Saweeriwa ti Arummwa 12:1-25
12 Mmahiku yaale, mwene Heroti aapacerya waahooxa akina mmulokoni.
2 Owo aalamulela wi iiphiwe Tiyaku ni nlema, Yohani munnawe.
3 Oonneiye wi ela yaanaahakalaliha Ayuta, aalamulela wi aphariwe Petru. (Ela yeeren’ye elukuluku ya efesta ya ipaau soohiheliwa yooruruvaliha.)
4 Owo aamphara nave anwalela mukariposo, amveleela wi aweheriweke ni makhuuru maxexe a anakhoco axexe achunaka omperekha* vamiithoni va muloko avinre Paska.
5 Mwawiihiiha, Petru aawaleliwa mukariposo, nto muloko waatitelela omvekelela yoowo wa Muluku ni murima woothene.
6 Heroti aanuupuwela omperekha Petru; ohiyu ene yoowo, Petru aamukona oomakiwa ene ni mithipo miili veeri va anakhoco eeli, alipa oolipelela akina eweheryaka va mulako wa ekariposo.
7 Nto mootutuxa, aarwa munkeelo a Yehova nave omwaleela waanaarya mukariposo. Owo aamutannya Petru mpararini nave amviiha, aloca ariki: “Vinya mwawaakuveya!” Vaavaa, saamora mithipo seihe aamakiweiyeno mmatani.
8 Munkeelo aahi wa yoowo: “Wiirehererye nave waaware asantaalyaa.”* Petru aaheerano hiiha. Wookuchulani, munkeelo aahi wa yoowo: “Oware malayaa* nave okichareke.”
9 Mwawiihiiha, Petru aakhuma anamuchara, nyenya owo haasuwela wi yeeyo yeereya moorweela wa munkeelo yaari eparipari. Nto, owo uupuwela wi aarino yawoona.
10 Yaavinraaya wa alipa oolipelela oopacerya ni anaawiili, yaaphiya nsele na muthipo na mulako waaweha opooma. Nsele nlo naahuleya meekhaaya. Yaakhummaaya, awo yaaheeca vamoha mphironi nave mootutuxa munkeelo aamuhiya apwaha.
11 Petru aasuwenleiye yeeyo yeereya, aahi: “Moohikhwa minikwa, vano koosuwela wi Yehova oomuruma munkeelo awe wi akivuluxe mmatani mwa Heroti ni mwa soothene seiho Ayuta yaaweheryaaya wi seereye.”
12 Aasuwenleiye yeela, owo aaya vaate va Mariya amama awe Yohani, yoowo tho aasuweliwe ntoko Marku, weiwo ancipale yaathukumannaayawo evekelaka.
13 Vaavaa aamanneiye nsele na on’yateni, namuteko mmoha amwaamuthiyana nsina nawe Rota, aayawo wi amoone taani aamana nsele.
14 Aasuwenleiye wi naari nsu na Petru, aatepa ohakalala ophiyerya ahihula nsele, nto aachimakela mpa alokoha wi Petru ori va mulako.
15 Awo yaahi wa yoowo: “Wookhala ni anepa yoowe.” Nto owo aatitelela oloca wi aari Petru. Awo yaanaloca eriki: “Owo munkeelo awe.”
16 Nyenya Petru aatitelela omana nsele. Yaahunlaaya, yaamoona nave ekhala ootikhiniheya.
17 Mwawiihiiha, owo aahaavaha eneneeryo ni mata wi emaale oloca; aahaaleela mookwakwaleya ti mwawiihai Yehova aamukuminheiye mukariposo nave aahi: “Mwamuleele ichu seiha Tiyaku vamoha ni anna akina.” Voocharela, owo aapwahavo aya nipuro nikina.
18 Waaxilaayavo, aakhalavo namvutuka mutokweene variyari va anakhoco, ekohanaka tiheeni yeeren’ye ni Petru.
19 Heroti aamutholathola, nave woona wi haamphwannye, aahaakoha alipa oolipelela nave alamulela wi yalakiwe; voocharela aakhumawo o Yuteya, akhuruwela o Kaisareya akhala weiwo.
20 Mwene Heroti aananariwaxa* ni achu o Tiru ni Sitoni. Mwawiihiiha, achu awo, ni murima mmoha, yaarwa oloca ni yoowo nave epacerya omulekecha Palastu, mutokweene a empa ya mwene emvekaka murecele, woona wi soolya saya saakhuma mu elapo ya mwene Heroti.
21 Naaphiyalaaya nihiku naalakaniwe, Heroti aawara soowara sawe sa omwene, akiraathi va munyukhu wa othoriha nave apacerya operekha mwaha awe.
22 Muloko wa achu waathukumanne vaavale waapacerya okhuwela oriki: “Nlo nsu na muluku ohiya na muchu!”
23 Elukuluku ene yeele, munkeelo a Yehova amphoreiha,* woona wi haaveleenle ncicimiho wa Muluku. Hiihaa, aalyiwa ni miyuuku* akhwa.
24 Nto masu a Yehova yaamvira yaaceereryeyaka ni emwaramwaxeyaka.
25 Parnape ni Sawulu, yaamalinhaaya ophara muteko wookhaviherya o Yerusalemu, yaakookela o Antiyokeya emukunxe Yohani, awiichaniwa tho Marku.
Inoota
^ Naari: “omveleela wi athorihiwe vamiithoni va.”
^ Naari: “atamanku.”
^ Naari: “ekaapaa.”
^ Naari: “aalakelela owana ni.”
^ Naari: “aamuruuhela ereca.”
^ Naari: “inyuuku.”
