Salmu 63:1-11
Salmu a Tavite, vaavaa owo aareiye mu ntakhwa no Yuta.
63 Khwoo Muluku, nyuwo muri Muluku aka, kinnatitelela owaavyaani.
Hiiha ntoko muchu onakhaleiyeno nthanana na maahi,Miyaano kookhalano nchuno ntokweene wa nyuwo.
Kiri ooceecheya* wa nthowa na nchuno ntokweene kiryaakano ntakhara nyuwo mu elapo yawuuma ni yookoteene, mwemmo ehirimo maahi.
2 Mwawiihiiha, miyo koowoonaani mu nipuro naweela;Kohoona ikuru sanyu ni ncicimiho nanyu.
3 Osivela wanyu woororomeleya ti waphaama opwaha okumi,Mwa yeeyo, iyano saka sinahaala woocicimihaani.
4 Hiihaa, kinarwa koocicimihaani mu okumi aka woothene;Mu nsina nanyu kinahaala oviiha matata aka.
5 Kiri awaakhwaneliwa* ni makupa aphaama, oothanleliwa* phaama;Mwawiihiiha, iyano saka inahaala wiipa macipo, eyano aka enahaala woocicimihaani.
6 Kinnawuupuwelaani nyuwo vaavaa kinakonaaka;Kinnuupuwelela sa nyuwo variyari va olipelela wa ohiyu.
7 Tiwi nyuwo muri mukhaviheryi aka,Nave kinnakhuwela moohakalala mmuuruxini wa makuphelo anyu.
8 Miyo kinnawaakeelelaani* nyuwo;Ntata nanyu noolopwana ninnakiphareela moolipa.
9 Nto yaale anaavya otoloxa okumi aka*Anamukhuruwela mmahiyeni.
10 Anamveleeliwa wa owerya wa nlema;Awo anamukhala yoolya ya anapiili.*
11 Nto mwene onamuhakalala mwa Muluku.
Oothene yoole oni alipele mwa yoowo onamuchapa,*Tiwi, eyano ya yaale enaloca sawootha enammaalihiwa.
Inoota
^ Naari: “Mwiili aka wooceecheya.”
^ Naari: “Okumi aka wohaakhwaneliwa.”
^ Mu Ehepiri, “ntoko nikupa nooneneva ni na epaanya.”
^ Naari: “Okumi aka woowakelelaani.”
^ Naari: “okiipha”
^ Naari: “ananthala.”
^ Naari: “onamwiirumiha.”
