Salmu 94:1-23
94 Khwoo Muluku a winla ikuhu, Yehova,Khwoo Muluku a winla ikuhu, mwaarye!
2 Mvinye, khwoo Muthoriha a elapo.
Mwaakookiherye awiirumiha yeeyo enaaphwanela.
3 Ophiyerya liini, khwoo Yehova,Ophiyerya liini aweera soonanara aneeraaya etitelele ohakalala?
4 Awo annaloca mwawiirumiha;Aweera soonanara oothene anniirumiha.
5 Awo annaanyaanya achu anyu, khwoo Yehova,Nave annahooxa yoohiyeryiwa anyu.
6 Awo annamwiipha naamukhweli ni namarwa.
Nave anniipha ikwaasuni.*
7 Awo annaloca: “Yehova hanoona,Muluku a Yakopo hanasuwela yeeyo eneereya.”
8 Mwiiwexexe ela, nyuwo oohuupuwela;Alolo nyu, ti liini muneeraanyu nwerye wiiwexexa?*
9 Apwanne Yoole opanke ewaru hanawerya wiiwa?
Yoole opanke niitho apwanne hanawerya woona?
10 Apwanne Yoole onookolola maloko hanawerya osamela?
Owo tonaavaha achu masuwelelo!
11 Yehova oosuwela muupuwelo wa achuOwo oosuwela wi awo nwiya pahi.
12 Oohakalala muchu yoowo munamookololaanyu, khwoo Yehova,Ni yoowo munamuhusihaanyu nlamulo nanyu,
13 Wi owo akhale oomaaleleya mmahiku a epahu,Ophiyerya nlici na achu oonanara murima nthimpwe.
14 Tiwi Yehova hani aahiye achu awe,Naari mano onyanyala yoohiyeryiwa awe.
15 Ntakhara othoriha onahaala okookela okhala wawookololowa,Nave oothene yaale ari awookololowa murima anamucharaka yoowo.
16 Taani oni akaakihe wa achu oonanara murima?
Taani oni akikhaviherye owana ni achu aweera soonanara?
17 Yehova ahaari mukhaviheryi aka,Mu elukuluku vakhaani kaamukhwa.*
18 Vaavaa kaaloncaaka kiriki: “Inaani saka sinnaserekuwa,”
Osivela wanyu woororomeleya waahikikhaviherya, khwoo Yehova.
19 Vaavaa wuukhuwa* waakinyannyaaya,*Nyuwo mwaahikihakararya ni okimaaliha.*
20 Apwanne nyuwo munnawerya waataana ni alamuleli oonanara murima,Yaawo anatatuxa malamulo ekhala yoohooxa?
21 Awo annamuhiphela moowali awookololowa*Nave annamuthorihela okhwa oohikhalano nthowa.*
22 Nto Yehova onamukhala nipuro noochawelavo nookhapeleleya* wa miyo,Muluku aka, mwala aka woochawelavo.
23 Owo onamwaamorihela yaawo saweera saya soonanara.
Owo onamwaatoloxa* ni sootakhala saya sene.
Yehova, Muluku ahu, onamwaatoloxa* yaawo.
Inoota
^ Naari: “annawiipha anamwane ahirino apapa aya.”
^ Naari: “wooniherya miruku.”
^ Mu Ehepiri, “kaamukhala cuu.”
^ Naari: “miyuupuwelo sawuukhula.”
^ Naari: “saancaayaxa mpuwa mwaka.”
^ Naari: “Masu anyu oohakararya yaamaliha okumi aka.”
^ Naari: “annahiphela moowali okumi wa awookololowa.”
^ Mu Ehepiri, “Nave anneera okhalano nthowa (noonanara) nikhami na muchu ohirino nthowa.”
^ Naari: “nipuro noocukhuwa.”
^ Mu Ehepiri, “onamwaamaaliha.”
^ Mu Ehepiri, “onamwaamaaliha.”
