Mateyu 5:1-48
-
MWAHA WA VAMWAAKONI (1-48)
5 Yesu onneiye muloko* wa achu, aawela omwaako; aakirantheiye, oohuserya awe yaamwaacamela.
2 Voocharela, owo aapacerya oloca, anaahusiha ariki:
3 “Oohakalala taale anasuwela soothowa saya soomunepani,* woona wi Omwene wa wirimu ti wawaya.
4 “Oohakalala taale anathanana, woona wi enarwa ehakararyiwa.
5 “Oohakalala taale awiiyeviha,* woona wi enarwa yaakhela elapo yavathi.
6 “Oohakalala taale oovoliwa ni a nthanana nthowa na ochuna wookololowa, woona wi enarwa evona.*
7 “Oohakalala taale a ikharari, woona wi enarwa emoreliwa ikharari.
8 “Oohakalala taale aweela murima, woona wi enarwa emoona Muluku.
9 “Oohakalala taale anapaka murecele,* woona wi enarwa yiichaniwa anamwane a Muluku.
10 “Oohakalala taale anahooxiwa nthowa na wookololowa, woona wi Omwene wa wirimu ti wawaya.
11 “Oohakalala ti nyuwo vaavaa achu anooruwanaayaani, woohooxaani, owootheryaani, ni woolocelaani ichu soothene soonanara, wa nthowa na miyo.
12 Hakalalani nave chapani, woona wi nchuwelo nanyu ntokweene wirimu; hiihaa tho yaahooxiwa alipa a miririmu yaarivovo nyuwo muhaakumve oyariwa.
13 “Nyuwo mwa maakha* a veelaponi, nto wakhala wi maakha aayeleela osiva waya, eni ekookiheryiwe hai osiva waya? Haano mphurelo, pahiru ori oyeeha wi enyikaliweke taachu.
14 “Nyuwo mwa omwaleela wa elapo. Epooma eri vamwaakoni henawerya ovitheya.
15 Haavo onapariha epanthi nave akhuneela ni mucanka,* nyenya onnakuha vanipuroni nawooneya wi yaamwaleeleke achu oothene ari mpa.
16 Hiihaa tho, mweerihe wi omwaleela wanyu waaryeke vamiithoni va achu, wi vawoona miteko sanyu saphaama, yaacicimihe Atiithi anyu ari wirimu.
17 “Muhuupuwele wi kirwenle omaliha Nlamulo naari masu a Alipa a Miririmu. Nkirweenle omaliha, nto waakhwaniherya.
18 Chiri kinnooleelaani wi, naamwi erimu ni elapo yavathi evinre, muceka mukhaanixa naari ethoka emoha ya masu a Nlamulo, hirwa ixipha, ophiyerya ichu soothene saakhwanenle.
19 Mwawiihiiha, yoole oni achekele nlamulo nikhaani na malamulo yaala ni waahusiha akina weerano emohamoha, onarwa eeriwa mukhaani mu Omwene wa wirimu. Nyenya yoole onachariha ni waahusiha akina onarwa eeriwa mutokotoko mu Omwene wa wirimu.
20 Chiri kinnooleelaani wi, wakhala wi wookololowa wanyu hopwanhe wa alipa oorepa ni Afarisi, himurwa mvolowa mu Omwene wa wirimu.
21 “Mohiiwa yeeyo yaalociwe khalai wa makholo anyu: ‘Ohiiphe, nto yoole oni iiphe onarwa aakhula mulacu o nipuro na othoriha.’
22 Nyenya, kinnooleelaani wi yoole onatitelela onanariwa ni munnawe onarwa aakhula mulacu o nipuro na othoriha; nave yoole oni amuruwane munnawe, onarwa aakhula mulacu o nipuro Ntokweene na Othoriha; nto yoole oni amulocele munnawe ariki: ‘Naanepa we!’ onarwa ariheliwa o Kehena.*
23 “Nyenya, wakhala wi wookuxa yoovaha aa wi waveleele va altare, nave ori vaavale wuupuwela wi wookhalano mulacu ni munnaa,
24 ohiye vaavale yoovahaa ohoolo wa altare, nave hawe, wapacerye waataana ni munnaa. Nto wakooka, oveleele yoovahaa.
25 “Waakuve omaliha mulacu ni mwiicani aa vaavaa munayaanyu o nipuro na othorihiwa, wi mwiicani aa ahooveleele wa mulipa oothoriha, nave mulipa oothoriha ooveleele wa mpiliisa, nave owaleliwe mukariposo.
26 Chiri kinnooleela: Horwa okhumamo ophiyerya omulimve mwaakhorowa* aa ookuchulela.
27 “Mohiiwa yeeyo yaalociwe: ‘Ohiraruwe.’
28 Nto kinnooleelaani wi, oothene yoole onatitelela onweha muthiyana ophiyerya okhalano nchuno na okonano, ooraruwano mmurimani mwawe.
29 Vano, wakhala wi niitho naa noolopwana ninnookwaculiha, owosole nave orihele okhwipi. Vawi ti waphaama oyeleela echu emoha ya mmwiilini mwaa, ohiya wi mwiili aa woothene oriheliwe o Kehena.*
30 Nave tho, wakhala wi ntata naa noolopwana ninnookwaculiha, okwate nave orihele okhwipi. Vawi ti waphaama oyeleela echu emoha ya mmwiilini mwaa, ohiya wi mwiili aa woothene oriheliwe o Kehena.*
31 “Ohiya yeeyoru, yaalociwa tho wi: ‘Yoole onamwalana ni mwaariye, amunnye ekaarata ya omwalanano.’
32 Nyenya kinnooleelaani wi yoole onamwalana ni mwaariye voohikhala nthowa na ocapaheya,* onnamweeriha mwaariye opaka mararuwo, nave tho yoole onamuthela muthiyana omwalanne ni iyawe, onamuraruwano.
33 “Mohiiwa tho yeeyo yaalociwe khalai wa makholo anyu: ‘Ohilipele mahaleene, nto waakhwaniherye malakano opankaawe wa Yehova.’
34 Nyenya miyo kinnaloca ni nyuwo: Muhilipeleru, naari muromolaka erimu, woona wi munyukhu wa Muluku ori weiwo;
35 naari muromolaka elapo yavathi, woona wi enyikalelo ya inaani sawe; naari Yerusalemu, woona wi epooma ya Mwene mutokotoko.
36 Muhilipeleke muromolaka muru anyu, woona wi hamunawerya weeliha naari oriipiha miihi.
37 Mweerihe wi masu anyu ‘Aa’ ekhale aa, ‘Hooye’ anyu akhale hooye; masu oothene anapwaha yaala, anarweela wa mutakhali.
38 “Mohiiwa yeeyo yaalociwe: ‘Niitho nniitho nave niino nniino.’
39 Nyenya, miyo kinnooleelaani: Muhinleke ikuhu ni mulipa oonanara, nto yoole oni oomane nrama naa noolopwana, omurukunuxele nikina.
40 Nave wakhala wi muchu onachuna wookeriha o nipuro na othoriha wi akuxe yoowara aa, omuhiyerye tho yoowara ekina owanraawe;
41 nave wakhala wi muchu orino owerya ohookhinyeererya wi omuhoole mastatiya mamoha, omuhoole mastatiya meeli.
42 Omvahe yoole onooveka, nave ohimuchawe yoole onachuna woopoleya echu.*
43 “Mohiiwa yeeyo yaalociwe: ‘Omusiveleke mwaacamani aa nave omwiiceke mwiicani aa.’
44 Nyenya miyo kinnooleelaani: Mutitelele waasivela amwiicani anyu ni waavekelela yaale anoohooxaani,
45 hiihaa, munamooneiha wi mwa anamwane a Atiithi anyu ari wirimu, woona wi awo annakumiha nsuwa naya wa achu oonanara murima ni aphaama nave annarupiha epula wa awookololowa ni oohookololowa.
46 Nto, wakhala wi munaasivela pahi yaale anoosivelaani, nchuwelo taani munaakhelaanyu? Tahi yeeyo aneeraaya tho alipa ooliviha muxokho?
47 Nave, wakhala wi munaalocela asinninyuru, munoona wi moheera echu yaphaamaxa? Tahi yeeyo tho amalapo aneeraaya?
48 Mwawiihiiha, munaphwanela okhala oophaameya,* hiiha ntoko Atiithi anyu ari wirimu aryaaya oophaameya.
Inoota
^ Naari: “mucici.”
^ Naari: “anasuwela wi ti woochuneya ohooleliwa ni Muluku.”
^ Naari: “awiichacala.”
^ Naari: “yaakhwaniheryiwa soochuna saya.”
^ Naari: “anatikitherya murecele.”
^ Naari: “mwaapa.”
^ Naari: “mucanka woophimano.”
^ Nipuro seeyeliwawo ikokhola, okhipi wa epooma yo Yerusalemu. Moone Masu Atharihiwe.
^ Mu Ekriki, “ekwatranti yookuchula.”
^ Moone Masu Atharihiwe.
^ Moone Masu Atharihiwe.
^ Mu Ekriki, “porneiya.” Moone Masu Atharihiwe.
^ Ela tiwi, opoleya ahiyaaka okookiha mwawaaceererya.
^ Naari: “awaakhwanela.” Ela ti wi, wooniherya osivela wawaakhwanela.
