Salmu 57:1-11
Wa muhooleli a macipo; ni ncipo nniichaniwa “Muhikitoloxe.” Salmu a Tavite. Mikitawu.* Vaavaa owo aachawenleiye onikhukuni amuchawaka Sawuli.
57 Mukooniherye mahala, khwoo Muluku, mukooniherye mahala,Woona wi kinachawela* wa nyuwo;Kinnachawela mmuurusi wa muuphelo anyu ophiyerya evinre makacamiho.
2 Kinnakhuwela wa Muluku, Awiirimurimu,Wa Muluku eeparipari, wi amalihe yaawo wa nthowa naka.
3 Owo onamurumiha nikhaviheryo ovinyerya wirimu nave onamukivuluxa.
Owo onammwaakanyerya yoole onakiikara. (Selaha)
Muluku onamurumiha osivela wawe woororomeleya ni ororomeleya wawe.
4 Koorukureryiwa* ni amwaco,Kinakona veeri va achu yaawo anachuna okikhuura;Miino aya mavaka ni inyakara,Nave nlumi naya nlema naweetha.
5 Mucicimihiwe osulu wa irimu, khwoo Muluku;Ovuwa wanyu okhale veelaponi yoothene ya vathi.
6 Awo aarehererya mulapa wi eheyeno inaani saka;Kohuurama* nthowa na wuukhuwa vancipale.
Aathipa nlici ohoolo waka,Nto yaawo ene temorenlemo. (Selaha)
7 Murima aka wootikitheryeya, khwoo Muluku,Murima aka wootikitheryeya.
Kinarwa kiipa ni opaka macipo.
8 Vinya, ncicimiho naka.
Vinya, weyo ekaruma ya mikoi; weyo tho, chakare.
Kinarwa kivinya wooxixelo ene.
9 Kinarwa koocicimihaani variyari va achu, khwoo Yehova;Kinarwa kiipa macipo a woocicimihaani* nyuwo variyari va maloko.
10 Tiwi, osivela wanyu woororomeleya otokweene, onnaphiya wirimu,Nave ororomeleya wanyu onnaphiya mmahurukuni.
11 Mucicimihiwe osulu wa irimu, khwoo Muluku;Ovuwa wanyu okhale veelaponi yoothene ya vathi.
Inoota
^ Moone Masu Atharihiwe.
^ Naari: “okumi aka onnachawela.”
^ Naari: “Okumi aka woorukureryiwa.”
^ Naari: “Okumi aka wohuurama.”
^ Naari: “Kinarwa koopakelaani macipo.”
