Marku 12:1-44
12 Voocharela, owo aapacerya oloca ni yaawo mmaphwanaphwaniho: “Mulopwana mmoha aahaala miri sa uuva,* atekela mukuso, athipa nlici na omuhowelavo uuva,* aateka tho muconco; voocharela, aahaahiyerya emaca anamuteko awe, apaka mukwaha.
2 Yaaphiyalaaya elukuluku ya orukula sawiima, aamuruma kapuro awe wa anamuteko wi aakhele sawiima sa mmacani.
3 Nyenya awo yaamphara, emmana, nave emurowiha ahirino echu.
4 Voocharela owo aahaarumihela kapuro mukina, nave awo yaammana vamuru ni emunyemula.
5 Aahaarumihela tho mukina, nave emwiipha; aahaarumihelawo tho akina ancipale, akina a yaawo emaniwa, akina yiiphiwa.
6 Voocharela, mwaneene a emaca aamurumiha mwanawe oosiveliwa amwaamulopwana wa anamuteko, ariki: ‘Anammucicimiha mwanaka.’
7 Nyenya anamuteko yaaloca wa mukina ni mukhwaawe eriki: ‘Ola mukelampa. Rwaani, haya nimwiiphe wi muhakhu okhale wawihu.’
8 Mwawiihiiha, yaamphara, emwiipha nave empurulela okhwipi wa emaca.
9 Tiheeni mwaneene a emaca onahaaleiye weera? Owo onahaala orwa, awiiphe anamuteko ni waahiyera emaca eyo anamuteko akina.
10 Apwanne hamutonko waalakhanya mu soorepa wi: ‘Nluku nenlo naakhoociwe ni alipa ooteka, ti nenlo naakhanle nluku noochuneya noopharelano empa.*
11 Ela enarweela wa Yehova nave ti yootikhiniha vamiithoni vahu’?”
12 Awo yaanachuna omphara,* nyenya yaanoova muloko* wa achu, woona wi yaanasuwela wi aalonce niphwanaphwaniho awuupuwelaka yaawo. Mwa yeeyo yaamuhiya, epwahavo.
13 Voocharela awo yaahaaruma Afarisi akina ni a nikhuuru na Heroti, wi emphare Yesu mmasu awe.
14 Yaaphiyalaaya, yaahi wa Yesu: “Muhusiha, noosuwela wi muri eeparipari nave hamunaavya waahakalaliha achu, woona wi hamunavarerya ethoi aya, nyenya munnahusiha mweeparipari ephiro ya Muluku. Apwanne ti yaweemereryeya* oliva muxokho wa Kaisara naari hooye?
15 Apwanne ninnaphwanela oliva naari hooye?” Asuwelaka wiisootherya waya, Yesu aahi: “Ntakhara heeni munakeehaanyu? Mukiruuhele etenaariyu ene wi koone.”
16 Awo yaamuruuhela emoha, nave owo aahaakoha: “Eruku ela ni masu ari vaava tawani?” Awo yaahaakhula: “Ta Kaisara.”
17 Yesu aahi: “Mveleele wa Kaisara ichu sa Kaisara, nave wa Muluku ichu sa Muluku.” Awo yaatikhiniheya ni yoowo.
18 Vano Asatuki,* yaawo ahineemererya ovinya mookhwani, yaamwaacamela Yesu emukoha:
19 “Muhusiha, Mose aanrepela wi, wakhala wi munna a muchu ookhwa nave amuhiya mwaariye ahirino anamwane, munnawe onaphwanela omuthela naamukhwele owo wi amuyarele munnawe anamwane.
20 Yaakhalavo alopwana athanu napiili yaawo yaari onna aya. Oopacerya aathela, nyenya aakhwa ahirino anamwane.
21 Anaawiili aamuthela muthiyana yoole, nyenya aakhwa ahirino anamwane, nave yaaheereya emohamoha ni aneeraru.
22 Oothene athanu napiili hiyaayanreno muthiyana yoole. Wookuchulani waya, muthiyana ole aakhwa tho.
23 Mu ovinya mookhwani, muthiyana yoole oni akhale awani? Woona wi oothene athanu napiili yaamuthela.”
24 Yesu aaloca wa yaawo ariki: “Tahi nthowa na yeeyo muhuwenlaanyu, woona wi hamusuwenle Soorempwa naari mano ikuru sa Muluku?
25 Tiwi, vaavaa anavinyaaya mookhwani, alopwana hanathela, naari mano athiyana hanatheliwa, nyenya awo anakhala ntoko ankeelo a wirimu.
26 Vooloca sa oviihiwa mookhwani, apwanne hamutonko waalakhanya mu liivuru a Mose, mu yaweereya ya mwiri waavarela,* vaavaa Muluku aalonceiyevo ni yoowo, ariki: ‘Miyaano ka Muluku a Aparahamu, Muluku a Isaki, ni Muluku a Yakopo’?
27 Owo Muluku, ohiya a achu ookhwa, nto a akumi. Nyuwaano mootepa ohuwela.”
28 Mmoha a alipa oorepa aari vaavale iiwaka ovaanyihana weiwe, oonneiye wi Yesu aahaakhula phaama, aamukoha yoowo ii: “Muhusiha, nlamulo noopacerya* na Mmalamulo tinivi?”
29 Yesu aahaakhula: “Noopacerya ti nla: ‘Wiriyana weyo Isarayeli, Yehova Muluku ahu, ti Yehova mmoharu,
30 omusiveleke Yehova Muluku aa ni murima aa woothene, ni okumi* aa woothene ni muupuwelo aa woothene vamoha ni ikuru saa soothene.’
31 Nanaawiili ti nla: ‘Omusiveleke mwaacamani aa ntoko oniisivelaawe weyo mwaneene.’ Hinaavo nlamulo ntokotokoxa opwaha yaala.”
32 Mulipa oorepa aamwaakhula: “Muhusiha, mooloca phaama, mwawiiwanana ni eparipari, ‘Owo ori Mmoharu, nave haavo mukina ompwaha yoowo;’
33 omusivela yoowo ni murima woothene, ni miruku soothene, vamoha ni ikuru soothene, nave omusivela mwaacamani ntoko oniisivelaawe, ti wasisapo opwaha soovaha soothene soopahiwa ni mikucho mikina.”
34 Mwa yeeyo, Yesu onneiye wi aahaakhula mwamiruku, aahi wa yoowo: “Horakamenle Omwene wa Muluku.” Nto haavo eerenrye ompakela nikoho nikina.
35 Mwawiihiiha, Yesu ahusihaka mu empa ya Muluku, aahi: “Vano onaweryeya hai alipa oorepa enaloca wi Kristu mwaana a Tavite?
36 Moorweela wa munepa waweela, Tavite aaloca, ‘Yehova aaloca wa Pwiya aka: “Okiraathi o ntata naka noolopwana, ophiyerya kaakunhe amwiicani aa vathi va inaani saa.”’
37 Tavite onamweera owo Pwiya, vano onaweryeya hai okhala tho mwanawe?”
Nave muloko wa achu waanasiveliwa onwiriyana.
38 Owo aanahusiha ariki: “Mwiikasoopeke ni alipa oorepa yaawo anachuna weecaka ewanre soowara soorakama, nave anachuna oloceliwaka mmapuro awaaciwamo,
39 okiraathi mmipaco soopacerya* mmapuro a malapelo* vamoha ni okiraathi mmapuro oocicimiheya mu ifesta.
40 Awo waasivela waalyela anaamukhwele mmawannyaya,* nave wi yaatikhinihe,* annapaka mavekelo oorakama. Ala enarwa yaakhela olaka otokotoko.”*
41 Yesu aakiraathi waacamela nipuro na okhapelelamo sooveleela* mu empa ya Muluku, apacerya owoona achu ehelakamo ikhorowa, nave alipa a muhakhu ancipale yaanahelamo ikhorowa sincipale.
42 Nyenya aarwa naamukhwele oohaawa, ahelamo ikhorowa piili sa esisapo vakhaani.*
43 Mwawiihiiha, owo aawiichana oohuserya awe, alocano ariki: “Chiri kinnooleelaani wi naamukhwele ola oohaawa, tovelenle sincipale waapwaha oothene aveleenle ikhorowa saya mu nipuro na sookhapelelamo sooveleela.
44 Woona wi oothene avanhe ikhorowa saahanle mu waacano waya, nyenya naamukhwele ola, ovanhe soothene aareiyeno mu ohaawa* wawe, soothene aareiyeno wi iikhaviheryeno.”
Inoota
^ Naari: “mpesa.”
^ Naari: “mpesa.”
^ Mu Ekriki, “muru wa vamuthokoni.”
^ Naari: “ommaka.”
^ Naari: “mucici.”
^ Naari: “yoophwanelela.”
^ Moone masu a vathi mu Mateyu 3:7.
^ Onaahiwa mwiri mukhaani.
^ Naari: “nookhweleyaxa.”
^ Moone Masu Atharihiwe.
^ Naari: “mapuro oocicimiheya.”
^ Mu Ekriki, “mu sinakooka.”
^ Naari: “sookhalano saya.”
^ Naari: “yiisuwanyeihe.”
^ Naari: “woopwaha.”
^ Naari: “ikaaxa sa sooveleela.”
^ Mu Ekriki, “ilepitoni piili, ela tiwi, ekwatranti emoha.”
^ Naari: “othoiwa.”
