Saweeriwa ti Arummwa 8:1-40
8 Sawulu, aaheemererya wiiphiwa wa Estefanu.
Nihiku nenle, muloko wo Yerusalemu waapacerya ohooxiwa vatokovene. Oothene yaamwalamwalela makupa o Yuteya ni o Samariya, waahiya arummwa.
2 Nto alopwana oomucicimiha Muluku, yaakuxa muruchu wa Estefanu eya yavitha nave yaamwinlela vatokotoko.
3 Nto Sawulu aapacerya ohooxa muloko. Owo aanavolowa empa ni empa, aapurulelaka vaate alopwana ni athiyana nave aanaawalela mukariposo.
4 Mwawiihiiha, yaale yaamwaramwaxiwe yaakhuma elapo yeele enalaleerya masu a michaka saphaama.
5 Filipi aakhuruwela epooma* yo Samariya nave aapacerya olaleerya wa yaawo sa Kristu.
6 Achu yaanawiriyana ni murima mmoha yeeyo Filipi aaloceiye, ewiriyanaka hiihale, yaanoona ineneeryo seiho owo eereiyeno.
7 Vawi ancipale yaakhalano minepa soonanara, iho saanakhuwela nave saanakhuma. Ohiya yeeyoru, ancipale oorakala ni ootuthunya yaanapenuxiwa.
8 Mwawiihiiha, waakhalavo ohakalala otokweene mu epooma yeele.
9 Mu epooma yeele, aakhalamo mulopwana awiichaniwa Simoni, yoowo khalai vene aalampe muteko wa onamulosiwe; owo aanatikhiniha nloko no Samariya, iiseeraka wi aari mutokweene.
10 Achu oothene, ovinyerya akhaani ophiyerya atokweene yaananwehaxa eriki: “Mulopwana ola ti Ikuru sa Muluku, yoowo oniichaniwa Mutokotoko.”
11 Yaanamuthokororya yoowo nthowa nawi yaaviravo elukuluku yincipale aatikhinihaka ni masica awe.
12 Nto vaavaa yaamweemerenryaaya Filipi, yoowo aalaleerya michaka saphaama vooloca sa Omwene wa Muluku nave mu nsina na Yesu Kristu, oothene alopwana ni athiyana yaapatisiwa.
13 Simoni tho aaroromela, nave amanle opatisiwa, owo aatitelela okhala ni Filipi; nave aanatikhiniheya vaavaa ooneiye ineneeryo ni miteko mitokweene sakuru seiho seereya.
14 Vaavaa arummwa o Yerusalemu yiiwalaaya wi achu o Samariya yaaheemererya masu a Muluku, yaamurumihelawo Petru ni Yohani;
15 ala yaakhuruwela weiwo nave yaavekelela wi yaakhele munepa waweela.
16 Woona wi owo nlelo hiwaakhurunwe wa mmoharu mano a yaawo, nyenya pahiru yaapatisiwe mu nsina na Apwiya Yesu.
17 Voocharela, yaahaakuherya matata aya, nave awo yaapacerya waakhela munepa waweela.
18 Vaavaa Simoni ooneiye wi munepa waweela onaakheliwa moorweela wa okuheryiwa matata a arummwa, aahaavaha ikhorowa,
19 ariki: “Mukivahe tho owerya yoowo, wi muchu ori oothene kineeraaka kimukuherye matata aka aakheleke munepa waweela.”
20 Nto Petru aahi wa yoowo: “Ikhorowa saa irimeele vamoha ni weyo, ntakhara wohuupuwela wi onanwerya othuma yamahala ya Muluku ni ikhorowa.
21 Weyaano hiwaano echu mmwaha yoola, woona wi murimaa hori wawookololowa vamiithoni va Muluku.
22 Mwawiihiiha, ocharuwe yoonanaraa, nave ovekele wa Yehova ni murima woothene, wakhala wooweryeya, yoolakelela yoonanara ya murimaa enamukhurumuweliwa;
23 ntakhara kinoona wi wa esenya yoowaawa* ni yawiipha, kapuro a soohookololowa.”
24 Simoni aawaakhula ariki: “Mpake nivekelo na vathi va murima wa Yehova ntakhara miyo, wi ehikiphacuwele echu emoharu mano wa seiho nyuwaano muloncaanyu.”
25 Mwawiihiiha, emanle ovaha onamoona moomalela, ni oloca masu a Yehova, yaacimula ekookela o Yerusalemu, elaleeryaka michaka saphaama mmiceche mincipale sa Asamariya.
26 Nto munkeelo a Yehova aaloca ni Filipi ariki: “Vinya oye makupa oohico, mphiro onakhuruwa o Yerusalemu oyaaka o Kasa.” (Ola mphiro wa mutakhwani.)
27 Voocharela, owo aahiirehererya nave acimula; owo aamphwanya mulopwana ahaavahiwe mukhalelo wa othela,* aari o Etiyopiya, mutokweene a Kantake, mwene amwaamuthiyana o Etiyopiya, yoowo aari mulipa oovareryela muhakhu awe woothene. Owo aakele o Yerusalemu omulapela Muluku.
28 Akookakawo akiraanthe mukaaroni mwawe, aanamwaalakhanya moovuwa liivuru a mulipa a miririmu Yesaya.
29 Mwawiihiiha, munepa waahi wa Filipi: “Hawe, waacamele ekaaro eyo.”
30 Filipi aachimakela ekaaro nave aamwiiwa yoowo amwaalakhanyaka moovuwa liivuru a mulipa a miririmu Yesaya, nave aamukoha ariki: “Apwanne munniiwexexa* yeeyo munaalakhanyaanyu?”
31 Owo aahaakhula: “Kini kiiwexexe hai ahirivo muchu ookileeliha?” Mwawiihiiha, owo aamveka Filipi wi awele akiraathi vamoha ni yoowo.
32 Taala makupa a Soorepa yaawo aalakhanyeiye: “Ntoko epucepuche, owo aakuxiwa wi iiphiwe, nave ntoko mwaasaana a epucepuche owo aakhala oomaaleene vamiithoni va mulipa oocema nave haahunle eyano awe.
33 Variyari va onyemuliwa wawe, owo haathorihiwe mweekhaikhai. Taani onawerya oloca sa muyareriwo awe? Ntakhara okumi awe wooviihiwamo mweelaponi.”
34 Mulopwana ole aamukoha Filipi ariki: “Kinnooveka, okileele, mulipa a miririmu yoola onaloca sawani? Onaloca sa mwaneene meekheiye naari sa muchu mukina?”
35 Filipi aapacerya oloca, apaceryaka nikupa nenle na soorepa, aamulaleeryela yoowo michaka saphaama vooloca sa Yesu.
36 Yeecaka hiihale mphironi, yaaphiya nipuro waarivo maahi, nave mulopwana ole aahi: “Onani! Maahi ala! Tiheeni enakihiiha opatisiwa?”
37 *——
38 Mwawiihiiha, owo aalamulela wi yeemexiwe ekaaro, oopiili Filipi ni mulopwana owo yaakhuruwela mmaahini nave aampatisa.
39 Emanle okhuma mmaahini, munepa wa Yehova mwawaakuveya, waamuxophola Filipi omviihavo, nave mulopwana owo haamonne tho, nto aapwaha ahakalanle vancipale.
40 Nyenya Filipi, aatuthunwe ari o Asitoti, aviraka mukuma yoole aatitelela olaleerya michaka saphaama mu ipooma soothene ophiyerya o Kaisareya.
Inoota
^ Naari akhweya: “epooma emoha.”
^ Mu Ekriki, “wamwe.”
^ Naari: “owo aamphwanya muhooleli.”
^ Naari: “munnasuwela.”
^ Eversikulu ela henaphwanyeya mu soorepa sakhalai, nave woonaru henapaka makupa a Soorempwa sooveereliwa.
