Marku 13:1-37
13 Akhumaka mu empa ya Muluku, mmoha a oohuserya awe aaloca wa yoowo: “Muhusiha, nkoonani oreera wa maluku ni ipa!”
2 Nyenya, Yesu aahi wa yoowo: “Mano, onnoona ipa iha itokotoko? Hinrwa nikhalavo nluku vasulu va nikhwaaya nni nihipiculiwe.”
3 Yesu aakiraantheiye va Mwaako wa Asitona, owehana ni empa ya Muluku, Petru, Tiyaku, Yohani ni Antreya yaamukoha yoowo vameekhaaya:
4 “Munleele, ichu iha inaya weererya liini, nave tiivi eni ekhale eneneeryo yawi ichu soothene iha siri omakuchuwelo?”
5 Yesu aapacerya waaleela yaawo, ariki: “Mwiikasoopeke wi ahikhale ani oowokeeni.
6 Ancipale anamurwa mu nsina naka, eriki: ‘Ti miyaano,’ nave anamwaawoka achu ancipale.
7 Opwaha yeeyo, vaavaa muniiwaanyu sa ikhoco ni soolokoha vooloca sa ikhoco, muhituthuwe; ichu iha sinnaphwanela weereya, nto makuchuwelo nlelo haphiyale.
8 “Ntakhara nloko nnanwana ni nloko nikina nave omwene ni omwene okina; onamukhalavo ocikinyeya wa elapo nipuro nnipuro; nave onamukhalavo tho etala. Soothene iha, mapacereryo a soohooxa.
9 “Nto nyuwo, mukhale awiivareryela. Achu anamooveleelaani mmapuro oothoriha ni woowaxulaani mmapuro a malapelo* nave anamooveleelaani wa alamuleli ni wa mamwene wa nthowa naka, wi mvahe onamoona wa yaawo.
10 Nave tho, mmaloko oothene, michaka saphaama inaphwanela olaleeryiwa voopacerya.
11 Wakhala wi ahoopharaani wi yooveleeleeni, muhikhale awuukhuwa ni echu ya oloca; nyenya yeeyo muneeraanyu mvahiwe elukuluku ene yeeyo, muloce yeeyo, woona wi onaloca tahi nyuwo, nto munepa waweela.
12 Ohiya yeeyoru, munna onarwa amveleela munnawe wi iiphiwe, tiithi onarwa amveleela mwanawe, nave anamwane enarwa yaarukunuwela makholo aya wi ewiiphihe.
13 Nave nyuwo munarwa mwiiciwa ni achu oothene vanthowa na nsina naka. Nyenya yoole oni avilele* ophiyerya omakuchuwelo, toni avuluxiwe.
14 “Mwawiihiiha, vaavaa muneeraanyu moone echu yoothanyeya enatoloxa, yeemenle va nipuro yahaaphwanelaaya okhalavo (mulipa a waalakhanya uupuwelele*), hiihaa, yaale eni ekhale o Yuteya epacerye ochawela mmiyaakoni.
15 Yoole oni akhale vasulu va empa awe, akhuruwa, ahivolowe mpa wi akuxe ichu sawe;
16 nave yoole oni akhale omaca, ahikookele ichu ohin’yeiye muculi wi akuxe yawiikhuneelano awe.
17 Ootakhaliwa eni ekhale athiyana oorupala ni yaale eni ewaamwiheke anamwane mmahiku yaawo!
18 Mutitelele ovekela wi eyo eheereye mu elukuluku ya nakhutu;
19 tiwi mmahiku yaawo, eni ekhale mahiku a yoohooxa etokotoko, yeeyo ehitonko weereya ovinyerya elukuluku Muluku aapatunxeiye elapo, ophiyerya hiihaano, nave herwa tho yeereya wanaawiili.
20 Chiryene, Yehova ahaavukunle mahiku yaawo, haavo aahaala ovuluxiwa. Nyenya vanthowa na oothanliwa yaawo Muluku aathanlileiye, owo oovukula mahiku yaawo.
21 “Nto, akhalavo oni aloce ariki: ‘Onani! Kristu ori va,’ naari, ‘Onani! Ori vale!’ Muheemererye yeeyo.
22 Ntakhara anamooneya akristu oowoka ni alipa a miririmu oowoka, yaawo anahaala opakaka ineneeryo ni sootikhiniha wi yaahuwelihe achu, wakhala wooweryeya, anamwaahuweliha tho oothanliwa.
23 Nto nyuwaano, mukhale oolipelela. Kihooleelaani ichu soothene woosiilo ene.
24 “Mmahiku yaawo, evinre yoohooxa etokotoko, nsuwa nnarwa nriipa, mweeri horwa waarya,
25 itheneeri inarwa imora wirimu, nave ikuru sa wirimu inarwa icikinyiwa.
26 Nave achu enarwa emoona Mwaana a muchu arwaaka mmeekuni a wirimu arino owerya otokotoko ni ncicimiho.
27 Nave owo onamwaarumiha ankeelo awe nave onamwaathukumanya oothanliwa awe orweela makupa maxexe a elapo,* ovinyerya vathi ophiyerya weiwo ekotenlewo erimu.
28 “Vano huseryani sa niphwanaphwaniho nla na mwiri wa mukuukhu: Vaavaa mirai saya sinapaceryaaya ophuwela makukhu mavyaani, nyuwaano munnasuwela wi elimwi yohaacamela.
29 Moolikana tho, moona ichu seiha seereyaka, musuwele wi owo* ori vakhiviru, va milako.
30 Chiri kinnooleelaani wi, muyareriwo ola horwa ovira ichu soothene iha siheeren’ye.
31 Erimu ni elapo enamvira, nyenya masu aka herwaru evira.
32 “Vooloca sa nihiku nenlo naari elukuluku ene, haavo muchu onasuwela, naari ankeelo a wirimu naari Mwaana, nyenya Atiithi.
33 Titelelani owehererya, titelelani olipelela, woona wi hamunasuwela elukuluku ene.
34 Eyo enalikana ni mulopwana, yoowo ahaakumve ocimula ayaaka elapo ekina, aawiichanne anamuteko awe, amukawela mmoha ti mmoha muteko awe, nave amuruma mulipeleli wi atitelele olipelela.
35 Mwawiihiiha, titelelani olipelela, woona wi hamunasuwela nihiku nene mwaneene a empa oneereiye arwe, akhweya wiilakavo, naari ohiyu eriyari, naari ohaakumve oxavo,* naari wooxixelo ene,
36 wi aarwaaka mootutuxa, ahoophwanyeeni murupaka.
37 Nyenya yeeyo kinalocaaka wa nyuwo, kinaloca wa oothene: Mutitelele olipelela.”
Inoota
^ Mu Ekriki, “mu sinakooka.”
^ Naari: “yoole onavilela.”
^ Ela tiwi, yooloherya ya Taniyeli.
^ Mu Ekriki, “icheku xexe.”
^ Ela tiwi, Mwaana a muchu.
^ Mu Ekriki, “mithupi siipaka.”
