Mateyu 26:1-75
-
Ahooleli aalipa a mukucho annavaanela meerelo a omwiipha Yesu (1-5)
-
Makhurwa awunkhela annamiineliwa Yesu (6-13)
-
Paska ookuchula ni mulipa omveleela (14-25)
-
Opaceryihiwa wa Mukonelo wa Apwiya (26-30)
-
Okhooca wa Petru onnalociwa mwa miririmu (31-35)
-
Yesu onnavekela o Ketsemani (36-46)
-
Ophariwa wa Yesu (47-56)
-
Othorihiwa o Sineetriyu (57-68)
-
Petru onnamukhooca Yesu (69-75)
26 Vano, Yesu aamalinheiye oloca ichu seiha soothene, aahi wa oohuserya awe:
2 “Moosuwela wi ahanle mahiku meeli wi niphiye nihiku na Paska, nave Mwaana a muchu onamveleeliwa wi iiphiwe va mwirini.”
3 Elukuluku yeeyo, ahooleli a alipa a mukucho ni asitokweene aachu, yaahithukumana vaate va mulipa a mukucho mutokweene, yoowo iichaniwa Kayafa.
4 Yaathukumana vamoha enavaanela meerelo a omphara Yesu mwamiruku nave wi emwiiphe.
5 Nyenya, awo yaanaloca: “Ehikhale elukuluku ya efesta, wi ohikhalevo mukhico variyari va achu.”
6 Vaavaa Yesu aareiye o Petaniya vaate va Simoni, yoowo khalai aarino mareca,
7 aarwa muthiyana akunxe nipotoro na alapastru, yaarimo makhurwa awunkhela, amwaacamela Yesu nave apacerya ommiinela vamuru vawe elukuluku aalyeiye.*
8 Yoonnaaya yeela, oohuserya hiyaasiveliweno nave eloca eriki: “Makhurwa ala anayeehereliwa heeni?
9 Woona wi yaaphwanela otumihiwa ni ikhorowa sincipale, nave ikhorowa sene evahiwe alipa oohaawa.”
10 Asuwelaka yeela, Yesu aahi wa yaawo: “Ntakhara heeni munamuukhulaanyu muthiyana? Ola okeerenle echu yaphaama.
11 Tiwi achu oohaawa eni enakhala ni nyuwo mahiku oothene, nto miyo nkikhala ni nyuwo mahiku oothene.
12 Vaavaa muthiyana ola oyeehenreiye makhurwa awunkhela mwiili aka, eerenle yeela wi akirehererye ntakhara ovithiwa waka.
13 Chiri kinnooleelaani wi, mu elapo yoothene weiwo michaka saphaama seiha ineeraaya ilaleeryiwewo, yeeyo muthiyana ola eenreiye, ekaamulociwa uupuweliwaka yoowo.”
14 Voocharela, mmoha a oohuserya Khumi Napiili, awiichaniwa Yutasi Iskariyoti aaya wa ahooleli a alipa a mukucho,
15 aloca ariki: “Tiheeni munayaanyu okivaha wi kimveleele yoowo wa nyuwo?” Awo yaalakana omwinnya ikhorowa makhumi mararu sa eparata.
16 Ovinyerya nihiku nenle, owo aanaavya ekari ya omveleela Yesu.
17 Mu nihiku noopacerya na Efesta ya Ipaau Soohiheliwa Yooruruvaliha, oohuserya yaahirwa wa Yesu emukoha eriki: “Munachuna wi narehererye woowi wi mwamulyewo Paska?”
18 Owo aawaakhula: “Muye opooma, nave munammuphwanya nexe, muloce ni yoowo muriki: ‘Muhusiha oriye: “Elukuluku aka yohaacamela; kinahaala omulya Paska ni oohuserya aka vaate vaa.”’”
19 Mwawiihiiha, oohuserya yaaheerano ntoko Yesu aaleelihenryeiye nave yaamurehererya Paska.
20 Wiilalaayavo, Yesu aahaamela meesa vamoha ni oohuserya awe khumi napiili.
21 Elyaaka hiihale, Yesu aaloca ariki: “Chiri kinnooleelaani wi, mmoha a nyuwo onamukiveleela.”
22 Oohuserya yaahitepa othanana ni yeeyo, nave mmoha ti mmoha aapacerya omukoha: “Pwiya, apwanne ti miyaano?”
23 Yesu aawaakhula ariki: “Yoowo onarerya vamoha ni miyo mparathoni ti yoowo oni akiveleele.
24 Eparipari, Mwaana a muchu onampwahavo, hiiha ntoko erempwaaya vooloca sa yoowo, nto ootakhaliwa ti yoowo oni amveleele Mwaana a muchu! Yaamukhala yaphaama wa muchu yoowo ahiyariweru.”
25 Yutasi, yoowo aahaala omveleela, aamukoha: “Rapi, apwanne ti miyo?” Yesu aamwaakhula ariki: “Ti yeeyo omanlaawe oloca.”
26 Erikimulya hiihale, Yesu aakuxa epaau, nave amanle oreeliha aakawanya, aavaha oohuserya ariki: “Kuxani, lyaani. Ela eneemelela mwiili aka.”
27 Nave aamukunxeiye koopho a eviinyu, aahivekela nave aavaha yaawo ariki: “Nwurye ela, oothene nyuwo,
28 ela eneemelela ‘nikhami na waataana’ nnarwa wa miyo, nenlo nnahaala oyeehiwa wi ileveleliwe soocheka sa ancipale.
29 Nto kinnooleelaani: Nkirwa kiwurya wanaawiili yawiima yeela ya uuva* ophiyerya nihiku nenlo kineeraaka kiwurye evyaani vamoha ni nyuwo mu Omwene wa Atiithi aka.”
30 Wuukuchulani, emanle wiipa macipo oomucicimihano Muluku,* yaacimula eyaaka o Mwaako wa Asitona.
31 Yesu aahi wa yaawo: “Wa nthowa na yeeyo eni yeereye ni miyo ohiyu yoola, oothene nyuwo munamukwaculeya, vawi yoorempwa: ‘Kinammwiipha mukukhula, nave muhuwo wa ipucepuche onammwalamwala.’
32 Nto kimanle oviihiwa mookhwani, kinamuya ohoolo wanyu o Kalileya.”
33 Nyenya Petru, aamwaakhula ariki: “Naamwi oothene akina ekwaculen’ye wa nthowa na yeeyo eni yeereye ni nyuwo, miyaano nkirwa kikwaculeya!”
34 Yesu aahi wa yoowo: “Chiri kinnooleela wi, ohiyu yoola, muthupi ohaakumve wiipa, weyaano onamukikhooca ikwaha raru.”
35 Petru aaloca ii: “Naari erimwiiwa wi kikhwe ni nyuwo, nkirwa kookhoocaani.” Oohuserya oothene akina yaaloca emohamoha.
36 Voocharela, Yesu ni oohuserya awe yaahiphiya o nipuro nawiichaniwa Ketsemani, nave aahi wa yaawo: “Mukiraathi vaava, kinaya iwe wi kavekele.”
37 Nave aamukunxeiye Petru ni anamwane eeli a Sepeteyu, aapacerya othanana ni wuukhuwa vancipale.
38 Mwawiihiiha, owo aaloca ni yaawo: “Murima aka* wootepa othanana ophiyerya okhwa. Mukhale vaava nave mutitelele olipelela ni miyo.”
39 Nave eenceiye vakhaani, owo aakokhora uuramela vathi, anavekela ariki: “Tiithi, wakhala wooweryeya, mweerihe wi koopho ola apwahevo wa miyo. Nto oheereye okhwela waka, nyenya okhwela wanyu.”
40 Owo aahikooka aaphwanya oohuserya erikimurupa, nave aaloca wa Petru ii: “Hamunawerya otitelela olipelela ni miyo mu ewora emoha mano?
41 Mutitelele olipelela nave mvekeleke moohihiyererya, wi muhuuwele mu weehiwani. Mweeparipari, munepa onnakhwela,* nto mwiili ti wooceecheya.”
42 Mu ekwaha yanaawiili, owo aapwaha nave avekela ii: “Tiithi, waahiweryeyaka wi koopho ola apwahevo kihinwunrye, weereye ntoko okhwela wanyu.”
43 Aakookela tho wa yaawo aaphwanya erikimurupa, ntakhara miitho aya yaanaalimela.
44 Mwawiihiiha, aahaahiya vaavale, acimula wi avekele ekwaha yaneeraru, alocaka echu emohamoha.
45 Hiihaa, aakookela wa oohuserya, alocano ariki: “Elukuluku si yeela munamurupa ni wiichuuwa! Onani! Ennaacamela ewora wi Mwaana a muchu aveleeliwe mmatani mwa alipa oocheka.
46 Vinyani, nipwaheke. Onani! Yoole oni akiveleele onnaacamela.”
47 Yesu arikimuloca hiihale, Yutasi mmoha a oohuserya Khumi Napiili, aarwa vamoha ni muloko* wa achu epharenle masipaaca ni ikopo, erummwale ni ahooleli a alipa a mukucho ni asitokweene aachu.
48 Yoole aahaala omveleela, aahaavaha eneneeryo ariki: “Yoowo kineeraaka kimvahe epeexu,* ti yoowo; mumphare.”
49 Mwawiihiiha, Yutasi aaya wa Yesu, aloca: “Mooni, Rapi!” nave amvaha epeexu.*
50 Nyenya Yesu aamukoha: “Nthamwene, orweenleni vaava?” Mwawiihiiha, achu yaale yaarwa emphara Yesu ni emmaka.
51 Nto moohilekela, mmoha a yaale aari ni Yesu aahookola ntata nawe, ahulula nsipaaca nave akwasa naaru na kapuro a mulipa a mukucho mutokweene.
52 Yesu aaloca ni yoowo: “Okookiherye nsipaaca mu nipuroni mwaya, woona wi oothene yaale anakuxa nsipaaca, eni ekhwe ni nsipaaca.
53 Akhweya onuupuwela wi miyaano nkinawerya waaveka Atiithi aka wi ekirumihele hiihaano vaava, macikhwi macikhweene* a ankeelo?
54 Keerano hiiha, inii sikhwaanele hai Soorepa seiho inaloca wi ichu sinaphwanela weereya mmukhalelo yoola?”
55 Mu elukuluku yeele, Yesu aaloca wa muloko: “Nyuwaano munarweela okiphara, murino masipaaca ni ikopo ntoko wi ka mpava? Nihiku nnihiku kaanakiraathi mu empa ya Muluku kihusihaka, nto nyuwaano himwaakiphanre.
56 Nyenya soothene iha soheereya wi saakhwanele seiho saarempwe* ni alipa a miririmu.” Voocharela, oohuserya oothene yaamuhiya nave echawa.
57 Yaale yaamphanre Yesu, yaamukeriha wa Kayafa mulipa a mukucho mutokweene, weiwo alipa oorepa ni asitokweene yaathukumannaayawo.
58 Nto Petru aatitelela omuchara ari ocaicai, ophiyerya vaate va mulipa a mukucho mutokweene, nave aavolonweiye, aakiraathi vamoha ni anamuteko achunaka woona yeeyo yaahaala weereya.
59 Ahooleli a alipa a mukucho ni Sineetriyu* oothene, yaanawaavya anamoona awootha wi emootherye Yesu ni yoolakelela ya omwiipha.
60 Nyenya awo hiyaaphwannye nthowa wa yoowo, naamwi yaarivo anamoona awootha ancipale. Ohoolo waya yaaphiya achu apiili
61 eloca: “Mulopwana ola oriye: ‘Miyo kinanwerya okumula empa ya Muluku ni oteka mmahiku mararu.’”
62 Mwawiihiiha, mulipa a mukucho mutokweene aavinya aloca ni Yesu ariki: “Weyaano honaakhularu echu? Apwanne honiiwa yeeyo achu ala anoosomelaaya?”
63 Nto Yesu aatitelela omaala. Voocharela, mulipa a mukucho mutokweene aaloca wa Yesu ariki: “Kinnoolipeliha mu nsina na Muluku mukumi, wi onileele waakhanle wi wa Kristu, Mwaana a Muluku!”
64 Yesu aahi: “Mulonce yeeyo mukhatiinyu. Nyenya kinnooleelaani wi: Ovinyerya hiihaano oya muhoolo, munammoona Mwaana a muchu akiraanthe omoono woolopwana wa Muluku Aikuru Soothene, arwaaka mmeekuni wirimu.”
65 Mulipa a mukucho mutokweene aahaahula soowara sawe, alocaka: “Oonyemula! Apwanne annachuneya anamoona akina? Onani! Mohiiwa hiihaano omunyemula wawe Muluku.
66 Vano munoona hai?” Awo yaahaakhula: “Owo onaphwanela okhwa.”
67 Voocharela, yaamutaphera mara owanoni wawe, emphutula.* Akina yaamvaha mapuraata owanoni,
68 eriki: “We Kristu, anyiherya wa hiyo. Taani oomanne?”
69 Petru akiraanthe vaate vaavale, aarwa wa yoowo namuteko mmoha amwaamuthiyana alocano ariki: “Weyaano tho waari ni Yesu Mukalileya!”
70 Nto Petru aakhooca vamiithoni va achu oothene, ariki: “Nkinasuwela echu onalocaawe.”
71 Vaavaa owo aapwanheiyevo aya waacamela va mulako, namuteko mukina amwaamuthiyana aamoona nave aloca wa yaale yaari vaavale ariki: “Mulopwana ola aari vamoha ni Yesu Munaasareti.”
72 Owo aahuuluula okhooca alipelaka: “Nkimusuwenleru mulopwana yoowo!”
73 Evinre elukuluku vakhaani, yaale yaari vaavale yaamwaacamela Petru, eloca eriki: “Chiryene, weyo tho wa mmoha a yaale, woona wi malocelo* aa annooniherya yeeyo.”
74 Mwawiihiiha, aapacerya wiisuulumela alipelaka: “Miyaano nkimusuwenleru mulopwana yoowo!” Nave moohilekela muthupi waahiipa.
75 Mwawiihiiha, Petru aahuupuwela yeeyo Yesu aalonceiye ariki: “Muthupi ohaakumve wiipa, weyaano onamukikhooca ikwaha raru.” Mwa yeeyo, owo aakhumela vaate nave aahinla vancipale ni osooseya murima.
Inoota
^ Naari: “aahaamenleiye meesa.”
^ Naari: “mpesa.”
^ Naari: “owiipa a salmu.”
^ Naari: “Okumi aka.”
^ Naari: “ti wooreheryeya ene.”
^ Naari: “mucici.”
^ Naari: “kimunuule.”
^ Naari: “amunuula.”
^ Mu Ekriki, “ilexiyawu 12.”
^ Naari: “Soorepa sa.”
^ Moone Masu Atharihiwe.
^ Naari: “enamvaha ekhoronya.”
^ Naari: “mukhalelo aa wa oloca.”
