Salmu 66:1-20
Wa muhooleli a macipo. Ncipo. Salmu.
66 Mukhuwele moohakalala wa Muluku, elapo yoothene.
2 Mwiipele macipo* nsina nawe noocicimiheya.
Mumvahe yoowo ovuwa ni ncicimiho.
3 Muloce wa Muluku: “Chiri miteko sanyu ti sootikhiniha!
Wa nthowa na owerya wanyu otokweene,Amwiicani anyu anamusareya woova vamiithoni vanyu.
4 Elapo yoothene enahaala okokhora vamiithoni vanyu;Awo enanwiipelaani macipo;Awo enamwiipela macipo nsina nanyu.” (Selaha)
5 Rwaani nave moone miteko sa Muluku.
Saweera sawe ntakhara anamwene a achu ti sootikhiniha.
6 Owo aatatuxa ephareya ekhala echaya yawuuma;Awo yaalapuwa muhice ni meco.
Va nipuro nenle naahihakalala ni yoowo.
7 Owo onnalamulela okhala wookhala ni owerya wawe.
Miitho awe annavarerya maloko.
Yaale ari ooturuwa murima ehiivuwihe mukhataaya. (Selaha)
8 Mmucicimihe Muluku ahu, nyuwo achu,Nave mweerihe wi nsu nanyu noocicimiha niiweye.
9 Owo onnakhapelela okumi ahu;*Owo haneemererya wi nnaani nahu nikwaculiwe.*
10 Tiwi, nyuwo moonaalikhela, khwoo Muluku;Hiihaa ntoko eparata enarehereryiwaaya, nyuwo monrehererya.
11 Nyuwo mooneeriha ovolowa mmulapa woosayano;Moncukhuliha* mucholo woohokolaxa.*
12 Mwaahimweemererya muchu wi annyikale;*Noovira vamooroni ni mmaahini;Voocharela muniruuha mu nipuro nawiichuuwa.
13 Kinahaala ovolowa mpa mwanyu ni soovaha soopahiwa,Kinamwaakhwaniherya malakano yaawo kipankaaka wa nyuwo,
14 Yeeyo iyano saka siroromelinhaaya,Yeeyo eyano aka yaaloncaaya vaavaa kaaryaaka mu sawuukhula.
15 Kinamoovahaani sooveleela soopahiwa sa asinama ooneneva,Ni mwiisi wa mikucho sa ipucepuche.
Kinamvaha imope seelopwana ni ipuri seelopwana. (Selaha)
16 Rwaani ni nwiriyane, oothene nyuwo munamoova Muluku,Nave kinamooleelaani yeeyo owo onakeereleiye.*
17 Kaamwiichana owo ni eyano akaNave kaamvuwihiwa ni nlumi naka.
18 Waakhanle wi kookuha yoonanara mmurimani mwaka,Yehova hii akiiwe.
19 Nto mweeparipari, Muluku aahiiwa,Owo aawiriyana moopwacha nivekelo naka.
20 Acicimihiwe Muluku, yoowo ahikhoonce nivekelo nakaNaari mano okikhwatiiherya osivela wawe woororomeleya.
Inoota
^ Naari: “Mpakele ncipo.”
^ Naari: “onneeriha wi okumi ahu okhale.”
^ Naari: “niphirikeye.”
^ Mu Ehepiri, “Mookuha muyuununi mwahu.”
^ Naari: “niphuta ntokotoko.”
^ Mu Ehepiri, “vamuru vahu.”
^ Naari: “oneereleiye okumi aka.”
