Mateyu 17:1-27
17 Evinre mahiku mathanu nammoha Yesu aamukuxa Petru, Tiyaku vamoha ni munnawe awiichaniwa Yohani, yaaworu, aayano omwaako woorakama.
2 Weiwo, Yesu aatatuxiwa vamiithoni vaya; ethoi awe yaanaarya ntoko nsuwa, nave soowara sawe saaheela* ntoko omwaleela.
3 Mootutuxa yaahooneya wa yaawo Mose ni Eliya epacerya oloca ni yoowo.
4 Voocharela, Petru aaloca wa Yesu ariki: “Pwiya, ti yaphaama wi nikhale wenno. Mwachuna, kinahaala opaka mixakala miraru vaava, mmoha wawinyu, mukina wa Mose ni mukina wa Eliya.”
5 Arikimuloca hiiha, naahooneya neeku nawaarya nenlo naahuruwenle, nave naahiiweya nsu muneekuni nriki: “Ola ti Mwanaka, kinamusivelaaka, yoowo kinamweemereryaaka. Munwiriyaneke.”
6 Yiiwalaaya masu yaala, oohuserya yaahuuwela vathi, ni woova otokweene.
7 Hiihaa, Yesu aawaacamela, aatannya alocaka: “Vinyani. Muhoove.”
8 Yaaviihalaaya miru saya hiyaamoonne muchu, pahiru Yesu mukhateiye.
9 Ekhuruwaka omwaako, Yesu aahaalopola ariki: “Muhimuleele muchu vooloca sa yeeyo monnaanyu, ophiyerya Mwaana a muchu aviihiwe mookhwani.”
10 Mwawiihiiha, oohuserya yaamukoha eriki: “Vano, ntakhara heeni alipa oorepa analocaaya wi Eliya toni apacerye orwa ahaakumve ophiya Kristu?”
11 Yesu aawaakhula ariki: “Eparipari, Eliya onamurwa wi arehererye ichu soothene.
12 Nyenya kinnooleelaani wi Eliya oorwa, nto awo hiyaamusuwenle, emweerela ichu soothene yaachunaaya. Hiihaa tho, Mwaana a muchu onarwa ahooxiwa ti yaawo.”
13 Vaavaanto oohuserya ti yaasuwenlaaya wi owo aamuloca Yohani Mpatisi.
14 Yaaphiyalaaya waariwo muloko* wa achu, mulopwana mmoha aamwaacamela Yesu, amukokhorela, aloca ariki:
15 “Pwiya, mummorele ikharari mwanaka amwaamulopwana, orino ecilecile nave onnatepa ohooxeya. Ikwaha sincipale onnamorela vaikho, vakina vaya mmaahini.
16 Kaamukeriha wa oohuserya anyu, nto hawenrye ompenuxa.”
17 Yesu aahi: “Muyareriwo woohiroromela ni woohuwela, ophiyerya liini kineeraaka kititelele okhala ni nyuwo? Kini koovileleeni ophiyerya liini? Mmuruuhe va.”
18 Voocharela, Yesu aasamela nsololo nave nlo naakhuma mwa mmiravo. Ovinyerya elukuluku ene yeele, mmiravo aapenuwa.
19 Oohuserya yaamwaacamela Yesu vameekhaaya emukoha: “Ntakhara heeni nihiwenryaahu wiikara nsololo?”
20 Owo aawaakhula: “Nthowa na okhalano nroromelo tonto. Chiri kinnooleelaani wi, wakhala wi mookhalano nroromelo ntoko mwaammiso wa mustarta, muni munaamulocela mwaako ola, ‘Othaame oye vale,’ nave owo onamuthaama. Hiyaavo muneeraanyu muhiweryeke.”
21 *——
22 Yaathukumannaaya o Kalileya, Yesu aaloca wa oohuserya awe: “Mwaana a muchu onamveleeliwa mmatani mwa amwiicani awe,
23 awo anammwiipha, nave mu nihiku naneeraru, onamviihiwa mookhwani.” Nave oohuserya yaatepa othanana.
24 Emanle ophiya o Kafarnawu, alipa ooliviha muxokho wa itrakima piili* mu empa ya Muluku yaamwaacamela Petru emukoha eriki: “Apwanne muhusiha anyu onnaliva muxokho?”
25 Owo aahaakhula: “Aa, onnaliva.” Mwawiihiiha, Petru arikimvolowaru mpa, Yesu taapacenrye omukoha ii: “Onoona hai, Simoni? Mamwene a elapo yavathi anaakhela sooliviha naari muxokho wawani? Wa anaaya naari wa achu akina?”
26 Petru aamwaakhula: “Wa achu akina.” Nto Yesu aahi: “Ti yeeyo, mwawiihiiha anamwane hanaliva.
27 Nyenya wi nihaakwaculihe, oye ophareya wamese. Ehopa yoopacerya eni emmirye nancoolo, ophare nave ohule eyano aya, onamphwanyamo ekhorowa ya eparata.* Okuxe wi oliveno muxokho aka ni wawaa.”
Inoota
^ Naari: “saanaarya.”
^ Naari: “mucici.”
^ Eversikulu ela henaphwanyeya mu soorepa sakhalai, nave woonaru henapaka makupa a Soorempwa sooveereliwa.
^ Nlivelo na muteko wa mahiku meeli.
^ Mu Ekriki, “ekhorowa ya estater,” akhweya yaari tetratrakima.
