Saweeriwa ti Arummwa 21:1-40
21 Vaavaa naawenryaahu wiivalaanya ni yaawo ni onwela pophoro, naaya o Kosi; nihiku noocharela naaya o Roti nave ncimula weiwo niyaaka o Patara.
2 Naamphwannyaahu pophoro aaya olapuwela o Fenisiya, naanwela nave nipwaha.
3 Vaavaa noonnaahu evilivili yo Xipre, nave nivira nxeremaka makupa a moono woothiyana, naalapuwela o Siriya nave niphiya o Tiru, weiwo pophoro aahaaleiye okuruxawo ichu aateenxeiye.
4 Naawaavya oohuserya naaphwanya, nave naatitelela okhala weiwo ophiyerya mahiku mathanu nameeli. Nyenya, moorweela wa munepa waweela, awo yaanaloca mwawuuluulela wa Paulo wi ahinyikale o Yerusalemu.
5 Hiihaa, elukuluku ahu yaamanlaaya weiwo, naacimula nikookela mukwaha ahu; nave oothene yaawo ophitaanyerya athiyana ni anamwane, yaanihoola ophiyerya okhwipi wa epooma. Mwawiihiiha, naakokhora oxerexere wa epooma, nivekela
6 nave nlaanyana mukina ni mukhwaawe. Voocharela naanwela pophoro nave awo ekookela owannyaya.
7 Ncimunle mukwaha, naavinya o Tiru niphiya o Petolemayita naalocela anna, nikhala ni yaawo nihiku nimoha.
8 Nihiku noocharela, naacimula nave niphiya o Kaisareya; weiwo naavolowa vaate va Filipi mulipa oolaleerya, yoowo aari mmoha a alopwana athanu napiili nave nikhala ni yoowo.
9 Mulopwana ola aakhalano anamwane aasithiyana axexe yahaatheliwe* yaawo yaloca mwa miririmu.
10 Nyenya nimalinhe mahiku mancipale vaavale, aaphiya mulipa a miririmu awiichaniwa Akapo arwaaka o Yuteya.
11 Owo aaniphwanya, akuxa esintu ya Paulo iimakano meco ni matata, aloca ariki: “Mwa yeela, munepa waweela oni: ‘Mwaneene a esintu yeela onarwa amakiwa hiiha ni Ayuta o Yerusalemu, nave awo enarwa emveleela mmatani mwa achu a maloko.’”
12 Niiwalaahu yeela, hiyaano vamoha ni yaale yaari vaavale naapacerya omveka wi ahiwele ayaaka o Yerusalemu.
13 Voocharela Paulo aahaakhula: “Tiheeni munapakaanyu mwinlaka ni mweereryaka oceecheiha yoolakelela aka?* Musuwele wi kiri oorehererya ohiya pahiru omakiwa, nyenya tho okhwa o Yerusalemu wa nthowa na nsina na Apwiya Yesu.”
14 Vaavaa naahiwenryaahu omulekecha, naamaala omuhiiha* nloca nriki: “Yeereye yookhwela ya Yehova.”
15 Evinre mahiku yaale, naahiirehererya nave nipacerya mukwaha niyaaka o Yerusalemu.
16 Oohuserya akina o Kaisareya yaachaanana vamoha ni hiyo enihoola vaate va Manasoni, o Xipre yoowo aari mmoha a oohuserya oopacerya; hiyaano naahaya vaate vawe.
17 Naaphiyalaahu o Yerusalemu, anna yaanaakhela moohakalala.
18 Mmeeloni mwaya, Paulo aavinya ni hiyo wi akumane ni Tiyaku, nave asitokweene oothene yaari weiwo.
19 Owo aahaalocela nave apacerya waaleela ichu soothene Muluku eenreiye wa maloko moorweela wa muteko awe.
20 Yiiwalaaya yeela, awo yaapacerya omucicimiha Muluku nave eloca wa yoowo eriki: “Munna, nyuwaano moosuwela wi Ayuta ancipale aaroromela nave oothene awo ta mvai mu nlamulo.
21 Nto awo ahiiwa wi munnaahusiha Ayuta oothene anakhala variyari va maloko wi ehichariheke malamulo a Mose, mwaaleelaka wi ehaathikileke anamwane aya naari mano ochariha sookhovelela itikitheryiwe.
22 Vano neere heeni vooloca sa mwaha yoola? Tiwi awo chiryene anamusuwela wi moophiya.
23 Vano, mweere yeeyo nnahaalaahu wooleelaani: Nookhalano alopwana axexe arino nlakano wi yaakhwaniherye.
24 Mwaakuxe alopwana yaala, mwiiseelihe vamoha ni yaawo mwawiiwanana ni nlamulo, nave mulive soothene sinachuneya wi eceme mphati. Hiihaa oothene anamusuwela wi tahi eparipari yeeyo enalociwa vooloca sa nyuwo, nto wi nyuwo munnachariha meecelo nave munniiwelela Malamulo.
25 Vooloca sa achu a maloko yaawo aroromenle, nohaarumihela yoolakelela ahu mu ekaarata wi awo annaphwanela othanyaka ichu iveleeliwe wa soophwaniherya hiiha ntoko nikhami, axinama oonyopocholiwa,* ni ocapaheya.”*
26 Mwawiihiiha, mu nihiku noocharela, Paulo aahaakuxa alopwana nave iiseeliha mwawiiwanana ni nlamulo vamoha ni yaawo; voocharela aavolowa mu empa ya Muluku wi alokohe ti liini yaahaalaaya waakhwanela mahiku a wiiseeliha mwawiiwanana ni nlamulo ni oveleela yoovaha wa mmoha ti mmoha a yaawo.
27 Ehalaka vakhaani omala mahiku mathanu napiili, Ayuta o Asiya, yaamoonnaaya mu empa ya Muluku, yaawopa muloko woothene nave emphara,
28 ekhuwelaka eriki: “Alopwana o Isarayeli, munikhaviherye! Ti yoola onaahusiha achu oothene mmakupa oothene, ichu inavaanyihana ni nloko, Nlamulo nahu, vamoha nnipuro nenla. Ohiya yeeyoru, ola ohaaruuha Akriki mu empa ya Muluku nave ariipiha nipuro nenla naweela.”
29 Tiwi ekwaha ekina, yaamoona Trofimu o Efesu ari mpooma ni Paulo, yuupuwela wi aamukeriha mu empa ya Muluku.
30 Epooma yoothene yaasareya namvutuka, achu ancipale yaarwa echimakaka emphara Paulo nave empurulela vaate va empa ya Muluku, moohilekela milako saawaliwa.
31 Echunaka omwiipha, mutokweene a anakhoco aaleeliwa wi epooma yoothene yo Yerusalemu yoosareya namvutuka;
32 moohilekela, owo aahaakuxa anakhoco ni ahooleli aya, nave ekhuruwa echimakela waarivo muloko. Vaavaa achu yaamoonnaaya mutokweene a anakhoco vamoha ni anakhoco, yaamaala ommana Paulo.
33 Mutokweene a anakhoco aamwaacamela Paulo, amphara nave alamulela wi amakiwe ni mithipo miili; voocharela aakoha wi aari taani, nave echu taani eenreiye.
34 Nto akina a muloko yoole yaanakhuwela elocaka echu ekina, nave akina elocaka tho echu ekina. Mwawiihiiha, muhooleli yoole haaphwannyevo echu ene yeeparipari yeeren’ye, mwa nthowa na namvutuka. Owo aalamulela wi akuxiwe Paulo akerihiwe o kwarteli.*
35 Yaaphiyalaaya va exikata, owo aateexiwa ni anakhoco wanthowa na owali wa muloko,
36 woona wi muloko wa achu waatitelela waachara okhuwelaka oriki: “Mmwiiphe!”
37 Ahalaka vakhaani okerihiwa o kwarteli,* Paulo aamukoha mutokweene a anakhoco ariki: “Apwanne kinneemereryiwa oloca echu wa nyuwo?” Owo aahi: “Weyo onnaloca Ekriki?
38 Weyo tahi wa Muyikuputu yoole mmahiku avirale aaronxe mukhico* nave aakuxa alipa awiipha* macikhwi maxexe ayano otakhwani?”
39 Paulo aahaakhula: “Mweeparipari, miyo ka Muyuta ooyariwa o Tarsu, epooma yoochuneyaxa yo Silisiya. Mwawiihiiha, kinnoovekaani wi mukeemererye oloca ni muloko wa achu.”
40 Eemereryiweiye oloca, Paulo aaheemela va exikata, avaha eneneeryo ni ntata wa muloko. Hiihaa achu yaamaala cuu, voocharela owo aaloca ni yaawo mu Ehepiri ariki:
Inoota
^ Mu Ekriki, “yahaantonko okumanela ni mulopwana.”
^ Naari: “murima aka?”
^ Mu Ekriki, “naamaala cuu.”
^ Naari: “yiiphiwe ehihitiwe.”
^ Mu Ekriki, porneiya. Moone Masu Atharihiwe.
^ Naari: “nipuro na akhoco.”
^ Naari: “nipuro na akhoco.”
^ Naari: “aamwareenle alamuleli.”
^ Naari: “anamaahita.”
