Salmu 8:1-9
Wa muhooleli a macipo; vooloca sa Kitite.* Salmu a Tavite.
8 Khwoo Yehova, Apwiya ahu, nsina nanyu ntokweene veelaponi yoothene yavathi;Moohela ovuwa wanyu ophiyerya osulu wa irimu!*
2 Mwaano mwa anamwane ni mwa makwiya mootikitheryamo ikuruWa nthowa na amwiicani anyu,Wi mummaalihe mwiicani ni mulipa awuunla ikuhu.
3 Kaavareryaka erimu, muteko wa ikatha sanyu,Mweeri ni itheneeri mpankaanyu,
4 Muchu pahi tiheeni wi nyuwaano munamuupuwela,Ni mwaana a muchu wi munamuthokororya yoowo?
5 Nyuwo moomuyeviha yoowo waapwaha ankeelo,*Nave moonwariha ovuwa ni ncicimiho.
6 Momvaha owerya wa olamulela miteko sa matata anyu;Mookuha soothene vathi va inaani sawe:
7 Ipucepuche soothene, ipuri ni imope,Nave tho ni axinama a mutakhwani,
8 Ipalame soosulu ni ihopa sa mphareya,Soothene seiho sineekha mphareya.
9 Khwoo Yehova, Apwiya ahu, nsina nanyu ntokweene veelaponi yoothene yavathi!
Inoota
^ Moone Masu Atharihiwe.
^ Naari akhweya: “Nyeenyu ovuwa wanyu onalaleiwa wirimu.”
^ Mu Ehepiri, “oolikana ni Muluku.”
