Salmu 62:1-12
Wa muhooleli a macipo; a Yetutumi.* Salmu a Tavite.
62 Chiryene, kinnanweherya* Muluku moomaaleleya.
Nivuluxo naka nnarwa wa yoowo.
2 Pahiru owo tori mwala aka ni nivuluxo naka, nipuro naka noochawelavo nookhapeleleya;*Nkirwa kicikinyeya moomalela.
3 Ophiyerya liini muneeraanyu mmuhiphele muchu wi mmwiiphe?
Oothene nyuwo mwa achu awoopiha ntoko exiri enamora, ntoko exiri ya maluku yeeyo ehanle vakhaani okumuwa.*
4 Awo annavaanela wi emmorihe va nipuro nawe na vasulu;*Annasiveliwa wootha.
Annareeliha ni eyano, nto mmurimani mwaya annuulumela. (Selaha)
5 Chiryene, kinnanweherya Muluku moomaaleleya,*Woona wi ewehereryo aka enarwa wa yoowo.
6 Pahiru owo tori mwala aka ni nivuluxo naka, nipuro naka noochawelavo nookhapeleleya;Nkirwa kicikinyeya.
7 Nivuluxo ni ncicimiho naka nnarwa wa Muluku.
Muluku mwala aka woolipa ni woochawelavo vaka.
8 Achu nyu, mmuroromeleke yoowo ilukuluku soothene.
Muhule murima anyu* wa yoowo.
Muluku ti voochawelavo vahu. (Selaha)
9 Anamwane a muchu nwiya pahi,Anamwane a achu etheru ene.
Oothene yakuhiwa va palansani, tooveyaxa opwaha nwiya.
10 Muhiroromeleke waalyela akinaNaari mano okuha ewehereryo yatheru mu wiiya.
Wakhala wi muhakhu anyu wohaacereryeya, muhitikitherye murima anyu mwa yoowo.
11 Muluku ooloca ekwaha emoha, nave koomwiiwa ikwaha piili ariki:
Ikuru ti sawawe Muluku.
12 Osivela woororomeleya ti wawinyu tho, khwoo Yehova,Woona wi munnamukookiherya mmoha ti mmoha mwawiiwanana ni saweera sawe.
Inoota
^ Moone Masu Atharihiwe.
^ Naari: “okumi aka onnanweherya.”
^ Naari: “voochawelavo, va nipuro noocukhuwa.”
^ Naari akhweya: “Oothene nyuwo, enakhala ntoko wi owo exiri enamora, exiri ya maluku ehanle vakhaani okumuwa.”
^ Naari: “ncicimiho nawe.”
^ Naari: “onweherye moomaaleleya weyo okumi aka.”
^ Naari: “Mmiinele mirima sanyu.”
