahuwa veeri.
46 Nave Yesu aakhuwela ni masu oovuwa ariki: “Tiithi, kinnaveleela munepa aka mmatani mwanyu.” Aalonceiye yeela, owo aakhwa.*
47 Muhooleli a anakhoco oonneiye yeeyo yeeren’ye, aapacerya omucicimiha Muluku, ariki: “Chiryene, mulopwana ola aari awookololowa.”
48 Nave achu oothene yaathukumanne vaavale wa yaweereya yeela, yaahoona soothene seeren’ye; nave yaakookela mmawannyaya, yiimanaka vachirima.
49 Achu oothene yaamusuwenle, ophitaanyerya athiyana, yaawo yaamuhoonle ovinyerya o Kalileya, yaari ocaiwene yoonaka ichu seiha.
50 Aakhalawo mulopwana awiichaniwa Yosefe, mmoha a Alipa Oothoriha yoowo aari muchu aphaama ni awookololowa.
51 (Mulopwana ola haakhulenle othoriha waya ni meerelo aya.) Owo aari a elapo yo Arimateya epooma yo Yuteya nave aanaweherya Omwene wa Muluku.
52 Mulopwana ola aaya wa Pilatu nave aveka mwiili wa Yesu.
53 Aakuruxa muruchu, aahuruwela ni ekuwo ya eliinyu yaphaama, avitha mu nihiye* naapachiwe vamwala, mwemmo wahaantonko ovithiwamo muchu.
54 Nla naari nihiku na Wiirehererya, nave yaahanle elukuluku vakhaani wi nipacerye nihiku na Sapata.
55 Nto athiyana yaawo yaaruule ni Yesu ovinyerya o Kalileya yaachaana tho, yoona nihiye* ni mavitheliwo a muruchu.
56 Hiihaa, yaakookela owaani wi yarehererye makhurwa ni sawunkhela. Nyenya, yaahiichuuwa nihiku na Sapata mwawiiwanana ni malamulo.
Inoota
^ Naari: “mucici.”
^ Eversikulu ela henaphwanyeya mu soorepa sakhalai, nave woonaru henapaka makupa a Soorempwa sooveereliwa.
^ Mu Ekriki, “Muniviiheryevo mulopwana ola.”
^ Naari: “Iiphiwe va mwiri! Iiphiwe va mwiri!”
^ Naari: “iiphiwe va mwiri.”
^ Naari: “mwiri wa ohooxiwavo.” Moone Masu Atharihiwe.
^ Ela tiwi, variyari va ewora ya 12, mitiya.
^ Ela tiwi, variyari va ewora ya 15.
^ Naari: “aahiicha miwiya sookuchula.”
^ Naari: “nihiye nnuupuweliwa.”
^ Naari: “nihiye nnuupuweliwa.”
