Salmu 28:1-9
-
Nivekelo na mulipa a masalumu ninniiwiwa
-
“Yehova ti ikuru saka ni eyaakiho aka” (7)
-
Salmu a Tavite.
28 Kinnakhuwela wa nyuwaano moohihiyererya, khwoo Yehova, Mwala aka;Muhihiye okiiwa.*
Mwamaalaru,Kinahaala okhala ntoko yaale anakhuruwela onlicini.*
2 Mwiiwe mavekelo aka a vathi va murima vaavaa kinakhuwelaaka wa nyuwo ntakhara nikhaviheryo,Vaavaa kinaviihaaka matata aka kiwehaka mu esaala ya mpuwa ya nipuro nanyu naweela.
3 Muhikipurule vamoha ni achu ootakhala, vamoha ni yaale anapaka ichu soonanara,Yaale analoca masu a murecele ni nthamwene aya, eniiha mmurimani mwaya orimo ichu soonanara.
4 Mwaakookiherye mwawiiwanana ni saweera saya,Mwawiiwanana ni miteko saya soonanara,Mwaakookiherye mwawiiwanana ni muteko wa matata aya,Mwawiiwanana ni yeeyo awo anapakaaya.
5 Tiwi hanapwacha miteko sa Yehova,Naari mano miteko sa matata awe.
Owo onanwuuwiha nave harwa aaviiha.
6 Yehova acicimihiwe,Woona wi ohiiwa mavekelo aka a vathi va murima ntakhara nikhaviheryo.
7 Yehova ti ikuru saka ni eyaakiho aka;Murima aka onnamuroromela yoowo.
Kohaakhela nikhaviheryo nawe, nave murima aka onnahakalala;Mwawiihiiha, kinarwa kimucicimiha ni ncipo naka.
8 Yehova tonavaha ikuru nloko nawe;Owo nipuro noolipihiwa nnaruuha nivuluxo ntokweene wa oothanliwa awe.
9 Mvuluxe nloko nanyu nave mureelihe yoohiyeryiwa anyu.
Mwaakukhule nave mwaateexe mmiwononi mwanyu okhala wookhala.
