Salmu 86:1-17
Nivekelo na Tavite.
86 Mutheteye iwaru sanyu,* khwoo Yehova, nave mukaakhule,Woona wi kiri awuukhuwa ni koohaawa.
2 Mukhapelele okumi aka, woona wi ka muchu oororomeleya.
Mumvuluxe mulapeli anyu, yoowo onoororomelaani nyuwo,Vawi nyuwo muri Muluku aka.
3 Mukooniherye mahala, khwoo Yehova,Tiwi kinnakhuwela wa nyuwo nihiku noothene.
4 Mmuhakalalihe* mulapeli anyu,Woona wi kinnachimakela* wa nyuwo, khwoo Yehova.
5 Woona wi nyuwo, khwoo Yehova, muri aphaama nave ilukuluku soothene muri oorehereya olevelela;Osivela wanyu woororomeleya otokweene wa oothene yaale anawiichanaani.
6 Mwiiwe nivekelo naka, khwoo Yehova;Nave muwiriyane moopwacha mavekelo aka a vathi va murima ntakhara nikhaviheryo.
7 Kinnawiichanaani mu nihiku na sawuukhula saka,Kiroromelaka wi nyuwo munahaala okaakhula.
8 Haavo onalikana ni nyuwo variyari va amiluku, khwoo Yehova,Hisaavo miteko inalikana ni sawinyu.
9 Maloko oothene mpankaanyuAnamurwa nave anamuurama vamiithoni vanyu, khwoo Yehova,Nave anamvaha ncicimiho nsina nanyu.
10 Tiwi nyuwo muri mutokweene nave munnapaka sootikhiniha;Nyuwo, pahiru nyuwo, muri Muluku.
11 Khwoo Yehova, mukihusihe vooloca sa ephiro anyu.
Kinamweecaka mu eparipari anyu.
Muuraanye murima aka* wi wooveke nsina nanyu.
12 Kinnoocicimihaani ni murima aka woothene, khwoo Yehova, Muluku aka,Kinamvuwihaka nsina nanyu okhala wookhala,
13 Tiwi, osivela wanyu woororomeleya ntakhara miyo otokweeneNave moovuluxa okumi aka wa Mahiye* awiixa.
14 Khwoo Muluku, achu awiirumiha annakivinyerya;Nikhuuru na achu oonanara murima ninnaavya omaliha okumi aka;*Awo hanoopwachaani nyuwo.*
15 Nto nyuwo, khwoo Yehova, mwa Muluku a ikharari ni a niphwanya,*Oopixa murima* ni oosareya osivela woororomeleya ni ororomeleya.*
16 Mukookele wa miyo nave mukooniherye mahala.
Mumvahe ikuru sanyu namuteko anyu,Nave mumvuluxe mwaana a kapuro anyu amwaamuthiyana.
17 Mukooniherye eneneeryo* ya oreera wanyu murima,Hiiha yaale anakiica anamoona yeeyo nave anamuuliheya muru.
Woona wi nyuwo, khwoo Yehova, muri mukhaviheryi aka ni ookihakararya.
Inoota
^ Naari: “Mukulame nave mwiiwe.”
^ Naari: “Muhakalalihe okumi wa.”
^ Naari: “kinnakeriha okumi aka.”
^ Naari: “Mukivahe murima woohikawanyeya.”
^ Naari: “Seyoli,” ela tiwi, nipuro achu oothene anavithiwaayawo. Moone Masu Atharihiwe.
^ Naari: “ninnaavya okumi aka.”
^ Naari: “hanookuhaani ohoolo waya.”
^ Naari: “a mahala.”
^ Naari: “Oohaakuvela onyeenyeya.”
^ Naari: “eparipari.”
^ Naari: “Mukivahe yawooniherya.”
