Marku 3:1-35
3 Yesu aavolowa tho mu nipuro na malapelo,* nave mummo aakhalamo mulopwana oorakala* ntata.
2 Nto Afarisi yaanamvarerya Yesu wi emoone waakhanle wi aahaala ompenuxa mulopwana ole mu nihiku na Sapata, wi emphwanyerye mathowa.
3 Owo aaloca ni mulopwana ole oorakala* ntata, ariki: “Vinya, orwe veeri va.”
4 Voocharela aaloca ni Afarisi: “Apwanne onneemereryeya, opaka yaphaama naari yoonanara, ovuluxa okumi* naari wiipha mu nihiku na Sapata?” Nyenya awo hiyaakhunleru echu.
5 Amanle waaweha yaale yaari vaavale, ahisiveliwe ni athananaka nthowa na wuuma waya murima, Yesu aaloca wa mulopwana ole: “Okola ntata naa.” Owo aahookola, nave ntata nawe naapenuwa.
6 Mwawiihiiha Afarisi yaakhumela vaate, nave mwawaakuveya yaathukumana nnikhuuru na Heroti enavaanela mukhalelo wa omwiipha Yesu.
7 Nyenya Yesu vamoha ni oohuserya awe yaavinya eya ophareya, nave muloko* mutokweene wa achu orweela o Kalileya ni o Yuteya waamuchara.
8 Ophiyerya tho wi achu oorweela o Yerusalemu, o Itumeya, ookhopela wa Yortano, o makupa o Tiru, ni o Sitoni yaarwa wa yoowo vaavaa yiiwalaaya ichu sincipale aapankeiye.
9 Nave Yesu aahaaleela oohuserya awe wi emuruuhele mwaaceya mukhaani wi muloko wa achu ohinwomaanyeke.
10 Woona wi aahaapenuxa achu ancipale, oothene yaale yaarino ireca itokotoko yaamurica wi emutannye.
11 Ophiyerya tho minepa soonanara, vaavaa saamoonaaya Yesu, saanamukokhorela, ikhuwelaka: “Weyo wa Mwaana a Muluku.”
12 Nyenya mu ikwaha sincipale, Yesu aanasamela wi ihimvuwihe.
13 Owo aawela vamwaako, awiichana yaawo aachuneiye, nave awo yaamuchara.
14 Owo aapaka* nikhuuru na alopwana khumi napiili, avaha nsina nawi arummwa, yaawo yaahaala omuhoolaka ni aahaaleiye waaruma olaleerya,
15 nave aahaavaha owerya wa wiikara masololo.
16 Nikhuuru nenla na alopwana khumi napiili owo aapankeiye,* aari Simoni, yoowo tho amvanheiye nsina nawi Petru,
17 Tiyaku mwaana a Sepeteyu ni Yohani yoowo aari munnawe (owo tho aahaavaha nsina nawi Powanerki, nenlo nnataphulela “Anamwane a Etari”),
18 Antreya, Filipi, Partolomewu, Mateyu, Tomasi, Tiyaku mwaana a Alfewu, Tateyu, Simoni yoowo aari Mukaanani,*
19 ni Yutasi Iskariyoti, yoowo ohoolo waya aamutuminhe Yesu.
Voocharela Yesu aavolowa mpa,
20 nave muloko wa achu waathukumana wanaawiili, ophiyerya wi Yesu ni oohuserya awe ehikhalano elukuluku ya olya.
21 Nyenya amusi awe yiiwalaaya sa yeeyo, yaayawo wi yamphare, woona wi yaanaloca eriki: “Vano oosavuwa.”
22 Nave tho, alipa oorepa yaarwiile o Yerusalemu, yaanaloca eriki: “Owo ookhalano Pelsepu,* nave oniikara masololo nnikhaviheryo na mutokweene a masololo.”
23 Mwawiihiiha, vaavaa Yesu aawiichanneiye, aalocano apharihelaka maphwanaphwaniho ariki: “Onaweryeya hai Satana omwiikara Satana?
24 Wakhala wi omwene wookawanyeya mukhataaya, omwene owo howerya otikitheryeya;
25 nave wakhala wi echoko yookawanyeya mukhataaya, echoko eyo hewerya otikitheryeya.
26 Nave tho, wakhala wi Satana iirukunuwenle mukhateiye nave iikawanya, hawerya otikitheryeya, nto onaya omakuchuwelo.
27 Mweeparipari, haavo onawerya ovolowa mpa mwa muchu akuru wi awerye wiiya ichu sawe ahipacenrye ommaka. Ammaka, tonahaaleiye owerya wiiya mpa mwawe.
28 Chiri kinnooleelaani wi soocheka soothene sa achu inarwa ileveleliwa, moohiphwacha soocheka apankaaya naari masu oonyemula aloncaaya.
29 Nyenya yoole onanyemula munepa waweela harwa aleveleliwa, nto onnakhalano yoocheka yoohimala.”
30 Yesu aaloca yeela, nthowa nawi awo yaanaloca eriki: “Owo ookhalano munepa woonanara.”
31 Vano yaaphiya amama awe ni asinnawe, yeemela vaate, emuruma muchu wi amwiichane Yesu.
32 Woona wi waakhalawo muloko wa achu waamurince, awo yaahi wa yoowo: “Pwiya, amamaa ni asinnaa ari vaate ewaavyakaani.”
33 Yesu aawaakhula: “Taani ari amamaaka ni asinnaka?”
34 Voocharela, aawehaka yaale yaari vaavale, owo aaloca: “Amamaaka ni asinnaka taala!
35 Oothene yoole oneera yoochuna ya Muluku, yoola tori munnaka, murokoraka ni amamaaka.”
Inoota
^ Mu Ekriki, “mu sinakooka.”
^ Naari: “oophoororowa.”
^ Naari: “oophoororowa.”
^ Naari: “omvuluxa muchu.”
^ Naari: “mucici.”
^ Naari: “aathanla.”
^ Naari: “aathanlileiye.”
^ Woonaru nsu nla nnataphulela “museloti,” ohiya wi aari o Kanani.
^ Nsina nla oniichaneliwa Satana.
