Salmu 138:1-8
Salmu a Tavite.
138 Kinamoocicimihaani ni murima aka woothene.
Variyari va amiluku akina,Kinamwiipa macipo a woocicimihaani nyuwo.*
2 Kinamukokhora kiwehaka o empa anyu yaweela,*Nave kinamucicimiha nsina nanyuWa nthowa na osivela wanyu woororomeleya ni ororomeleya wanyu.
Vawi opwaha soothene moovuwiha masu anyu ni nsina nanyu.
3 Mu nihiku nenlo kiichannaaka, nyuwo mwaakaakhula;Mwaakeeriha okhala oolipa murima* ni akuru.
4 Mamwene oothene a veelaponi yavathi anamoocicimihaani, khwoo Yehova,Woona wi anamwiiwa soororomeliha muloncaanyu.
5 Awo anamwiipa vooloca sa iphiro sa Yehova,Woona wi ovuwa wa Yehova otokweene.
6 Naamwi Yehova ari a vasulu, owo onnanweha awiiyeviha.
Nto muchu awiikhoma pahiru owo onamusuwela ocaicai.
7 Naamwi keecaka variyari va yawoopiha, nyuwo munamukikhapelela.
Nyuwo munnapharihela ntata nanyu noowerya wi nwane ni amwiicani aka oowali;Ntata nanyu noolopwana nnamukivuluxa.
8 Yehova onamukeerela soothene.
Khwoo Yehova, osivela wanyu woororomeleya onniikhalelaru okhala wookhala.
Muhinyanyale muteko wa matata anyu.
Inoota
^ Naari akhweya: “Kinamoopakelaani ncipo kivaanyihanaka ni amuluku akina.”
^ Naari: “mu nipuro nanyu naweela.”
^ Naari: “oolipa murima mu okumi aka.”
