Saweeriwa ti Arummwa 13:1-52
13 Muloko waari o Antiyokeya, yaakhalawo alipa a miririmu ni ahusiha: Parnape, Simeyoni yoowo tho iichaniwa Nixeri, Lusiyu o Sirene, Manayeni yoowo aahusihiwe ni Heroti mulamuleli a vamucecheni, vamoha ni Sawulu.
2 Vaavaa yamurumeelaaya Yehova ni yiinanelaka olya, munepa waweela waahi: “Mukithanlele Parnape ni Sawulu, wi ephare muteko yoowo kiwiichanenlaaka.”
3 Emanle wiinanela olya ni ovekela, awo yaahaakuherya matata aya nave yaahiya wi epwaheke.
4 Mwawiihiiha, alopwana ala yaarummwale ni munepa waweela, yaakhuruwela o Selusiya nave weiwo yaalapuwela o Xipre.
5 Yaaphiyalaaya o Salami, awo yaapacerya olaleerya masu a Muluku mmapuro a malapelo* a Ayuta. Nave Yohani aari mukhaviheryi aya.
6 Emanle weeceeca evilivili yoothene ophiyerya o Pafo, yaamphwanya Muyuta awiichaniwa Pariyesu, yoowo aari mukhwiri ni mulipa a miririmu oowoka.
7 Mulopwana ola, aari ni mutokweene* Serxiyu Paulo, mulopwana oosuwelaxa. Ola aamwiichana Parnape ni Sawulu, woona wi aanachunaxa wiiwa masu a Muluku.
8 Nto Elima mukhwiri (woona wi nsina nawe nnataphuleliwa hiiha), aapacerya ovaanyihana ni yaawo, eereryaka omuhuweliha mutokweene munroromeloni.
9 Mwawiihiiha Sawulu, yoowo tho iichaniwa Paulo, aasareya ni munepa waweela nave aamuwehaxa yoowo
10 aloca ariki: “Mulopwana we oosareya mukhalelo woothene wa owoka ni otakhala, mwaana a Musaserya, mwiicani a soothene iri sawookololowa, honahiyaru okhoromanya iphiro sawookololowa sa Yehova?
11 Wiriyana, ntata na Yehova nri mwa weyo, onamukhala eevaasi nave enamviravo elukuluku ohoonaka omwaleela wa nsuwa.” Elukuluku ene yeele, waammorela mucharapo ni epiiphi, nave owo aapacerya weeca moorukurerya eereryaka omphwanya muchu wi amweeciheke ampharenle ntata.
12 Mwawiihiiha, vaavaa mutokweene ole onneiye yeeyo yeeren’ye, aaroromela, woona wi aatikhiniheya ni mahusiheryo a Yehova.
13 Paulo vamoha ni akhweiye yaalapuwela o Pafo ephiya o Perxe elapo yo Panfiliya. Nto Yohani aahaahiya akookela o Yerusalemu.
14 Mwawiihiiha, awo yaakookela mukwaha ecimula o Perxe ephiya o Antiyokeya elapo yo Pisitiya; evolowa mu nipuro na malapelo* nihiku na Sapata nave ekiraathi.
15 Amanle waalakhanyiwa liivuru a Malamulo ni a alipa a miririmu wa achu oothene, ahooleli a mu nipuro na malapelo yaahaaleela eriki: “Alopwana, anna, mwaarino masu a waalipihano achu, muloce.”
16 Hiihaa, Paulo aavinya, avahaka eneneeryo ni matata awe aahi:
“Alopwana, Aisarayeli ni oothene nyu munamoova Muluku, wiriyanani.
17 Muluku a muloko yoola wa Aisarayeli, aahaathanla makholo ahu innuwiha muloko vaavaa waaryaaya anamarwa elapo yo Yikuputu, aaviihamo elapo yeele ni moono awe wakuru.
18 Nave mu iyaakha makhumi maxexe, owo aavilelano mutakhwani.
19 Amanle otoloxa maloko mathanu nameeli mu elapo yo Kanani, owo aahaavaha elapo eyo ekhala yawaya.
20 Soothene seiha seeren’ye variyari va iyaakha masana maxexe ni makhumi mathanu.*
“Evinre yeela, owo aahaavaha athoriha ophiyerya elukuluku ya mulipa a miririmu Samuwele.
21 Nto voocharela, awo yaamveka mwene, nave Muluku aahaavaha Sawuli mwaana a Kixi, mulopwana a nihimo na Penxami, mu iyaakha makumi maxexe.
22 Amanle omviihavo Sawuli, owo aamuweliha Tavite akhala mwene aya, ti yoowo aamweerenleiye onamoona ii: ‘Koomphwanya Tavite, mwaana a Yese, muchu a vamurimani vaka; yoowo toni eereno soothene kinachunaaka.’
23 Mwawiiwanana ni yoororomeliha awe, orweela wa muyareriwo* wa mulopwana yoola, Muluku aamuruuha o Isarayeli mvuluxa, Yesu.
24 Ahaakumve ophiya yoola, Yohani aalaleerya wa achu oothene o Isarayeli sa opatiso wooniherya orukunuxa murima.
25 Nto vaavaa Yohani aakwaaxeiye muteko awe, owo aanaloca ariki: ‘Munuupuwela wi miyo kaani? Miyo tahi ka yoowo. Nto mweeparipari, yoowo onakicharela nkaano ophwanelela wa waataphula asantaalya* awe.’
26 “Alopwana, anna, nyuwo anamwane a emusi ya Aparahamu ni oothene a mwa nyuwo yaawo anamoova Muluku, masu a ovuluxa yoola aarumiheliwa wa hiyo.
27 Woona wi achu o Yerusalemu ni ahooleli aya hiyaamusuwenle mvuluxa yoola, nto yaahiiseera okhala athoriha, yaakhwaniheryaka masu a alipa a miririmu, yaawo anaalakhanyiwa moovuwa a Sapata oothene.
28 Naamwi yahimphwanyenrye nthowa na omwiipha, awo yaamveka Pilatu wi alamulele wiiphiwa.
29 Nave emanle waakhwaniherya soothene saarempwe vooloca sa yoowo, yaamviihavo va mwiri, emvitha mu nihiyeni.*
30 Nto Muluku aamviiha mookhwani,
31 nave mmahiku mancipale owo aahooneya wa yaawo aawenleiyeno vamoha ovinya o Kalileya ayaaka o Yerusalemu. Vano ala, annamweerela onamoona variyari va achu.
32 “Mwawiihiiha, ninnalaleerya wa nyuwo michaka saphaama vooloca sa yoororomeliha yeeyo yaapakiwe wa makholo ahu.
33 Muluku aahaakhwaniherya moomalela wa hiyo, anamwane aya, moorweela wa omviiha Yesu, hiiha ntoko erempwaaya mu Salmu anaawiili: ‘Weyo wa mwanaka; olelo miyo kookhala tiithi aa.’
34 Muluku aamviiha owo mookhwani wi mwiili awe ohirweru wuuce, nave owo aaloca mmukhalelo ola: ‘Kinarwa kiwooniherya osivela woororomeleya kaalaihenryaaka wa Tavite, yoowo ohinamala.’*
35 Mwawiihiiha, yaalociwa tho mu Salmu mukina: ‘Nyuwo himweemererya wi oororomeleya anyu oone eyuuce.’
36 Tavite aaphara muteko wa Muluku* mu elukuluku awe, arupa mookhwani, avithiwa vamoha ni makholo awe nave aahoona eyuuce.
37 Nto moohiyana, yoole Muluku omviihaleiye mookhwani, honne eyuuce.
38 “Mwawiihiiha anna, suwelani wi moorweela wa mulopwana yoola, onnalaleiwa wa nyuwo okhurumuweliwa wa soocheka,
39 nave wi moorweela wa yoowo, oothene yoowo onaroromela onneeriwa oohikhalano nthowa mu ichu soothene aahaaleiye okhalano nthowa moorweela wa Malamulo a Mose.
40 Hiihaa, mukhaleno ephoole wi ehoophacuweleeni yeeyo elociwe ni alipa a miririmu:
41 ‘Vareryani, alipa oonyemula nyu, mutikhine nave murimeele, woona wi kinapaka muteko mmahiku anyu, muteko yoowo muneeraanyu muheemereryeru, naamwi muchu ooleenleni soothene.’”
42 Vaavaa yaacimulaaya, achu yaahaaveka wi eloce miyaha seiha mu Sapata onacharela.
43 Omanle muthukumano mu nipuro na malapelo,* Ayuta ancipale ni yaale yeemerenrye okhala Ayuta yaamulapa Muluku, yaamuchara Paulo ni Parnape. Vaavaa awo yaalocaaya ni achu yaala, yaanaaceenyerya otitelela okhala mu mahala matokweene a Muluku.
44 Sapata oocharela, achu ancipale a epooma yeele yaathukumana wi ewiriyane masu a Yehova, yahaaruule yaari tonto.
45 Vaavaa Ayuta yoonnaaya muloko wa achu, awo yaasareya ehace nave epacerya ovaanya moonyemula yeeyo Paulo aaloceiye.
46 Mwawiihiiha, Paulo ni Parnape moolipa murima yaaloca wa yaawo eriki: “Waari woochuneya opacerya olaleerya masu a Muluku wa nyuwo. Woona wi munnakhooca, nave munniiseera oohiphwanela waakhela okumi woohimala, vano nnakookela wa maloko makina.
47 Woona wi Yehova oonilamulela mmasu ala: ‘Miyo kohoothanla wi okhale omwaleela wa maloko, wi okuxe ovuluxa ophiyerya weiwo elapo ekotenlaayawo.’”
48 Vaavaa achu a maloko makina yiiwalaaya yeela, yaapacerya ochapa ni ocicimiha masu a Yehova, nave oothene yaale yaarino nchuno noophwanelela na waakhela ekumi yoohimala yaanaroromela.
49 Ohiya yeeyoru, masu a Yehova yaanavuwihiwa makupa oothene a elapo yeele.
50 Nto Ayuta yaahaatumererya athiyana akina oocicimiheya yaawo yaamoova Muluku ni asitokweene a epooma; yaamutannyerya mukhico Paulo ni Parnape, eniikariwa ophiyerya omunlaanoni.
51 Mwawiihiiha, awo yaahaatathela nchupi na mu inaani saya, epwaha eyaaka o Ikoniyu.
52 Nave oohuserya, yaatitelela ohakalala ni osareya munepa waweela.
Inoota
^ Mu Ekriki, “mu sinakooka.”
^ Mulamuleli o Roma a eprovinsiya emoha. Moone Masu Atharihiwe.
^ Mu Ekriki, “mu sinakooka.”
^ 450.
^ Mu Ekriki, “mmiso.”
^ Naari: “atamanku.”
^ Naari: “nihiye nnuupuweliwa.”
^ Naari: “woororomeleya.”
^ Naari: “aaheera yookhwela ya Muluku.”
^ Mu Ekriki, “mu sinakooka.”
