Salmu 109:1-31
Wa muhooleli a macipo. Salmu a Tavite.
109 Khwoo Muluku, yoowo kinamucicimihaaka, muhimaale.
2 Tiwi achu oonanara murima ni oowoka annakiloca.
Awo annaloca sawootha vooloca sa miyo;
3 Awo annakirica ni masu awiica,Nave annakihiphela nihirivo nthowa.
4 Eraceelihaka osivela waka, awo annakiica;Nto miyo kinnatitelela ovekela.
5 Annakikookiherya yoonanara wa yaphaama,Nave osivela waka ni wiica.
6 Owo athorihiwe ni muchu ootakhala;Omoono awe woolopwana akhalewo muchu omwaakaaha.*
7 Owo aphwanyeriwe nthowa* vaavaa onathorihiweiye;Ophiyerya tho wi nivekelo nawe nooniwe okhala yoocheka.
8 Mahiku awe ekhale avakhaani;Otokweene awe okuxiwe ni muchu mukina.
9 Anaawe ekhale ikwaasuni,*Nave amwaariye ekhale naamukhwele.
10 Anamwane awe ehuwahuweke ntoko achu oovekaveka;Ekhumeke mu ipa saya seiho ikumuliwe eyaaka waavya yoolya.
11 Yoowo aampoleihale akuse* soothene owo oreiyeno,Nave achu oohisuwanyeya emwaakhe sookhalano sawe.
12 Ahikhale ani amukhalihe mooreera murima,*Nave ahikhale ani awooniherye mahala anamwane awe yaawo ari ikwaasuni.
13 Muyareriwo awe otoloxiwe;Nsina naya nxipihiwe mmuyareriwo woocharela.
14 Yehova uupuwele yoohesa ya makholo awe,Nave yoocheka ya amamaawe ehicipihiwe.
15 Yehova uupuweleleke ilukuluku soothene yeeyo awo apankaayaNave amalihe wuupuweleliwa waya veelaponi.
16 Tiwi muchu yoola huupuwenle wooniherya oreera murima,*Nto aanamwiikara yoole oohooxiwa, oohaawa, ni a murima woothananaWi amwiiphe.
17 Owo aanasiveliwa wuulumela, mwawiihiiha wuulumela woommorela yoowo;Nave haarino nchuno na oreeliha, mwawiihiiha owo tho haakhenle mareeliho;
18 Owo aanawara wuulumela ntoko yoowara.
Owo waavolowa mmwiilini mwawe ntoko maahi,Waavolowa mmakhuva awe ntoko makhurwa.
19 Wuulumeliwa wawe okhale ntoko yoowara yeeyo oniikhuneeleiyenoNave ntoko esintu yeeyo ilukuluku soothene emakeleliwe muyuununi mwawe.
20 Ela yoolivela yoorweela wa Yehova wa yaale anakaakaahaNi wa yaale anakilocela* ichu soonanara.
21 Nto nyuwo, khwoo Yehova, Pwiya Ooweryaxa,Mweerevo echu ntakhara miyo wa nthowa na nsina nanyu.
Mukaakihe nthowa nawi osivela wanyu woororomeleya ti waphaama.
22 Tiwi, nkaano ookikhaviherya, nave koohaawa,Nave mpuwa mwaka, murima aka woophoreihiwa.
23 Kinnakokhowa ntoko muuruusi yoowo onacakanela;Kooriheliwa ocai ntoko musope.
24 Makhuva aka annaceecheya nthowa na wiinanela olya;Kohooca nave koomalavo.*
25 Kookhala echu yoonyemuwa wa yaawo,Yakoona, annacikinya muru.
26 Mukikhaviherye, khwoo Yehova, Muluku aka;Mukivuluxe ni osivela wanyu woororomeleya.
27 Awo esuwele wi naari ntata nanyu,Wi mwaari nyuwo mweenrevo echu, khwoo Yehova.
28 Awo eloce wuulumela; nto nyuwo mareeliho.
Yakivinyerya, yuulihiwe muru,Nto mulapeli anyu ahakalale.
29 Yaale anakaakaaha ewarihiwe wuuliheya muru;Ekhuneeliwe ni wuuliheya muru, ntoko yoowara.*
30 Eyano aka enahaala omucicimiha Yehova moolucuwa;Kinahaala omucicimiha ohoolo wa mucici muncipale.
31 Tiwi owo onahaala okhala omoono woolopwana wa oohaawaWi amvuluxe wa yaale anamuthoriha moohookololowa.*
Inoota
^ Naari: “oomusomela.”
^ Naari: “eeriwe okhala ootakhala.”
^ Naari: “anamwane ahirino apapaaya.”
^ Naari: “Yaale yaampoleihale ereye miraakho wa.”
^ Naari: “mu osivela woororomeleya.”
^ Naari: “osivela woororomeleya.”
^ Naari: “analocela okumi aka.”
^ Mu Ehepiri, “Ethai aka yohooca; hiyaano paanya (makhurwa).”
^ Naari: “yoowara ehirino miwono.”
^ Naari: “anathoriha okumi awe moohookololowa.”
