Wupulula 14:1-20
14 Ohoolo waya, kaamoona Mwaasaana Eepucepuche eemenle va mwaako Siyoni, ari vamoha ni achu amiile nsana ni makhumi masese ni amiile asese,* yaawo arino nsina nawe ni nsina na Atiithi awe nrempwe vayuucini vaya.
2 Kaahiiwa oruma woorweela wirimu waalikana ni oruma wa maahi mancipale ni waalikana ni oruma wa etari etokotoko; nave oruma yoowo kiiwalaaka waalikana ni alipa a wiipa yaawo yaawoopa achakare aya yiipaka.
3 Nave awo yaaniipa ncipo naalikana ni ncipo mvyaani vamiithoni va munyukhu, va ikumi sese, ni va asitokweene. Haavo aawerya ohuserya ncipo nenla voohikhala achu amiile nsana ni makhumi masese ni amiile axexe,* yaawo yaathummwe veelaponi yavathi.
4 Ti yaala yahiinanarinhe ni athiyana; mweeparipari, awo ari ntoko asimwali ahintoko okonihiwa. Ti yaala anatitelela omuchara Mwaasaana Eepucepuche weiwo owo onayeiyewo. Awo yaathummwe variyari va achu ntoko sawiima soopacerya* wa Muluku ni wa Mwaasaana Eepucepuche,
5 nave hiwaaphwanyen’yemo wootha mwaano mwaya; awo haano nthowa.
6 Kaamoona munkeelo mukina avavaka veeri va erimu,* nave owo aakhalano michaka saphaama soohimala wi alaleye wa yaale anakhala veelaponi yavathi, wa ilapo soothene, mahimo, ilocelo ni maloko.
7 Owo aanaloca ni nsu noovuwa: “Mmoove Muluku nave mumvahe ncicimiho, woona wi yoophiya ewora ya othoriha wawe. Mwawiihiiha, mmulapele Yoole opatunse erimu, elapo, ephareya ni anaacuucu a maahi.”
8 Munkeelo oocharela anaawiili aaloca ariki: “Ohuuwa! Ohuuwa Papulu Mutokotoko, yoowo eeriha wi maloko oothene ewuryeke eviinyu ya ochuna wawe* ocapaheya!”*
9 Aacharelavo munkeelo mukina aneeraru, alocaka ni nsu noovuwa ariki: “Wakhala wi muchu oomulapa mwaaxinama awoopiha ni eruku awe, ni waakhela eneneeryo vayuuci naari mu ntata nawe,
10 owo tho onahaala owurya eviinyu ya esara ya Muluku, yeeyo ehaakanyeryiwe ni echu ekina eyeeheryiwe mu koopho a esara awe, nave owo onarwa ahooxiwa ni mooro ni enxofre vamiithoni va ankeelo aweela ni vamiithoni va Mwaasaana Eepucepuche.
11 Nave mwiixi wa ohooxiwa waya onanwelaka okhala wookhala, yaale anamulapa mwaaxinama awoopiha ni eruku awe ni yoole orino eneneeryo ya nsina nawe, hekhalano wiichuuwa, othana ni ohiyu.
12 Ti yeela eniichaniwa ovilela wa awela murima, yaale aniiwelela malamulo a Muluku nave enamuroromela Yesu.”
13 Nave kaahiiwa nsu noorweela wirimu nriki: “Orepe: Oohakalala ti alipa ookhwa yaawo anakhwa mwawiiwanana ni Apwiya ovinyerya hiihaano oya muhoolo. Aa, onnaloca munepa, wi awo anniichuuwa wa miteko saya sakuru, woona wi ichu yenraaya sinnaachara.”
14 Voocharela kaahoona neeku naweela, nave vasulu va neeku aakiraathivo yoowo aalikana ni mwaana a muchu, ni korowa a ooru mmuruni mwawe nave apharenle mmatani mwawe ecikwakwa yoonoliwa ene.
15 Munkeelo mukina aakhuma mu nipuro naweela na empa ya Muluku, akhuwelaka ni nsu noovuwa wa yoole aakiranthe vasulu va neeku: “Mukuxe ecikwakwa anyu nave muhephe, woona wi yoophiya elukuluku ya ohepha, ntakhara soohepha sa veelaponi yavathi soomalela wi ihephiwe.”
16 Nave yoole aakiranthe vasulu va neeku aavoliiha ecikwakwa awe veelaponi yavathi nave elapo ya vathi yaahephiwa.
17 Nlelo aakhuma munkeelo mukina o nipuro naweela na empa ya Muluku, nenlo nri wirimu, nave owo tho aakhalano ecikwakwa yoonoliwa.
18 Nlelo va altare aakhumavo munkeelo mukina, nave owo aakhalano owerya wa olamulela mooro. Owo aakhuwela ni nsu noovuwa wa yoole aarino ecikwakwa yoonoliwa, ariki: “Mukuse ecikwakwa anyu nave muthukumanye mithito sa uuva veelaponi yavathi, woona wi uuva ene ohiichwa.”
19 Munkeelo aavoliiha ecikwakwa awe veelaponi yavathi, amuhephano uuva a veelaponi yavathi, nave amwiichela mu nipuro ntokotoko noomphocelamo na esara ya Muluku.
20 Nipuro noomphocelamo* naanyikaliwa okhwipi wa epooma, nave nipuro nlo noomphocelamo waakhumamo nikhami, wiixa waya waanaphiya mwaano mwa kavalo nave orekamela waya yaari mastatiya ncikhwi nimoha ni masana mathanu nammoha.*
Inoota
^ 144.000
^ 144.000
^ Naari: “mulepulo.”
^ Naari: “osulusulu.”
^ Naari: “esara ya.”
^ Mu Ekriki, porneiya. Moone Masu Atharihiwe.
^ Naari: “noomvocelamo.”
^ 1.600. Echu ya ikilomeetro 296. Estatiyu emoha enaakhwana akilomeetro 185.
