Salmu 79:1-13
Salmu a Asafi.
79 Khwoo Muluku, maloko aacuphela yoohiyeryiwa anyu;Aananariha empa anyu yaweela,Aamutatuxa Yerusalemu okhala milepe.
2 Awo aaperekha miruchu sa alapeli anyu ntoko yoolya wa ipalame soosuluNi ethai ya oororomeleya anyu wa axinama a mutakhwani a veelaponi.
3 Awo aayeeha nikhami naya ntoko maahi mu Yerusalemu oothene,Nave haavo ohanle wi aavithe yaawo.
4 Nookhala echu yoonyemuwa wa amwiicani ahu;Yaale anirukurenrye annanroha ni onitheya.
5 Khwoo Yehova, ophiyerya liini muneeraanyu mukhale oonanariwa? Mano, okhala wookhala?
Ophiyerya liini esara anyu eneeraaya enavarela ntoko mooro?
6 Muyeehere onanariwa wanyu wa maloko yaawo ahoosuwenleeniNi wa mamwene yaawo ahiniichana nsina nanyu.
7 Tiwi awo yaammwasanya* YakopoNave yaamwarya elapo awe.
8 Muhineerihe olivela soohesa sa makholo ahu.
Munooniherye mwawaakuveya ikharari sanyu,Woona wi nootepa olamwihiwa.
9 Munikhaviherye, khwoo Muluku a nivuluxo nahu,Wa nthowa na nsina nanyu noocicimiheya;Munaakihe nave mulevelele* soocheka sahu wa nthowa na nsina nanyu.
10 Ntakhara heeni maloko yaahaalaaya oloca eriki: “Muluku aya ori woowi?”
Miyaano ni achu aka nnachuna woona vaavaa maloko anahaalaaya osuwelaWi nyuwo mohinla ikuhu wa achu yaawo awiiphale alapeli anyu.
11 Mwiiwe wuupulela wa muchu oophariwaMpharihele owerya wanyu otokweene* wi mwaakhapelele* yaale athoriheliwe okhwa.*
12 Mwaakookiherye amwaacamani ahu opwaha ikwaha thanu napiiliWa nthowa na wooruwanaani nyuwo, khwoo Yehova.
13 Mwawiihiiha, hiyaano achu anyu ni muhuwo anyu yoowo munakukhulaanyu,Nnamoothamalelaani okhala wookhala,Nave nnamulaleya ncicimiho nanyu wa muyareriwo ti muyareriwo.
Inoota
^ Naari: “yaamutapasa; yaamutapatha.”
^ Mu Ehepiri, “mukhuneele.”
^ Mu Ehepiri, “Mpharihele nwono anyu.”
^ Naari akhweya: “mwaataphule.”
^ Mu Ehepiri, “anamwane a okhwa.”
